ಶತ್ರುಘ್ನ ಸಂಪತ್ತಿನ ಮೌಲ್ಯ ರೂ.112 ಕೋಟಿ

ಪಟನಾ: ಪ್ರತಿಷ್ಠಿತ ಪಟನಾ ಸಾಹೀಬ್‌ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿ ಶತ್ರುಘ್ನ ಸಿನ್ಹಾ ಭರ್ಜರಿ ಸಂಪತ್ತಿನ ಘೋಷಣೆ ಮಾಡಿದ್ದಾರೆ. ತಮ್ಮ ಬಳಿ 112.22 ಕೋಟಿ ರೂಪಾಯಿ ಮೌಲ್ಯದ ಚರ-ಸ್ಥಿರಾಸ್ತಿ ಇರುವುದಾಗಿ ಪ್ರಕಟಿಸಿದ್ದಾರೆ.

''ನನ್ನ ಬಳಿ 8.60 ಕೋಟಿ ರೂ. ಮೌಲ್ಯದ ಚರಾಸ್ತಿ ಮತ್ತು 103.61 ಕೋಟಿ ರೂ. ಮೌಲ್ಯದ ಸ್ಥಿರಾಸ್ತಿ ಇದೆ. ಅದೇ ರೀತಿ ನನ್ನ ಪತ್ನಿ ಪೂನಂ ಸಿನ್ಹಾ ಹೆಸರಿನಲ್ಲಿ 18.67 ಕೋಟಿ ರೂ. ಚರಾಸ್ತಿ ಮತ್ತು 62.65 ಕೋಟಿ ಚರಾಸ್ತಿ ಇದೆ,'' ಎಂದು ಶತ್ರುಘ್ನ ಸಿನ್ಹಾ ನಾಮಪತ್ರ ಸಲ್ಲಿಕೆ ವೇಳೆ ಘೋಷಿಸಿದ್ದಾರೆ.

1967ರಲ್ಲಿ ಪುಣೆಯ ಎಫ್‌ಟಿಐಐ ಸಂಸ್ಥೆಯಿಂದ ಪದವಿ ಪಡೆದು ದಶಕಗಳ ಕಾಲ ಬಾಲಿವುಟ್‌ ನಟರಾಗಿ ಮಿಂಚಿದ ಶತ್ರುಘ್ನ ಸಿನ್ಹಾ , ಸಿನಿಮಾ ಮತ್ತು ಉದ್ಯಮ ಮೂಲದಿಂದ ಹಣ ಗಳಿಸಿದ್ದಾಗಿ ತಿಳಿಸಿದ್ದಾರೆ. ಸದ್ಯ ತಮ್ಮ ಕೈಯಲ್ಲಿ 4,58,232 ರೂ. ನಗದು ಮತ್ತು ತಮ್ಮ ಪತ್ನಿ ಬಳಿ 5,95,366 ರೂ. ನಗದು ಇರುವುದಾಗಿ ಅಫಿಡವಿಟ್‌ನಲ್ಲಿ ತಿಳಿಸಿದ್ದಾರೆ.

ಬಿಜೆಪಿ ಜತೆಗಿನ ಮೂರು ದಶಕಗಳ ನಂಟು ಕಡಿದುಕೊಂಡ ಸಿನ್ಹಾ ಇತ್ತೀಚೆಗಷ್ಟೇ ಕಾಂಗ್ರೆಸ್‌ ಸೇರಿ ಪಟನಾ ಸಾಹೀಬ್‌ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿ ಕೇಂದ್ರ ಸಚಿವ ರವಿ ಶಂಕರ್‌ ಪ್ರಸಾದ್‌ ವಿರುದ್ಧ ಸೆಣಸಾಟಕ್ಕಿಳಿದಿದ್ದಾರೆ.