ಅಹಮದಾಬಾದ್‌ನಲ್ಲಿ ಜಪಾನ್‌ ಪ್ರಧಾನಿ ಶಿಂಜೋ ಅಬೆ - ಮೋದಿ ಡೇ ಔಟ್‌

ಅಹಮದಾಬಾದ್‌: ಭಾರತದ ಅಧಿಕೃತ ಪ್ರವಾಸ ಕೈಗೊಂಡಿರುವ ಜಪಾನ್‌ ಪ್ರಧಾನಮಂತ್ರಿ ಶಿಂಜೋ ಅಬೆ ಅಹಮದಾಬಾದ್‌ಗೆ ಆಗಮಿಸಿದರು.

ಎರಡು ದಿನಗಳ ಗುಜರಾತ್‌ ಪ್ರವಾಸದ ಮೇರೆಗೆ ಬುಧವಾರ ಮಧ್ಯಾಹ್ನ ಪತ್ನಿ ಅಕಿ ಅಬೆ ಅವರೊಂದಿಗೆ ಅಹಮದಾಬಾದ್‌ನ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಶಿಂಜೋ ಅಬೆ ಅವರನ್ನು ಪ್ರಧಾನಿ ಮೋದಿ ಆತ್ಮೀಯ ಅಪ್ಪುಗೆ ಮೂಲಕ ಬರಮಾಡಿಕೊಂಡರು.

ವಿಮಾನ ನಿಲ್ದಾಣಕ್ಕೆ ಆಗಮಿಸಿದ ಅಬೆಗೆ ಭೂಸೇನೆ, ವಾಯುಪಡೆ ಹಾಗೂ ನೌಕಾಪಡೆ ಯೋಧರು ಗೌರವ ವಂದನೆ ಸಲ್ಲಿಸಿದರು.

ವಿಶೇಷ ರೋಡ್‌ ಶೋ

ಅಹಮದಾಬಾದ್‌ನ ವಿಮಾನ ನಿಲ್ದಾಣದಿಂದ ಸಾಬರಮತಿ ಆಶ್ರಮದವರೆಗೂ ಏರ್ಪಡಿಸಲಾಗಿದ್ದ 8 ಕಿ.ಮೀ. ದೂರದ ವಿಶೇಷ ರೋಡ್‌ ಶೋನಲ್ಲಿ ಮೋದಿ ಹಾಗೂ ಅಬೆ ಪಾಲ್ಗೊಂಡರು. ವಿದೇಶಿ ಗಣ್ಯರೊಬ್ಬರ ಜತೆ ಪ್ರಧಾನಿ ಮೋದಿ ರೋಡ್‌ ಶೋನಲ್ಲಿ ಪಾಲ್ಗೊಂಡಿದ್ದು ಇದೇ ಮೊದಲು.

ಭಾರತದ ಸಂಪ್ರದಾಯಕ ವೈವಿಧ್ಯತೆಯನ್ನು ಸಾರುವ ಉದ್ದೇಶದ ಈ ರೋಡ್‌ ಶೋಗಾಗಿ ರಸ್ತೆಯ ಇಕ್ಕೆಲಗಳಲ್ಲಿ ಒಟ್ಟು 28 ವೇದಿಕೆಗಳನ್ನು ನಿರ್ಮಿಸಿ, ಪ್ರತಿಯೊಂದರಲೂ ವಿಭಿನ್ನ ಕಲಾ ಪ್ರಕಾರದ ಪ್ರದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿತ್ತು. ಜಪಾನ್‌ ಹಾಗೂ ಭಾರತದ ಧ್ವಜಗಳನ್ನು ಹಿಡಿದು, ರಸ್ತೆಯ ಇಕ್ಕೆಲಗಳಲ್ಲಿ ಕಿಕ್ಕಿರಿದು ನೆರೆದಿದ್ದ ಜನಸಂದಣಿಯತ್ತ ಕೈಬೀಸುತ್ತಾ ತೆರೆದ ಜೀಪ್‌ನಲ್ಲಿ ಉಭಯ ನಾಯಕರು ಸಾಗಿದರು.

ಭಾರತಕ್ಕೆ ಬಂದಿಳಿದಾಗ ಸೂಟು-ಬೂಟಿನಲ್ಲಿದ್ದ ಅಬೆ ಮತ್ತು ಪತ್ನಿ ಅಕಿ ಅವರು ರೋಡ್‌ ಶೋನಲ್ಲಿ ಭಾರತದ ಸಾಂಪ್ರದಾಯಿಕ ಉಡುಗೆಯಲ್ಲಿ ಕಾಣಿಸಿಕೊಂಡರು. ಅಬೆ ಅವರು ಕುರ್ತಾ-ಪೈಜಾಮ ಹಾಗೂ ನೀಲಿ ಬಣ್ಣದ ನೆಹರೂ ಜಾಕೆಟ್‌ ಧರಿಸಿದರೆ, ಪತ್ನಿ ಅಕಿ ಅವರು ಕೆಂಪು ಸಲ್ವಾರ್‌-ಕಮೀಜ್‌ನಲ್ಲಿ ಮಿಂಚಿದರು.

ಸಾಬರಮತಿಯಲ್ಲಿ ಗೈಡ್‌ ಆದ ಪ್ರಧಾನಿ

ಸಾಬರಮತಿ ಆಶ್ರಮದಲ್ಲಿ ರಾಷ್ಟ್ರಪಿತ ಮಹಾತ್ಮ ಗಾಂಧಿ ಅವರಿಗೆ ಅಬೆ ದಂಪತಿ ನಮನ ಸಲ್ಲಿಸಿದರು. ಈ ವೇಳೆ ಪ್ರಧಾನಿ ಮೋದಿ ಅವರು ಖುದ್ದಾಗಿ ಚರಕದ ಪ್ರಧಾನ್ಯತೆ, ಅದನ್ನು ಗಾಂಧೀಜಿ ಅವರು ಸ್ವಾತಂತ್ರ್ಯ ಹೋರಾಟಕ್ಕೆ ಬಳಸಿಕೊಂಡ ರೀತಿ ಹಾಗೂ ಗಾಂಧಿ ಅವರ ಜೀವನದ ಇತರ ಘಟನಾವಳಿಗಳ ಕುರಿತು ಸಚಿತ್ರ ವಿವರಣೆ ನೀಡಿದ್ದು ವಿಶೇಷವಾಗಿತ್ತು.

ಮಸೀದಿಗೆ ಮೋದಿ ಭೇಟಿ

ಮೋದಿ ಅವರು ಅಹಮದಾಬಾದ್‌ನ ಪ್ರಸಿದ್ಧ ಸಿದ್ದಿ ಸಯ್ಯದ್‌ ಮಸೀದಿಗೆ ಜಪಾನ್‌ ಪ್ರಧಾನಿ ಅಬೆ ಜತೆ ಭೇಟಿ ನೀಡಿದರು. 16ನೇ ಶತಮಾನದಲ್ಲಿ ನಿರ್ಮಾಣಗೊಂಡ, ಅಹಮದಾಬಾದ್‌ನ ಸಾಂಸ್ಕೃತಿಕ ಇತಿಹಾಸವನ್ನು ಸಾರುವ ಈ ಮಸೀದಿಯ ವಿಶಿಷ್ಟ ವಾಸ್ತುಶಿಲ್ಪ ಹಾಗೂ ಇತರ ವಿಶೇಷಗಳ ಬಗ್ಗೆ ಮೋದಿ ಅವರೇ ಅತಿಥಿಗಳಿಗೆ ವಿವರಿಸಿದರು.

ಟೆರೇಸ್‌ ರೆಸ್ಟೊರೆಂಟ್‌ನಲ್ಲಿ ಔತಣಕೂಟ

ಬುಧವಾರ ಅಹಮದಾಬಾದ್‌ ಪ್ರತಿಷ್ಠಿತ ಅಗೇಶಿಯೆ ಟೆರೇಸ್‌ ರೆಸ್ಟೋರೆಂಟ್‌ನಲ್ಲಿ ಅಬೆ ಹಾಗೂ ಪತ್ನಿಗೆ ಮೋದಿ ಔತಣ ಸತ್ಕಾರ ನೀಡಿದರು.

ಸಂಪೂರ್ಣ ಸಸ್ಯಹಾರಿ ಊಟಕ್ಕಾಗಿ ಜಪಾನ್‌ ಮತ್ತು ಗುಜರಾತ್‌ ಶೈಲಿಯ 30ಕ್ಕೂ ಹೆಚ್ಚು ವೈವಿಧ್ಯಮಯ ಖಾದ್ಯಗಳನ್ನು ತಯಾರಿಸಲಾಗಿತ್ತು. ಗುಜರಾತ್‌ ದಾಲ್‌, ಕಿಚಡಿ, ಪಾಲಾಕ್‌ ಜಾಮೂನ್‌, ರಸವಾಲಾ ಬಟೇಟಾ, ಭರೇಲಾ ಪರ್ವಾರ್‌, ಉಂಢಿಯು, ಬಾಜ್ರಿ ತೆಪ್ಲಾ ಮೆನುವಿನಲ್ಲಿ ಸ್ಥಾನ ಪಡೆದಿದ್ದವು.

ವಿಶೇಷ ಖಾದ್ಯಗಳನ್ನು ತಯಾರಿಸಲು ದಿಲ್ಲಿಯ ತಾಜ್‌ ಹೋಟೆಲ್‌ನಿಂದ ಬಾಣಸಿಗರನ್ನು ಕರೆತರಲಾಗಿತ್ತು. ತಮ್ಮ ಎರಡು ದಿನದ ಭೇಟಿ ವೇಳೆ ಜಪಾನ್‌ ಪ್ರಧಾನಿ ಇಲ್ಲಿನ ಪಂಚತಾರ ಹ್ಯಾಟ್‌ ಹೋಟೆಲ್‌ನಲ್ಲಿ ತಂಗಲಿದ್ದರೆ, ಮೋದಿ ರಾಜಭವನದಲ್ಲಿ ಉಳಿಯುವರು.

Shinzo Abe in India, Modi welcomes