ಮಾಲ್ಕನ್‌ಗಿರಿ(ಒಡಿಶಾ): ದೇಶದ ಜನರಲ್ಲಿ ಮಾನವೀಯತೆ ಸತ್ತೇ ಹೋಗುತ್ತಿದೆ ಎಂಬುದಕ್ಕೆ ಜ್ವಲಂತ ನಿದರ್ಶನವಿದು. ಏಳು ವರ್ಷದ ಬಾಲಕಿಯ ಶವವನ್ನು ರಸ್ತೆ ಮಧ್ಯೆಯೇ ಇಳಿಸಿ ಹೋದ ಘಟನೆ ಒಡಿಶಾದ ಮಾಲ್ಕನ್‌ಗಿರಿಯಲ್ಲಿ ಶುಕ್ರವಾರ ನಡೆದಿದೆ. ಬೇರೆ ದಾರಿ ಕಾಣದ ತಂದೆ ಬಾಲಕಿಯ ಶವ ಹೊತ್ತು ಹಲವು ಕಿ.ಮೀ. ನಡೆದೇ ಸಾಗಿದ್ದಾರೆ.
ಬರ್ಸಾ ಖೇಮುಡು ಎಂಬ ಏಳು ವರ್ಷದ ಬಾಲಕಿಯನ್ನು ಅನಾರೋಗ್ಯದ ನಿಮಿತ್ತ ಮಿಥಾಲಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆರೋಗ್ಯ ಬಿಡಾಯಿಸಿದ್ದರಿಂದ ಬಾಲಕಿಯನ್ನು ಮಾಲ್ಕನ್‌ಗಿರಿಯ ಜಿಲ್ಲಾಸ್ಪತ್ರೆಗೆ ಕರೆದೊಯ್ಯುವಂತೆ ವೈದ್ಯರು ಸೂಚಿಸಿದ್ದರು. ದುರ್ದೈವವಶಾತ್‌ ಬಾಲಕಿ ಮಾರ್ಗಮಧ್ಯೆ ಕೊನೆಯುಸಿರೆಳೆದಳು. ಇದು ತಿಳಿಯುತ್ತಿದ್ದಂತೆ ಸರಕಾರಿ ಆಸ್ಪತ್ರೆಯ ಆ್ಯಂಬುಲೆನ್ಸ್‌ ಚಾಲಕ ಬಾಲಕಿಯ ಶವವನ್ನು ಮಾರ್ಗಮಧ್ಯದಲ್ಲೇ ಇಳಿಸಿ ಹೋಗಿದ್ದ. ಬೇರೆದಾರಿಗಾಣದ ಅಸಹಾಯಕ ತಂದೆ ಶವ ಹೊತ್ತು ಹಲವು ಕಿ.ಮೀ. ನಡೆದೇ ಸಾಗಿದ್ದರು. ಬುಡಕಟ್ಟು ವ್ಯಕ್ತಿ ದಾನಾ ಮಾಂಜಿ ತನ್ನ ಪತ್ನಿಯ ಶವ ಹೊತ್ತು 10 ಕಿ.ಮೀ.ಸಾಗಿದ ಘಟನೆ ಹಸಿಯಾಗಿರುವಾಗಲೇ ಮತ್ತೊಂದು ಅಂತಹುದ್ದೇ ಘಟನೆ ನಡೆದಿದೆ.
