600 ಹುಡುಗಿಯರ ಅರೆಬೆತ್ತಲೆ ಫೋಟೊ ಸಂಗ್ರಹಿಸಿ ಬ್ಲಾಕ್‌ ಮೇಲ್‌

ಹೈದರಾಬಾದ್‌: ಕೆಲಸ ಕೊಡಿಸುವ ಸೋಗಿನಲ್ಲಿ ಹುಡುಗಿಯರ ಅರೆಬೆತ್ತಲೆ ಚಿತ್ರಗಳನ್ನು ಸಂಗ್ರಹಿಸಿ, ಬ್ಲಾಕ್‌ಮೇಲ್‌ ಮಾಡುತ್ತಿದ್ದ ಟೆಕ್ಕಿಯೊಬ್ಬ ಈಗ ಪೊಲೀಸರ ಬಲೆಗೆ ಬಿದ್ದಿದ್ದಾನೆ. ಕರ್ನಾಟಕ ಸೇರಿದಂತೆ 16 ರಾಜ್ಯಗಳಲ್ಲಿ ಸುಮಾರು 600ಕ್ಕೂ ಹೆಚ್ಚು ಯುವತಿಯರು ಈತನ ವಂಚನೆಯ ಜಾಲಕ್ಕೆ ಸಿಲುಕಿದ್ದಾರೆ. ವಂಚನೆಗೆ ಒಳಗಾದ ಯುವತಿಯರಿಂದ ಈತ ಹಣವನ್ನೂ ಪೀಕಿದ್ದಾನೆ. ಸ್ಥಳೀಯ ಯುವತಿಯೊಬ್ಬರು ನೀಡಿದ ದೂರಿನ ಮೇರೆಗೆ ಸೈಬರಾಬಾದ್‌ ಪೊಲೀಸರು ಚೆನ್ನೈನಲ್ಲಿ ಪ್ರದೀಪ್‌ (33) ಎಂಬಾತನನ್ನು ಬಂಧಿಸಿದ್ದಾರೆ.

ವಂಚನೆ ಹೇಗೆ?: ಚೆನ್ನೈನ ಐಟಿ ಕಂಪನಿಯಲ್ಲಿ ಉದ್ಯೋಗದಲ್ಲಿದ್ದ ಪ್ರದೀಪ್‌, ತಾನು ಪಂಚತಾರಾ ಹೋಟೆಲೊಂದರಲ್ಲಿ ಮಾನವ ಸಂಪನ್ಮೂಲ ಅಧಿಕಾರಿ ಎಂದು ಹೇಳಿಕೊಂಡು, ಸುಂದರ ಹುಡುಗಿಯರನ್ನು ನೇಮಕ ಮಾಡಿಕೊಳ್ಳುವಂತೆ ಕಂಪನಿ ಸೂಚಿಸಿದೆ ಎಂದು ಕರೆ ಮಾಡಿ ಯುವತಿಯರ ಸಂದರ್ಶನ ಮಾಡುತ್ತಿದ್ದ. ಆ ಹುಡುಗಿಯರು ಈತನ ಮಾತನ್ನು ನಂಬುತ್ತಿದ್ದಾರೆ ಎಂಬುದು ತಿಳಿಯುತ್ತಿದ್ದಂತೆ, 'ನಮ್ಮ ಕಂಪನಿ ಸೌಂದರ್ಯಕ್ಕೆ ಹೆಚ್ಚಿನ ಮಹತ್ವ ನೀಡುತ್ತದೆ. ಹೀಗಾಗಿ ವಿವಿಧ ಭಂಗಿಗಳಲ್ಲಿ ದೇಹದ ಸಂಪೂರ್ಣ ವಿಡಿಯೊ ಕಳುಹಿಸಿ' ಎಂದು ಕೇಳುತ್ತಿದ್ದ. ಬಳಿಕ ವಾಟ್ಸ್‌ಆ್ಯಪ್‌ ವಿಡಿಯೊ ಕಾಲ್‌ ಮಾಡಿ ಬಟ್ಟೆ ತೆಗೆಯುವಂತೆ ಹೇಳುತ್ತಿದ್ದ. ಹುಡುಗಿಯರು ಬಟ್ಟೆ ತೆಗೆಯುವುದನ್ನು ಸಾಫ್ಟ್‌ವೇರ್‌ ಮೂಲಕ ರೆಕಾರ್ಡ್‌ ಮಾಡಿಕೊಳ್ಳುತ್ತಿದ್ದ. ನಂತರ ಫೋಟೊಗಳನ್ನು ಇಟ್ಟುಕೊಂಡು ಹುಡುಗಿಯರಿಗೆ ಕರೆ ಮಾಡಿ, ಬ್ಲಾಕ್‌ಮೇಲೆ ಮಾಡುತ್ತಿದ್ದ ಎಂದು ತಿಳಿದುಬಂದಿದೆ.

ಆರೋಪಿ ವಿವಾಹಿತನಾಗಿದ್ದು, ವೈವಾಹಿಕ ಜೀವನದಲ್ಲಿನ ಹತಾಶೆಯಿಂದ ಈ ಕೃತ್ಯ ಎಸಗಿದ್ದಾಗಿ ಪೊಲೀಸರ ವಿಚಾರಣೆ ವೇಳೆ ಬಾಯಿ ಬಿಟ್ಟಿದ್ದಾನೆ. ಈತನದು ಸದಾ ರಾತ್ರಿ ಪಾಳಿ ಕೆಲಸ, ಹಗಲಿನಲ್ಲಿ ಪತ್ನಿ ಉದ್ಯೋಗಕ್ಕೆ ಹೋಗುತ್ತಿದ್ದರು. ಇದರಿಂದ ಬಹಳ ಹತಾಶೆಯಿಂದ ಖಿನ್ನನಾಗಿದ್ದ. ಪತ್ನಿ ಕೆಲಸಕ್ಕೆ ಹೋಗುತ್ತಿದ್ದಂತೆ ಕ್ಲಾಸಿಫೈಡ್ಸ್‌ ಪೋರ್ಟಲ್‌ವೊಂದರಲ್ಲಿ ಪ್ರಕಟಗೊಳ್ಳುತ್ತಿದ್ದ ಯುವತಿಯರ ಫೋನ್‌ನಂಬರ್‌ಗಳನ್ನು ಪಡೆದು ಅವರಿಗೆ ಕರೆ ಮಾಡುತ್ತಿದ್ದ.