ಬಾಡಿ ಬಿಲ್ಡ್‌ ಮಾಡಲು ಗನ್‌ ಹಿಡಿದು ಪ್ರೋಟೀನ್‌ ಕದ್ದ ನರಪೇತಲ!

ಹೊಸದಿಲ್ಲಿ: ಬಾಡಿ ಬಿಲ್ಡ್‌ ಮಾಡಬೇಕೆಂದು ಜಿಮ್‌ನಲ್ಲಿ ಮಾರಾಟಕ್ಕೆ ಇಟ್ಟಿದ್ದ ಪ್ರೊಟೀನ್‌ ಅನ್ನು ಗನ್‌ ಪಾಯಿಂಟ್‌ ಇಟ್ಟು ಕದ್ದ ವಿಚಿತ್ರ ಘಟನೆ ರಾಜಧಾನಿ ದಿಲ್ಲಿಯಲ್ಲಿ ನಡೆದಿದೆ.

ದಿಲ್ಲಿಯ ರೋಹಿಣಿ ಸೆಕ್ಟರ್‌-8ನಲ್ಲಿ ಈ ಘಟನೆ ನಡೆದಿದ್ದು, ಶಾರೀರಿಕವಾಗಿ ಸಣ್ಣಗಿದ್ದ 20 ವರ್ಷದ ಯುವಕ, ಪ್ರೋಟೀನ್‌ ತಿಂದರೆ ಬಾಡಿ ಬರುತ್ತದೆ ಎಂದು ಯಾರದ್ದೋ ಮಾತು ಕೇಳಿ ಈ ಕೃತ್ಯ ಎಸಗಿದ್ದಾನೆ.

35 ಕೆಜಿ ತೂಗುವ ಸಣಕಲು ಶರೀರದವನು ಗನ್‌ ತೋರಿಸಿ ಪ್ರೋಟೀನ್‌ ಎಗರಿಸಿದ್ದಲ್ಲದೆ, ಸಿಸಿಟಿವಿಯಲ್ಲಿ ತನ್ನ ಕೃತ್ಯ ದಾಖಲಾಗಿದೆ ಎಂದು ಗೊತ್ತಾಗುತ್ತಿದ್ದಂತೆ ಸಿಸಿಟಿವಿಯ ಡಿವಿಆರ್‌ಅನ್ನು ಕಿತ್ತುಕೊಂಡು ಹೋಗಿದ್ದಾನೆ.

ಆರಂಭದಲ್ಲಿ ಪ್ರೋಟೀನ್‌ ಬೇಕೆಂದು ಕೇಳಿದ್ದಾನೆ. ಆದರೆ ಮಾರಾಟಗಾರ ಕೊಡಲು ನಿರಾಕರಿಸಿದ್ದಾನೆ. ಪ್ರೋಟೀನ್‌ ತಿಂದರೆ ಬಾಡಿ ಬಿಲ್ಡ್‌ ಆಗುವುದಿಲ್ಲ. ಇದರಿಂದ ಸಾಕಷ್ಟು ನಕರಾತ್ಮಕ ಪರಿಣಾಮಗಳು ಬೀರುತ್ತವೆ. ಜಿಮ್‌ ತರಬೇತುದಾರರ ಸಲಹೆಗಳನ್ನು ಪಡೆಯುವಂತೆ ಸಲಹೆ ನೀಡಿದ್ದಾನೆ. ಸ್ವಲ್ಪ ಹೊತ್ತಿನ ನಂತರ ತೆರಳಿದ ಯುವಕ ಮತ್ತೆ ಗನ್‌ ಜತೆಗೆ ಹಿಂತಿರುಗಿದ್ದಾನೆ. ಪ್ರೋಟೀನ್‌ ಹೆಸರು ಬರೆಯುವಂತೆ ಸೂಚಿಸಿದ್ದಾನೆ. ಬರೆಯಲು ಯತ್ನಿಸಿದಾಗ ಕೈಯನ್ನು ಬಲವಂತವಾಗಿ ತಿರುಗಿಸಿ ಬೆದರಿಕೆ ಒಡ್ಡಿದ್ದಾನೆ. ಈ ಸಂದರ್ಭ ಆತನ ಜತೆಗೆ ಬಂದಿದ್ದವರು ಪ್ರೋಟೀನ್‌ಗಳನ್ನು ಲಪಟಾಯಿಸಿದ್ದಾರೆ.