ಹೈದರಾಬಾದ್: ದೇಶದ ಮೆಟ್ರೋ ನಗರಗಳಲ್ಲಿರುವ ಉದ್ಯೋಗಸ್ಥ ಮಹಿಳೆಯರಲ್ಲಿ ಧೂಮಪಾನ ಟ್ರೆಂಡ್ ಹೆಚ್ಚುತ್ತಿರುವುದು ಬೆಳಕಿಗೆ ಬಂದಿದೆ. ಯುವ ಉದ್ಯೋಗಿಗಳಲ್ಲಿ ಕೆಲವರು ಖುಷಿಗಾಗಿ ಸಿಗರೇಟು ಸೇದುತ್ತಿದ್ದರೆ, ಹೆಚ್ಚಿನವರು ಇದನ್ನು ಒತ್ತಡ ನಿವಾರಕ ಎನ್ನುತ್ತಿದ್ದಾರೆ.
ಸಿಗರೇಟು ಸೇದುವ ಅಪಾಯಕಾರಿ ಟ್ರೆಂಡ್ ಹೆಚ್ಚಾಗುತ್ತಿರುವುದು ಅಸ್ಸೋಚಾಮ್ನ ಸಾಮಾಜಿಕ ಅಭಿವೃದ್ಧಿ ಪ್ರತಿಷ್ಠಾನ ನಡೆಸಿರುವ ಸಮೀಕ್ಷೆಯಲ್ಲಿ ಬೆಳಕಿಗೆ ಬಂದಿದೆ. ಧೂಮಪಾನ ಮಹಿಳೆಯರ ಹೃದಯಕ್ಕೆ ಅತ್ಯಂತ ಅಪಾಯಕಾರಿ ಎಂಬ ಅಂಶವನ್ನು ಗಮನಿಸಬೇಕು ಎಂದು ಸಮೀಕ್ಷೆ ಹೇಳಿದೆ. ಕೆಲವರು ತೂಕ ಕಡಿಮೆ ಮಾಡಿಕೊಳ್ಳುವುದಕ್ಕೆ ಸಿಗರೇಟು ಸೇದುತ್ತೇವೆ ಎಂದಿದ್ದು ಕುತೂಹಲಕಾರಿಯಾಗಿದೆ. ಸಿಗರೇಟು ಸೇದಿದರೆ ಆಕರ್ಷಣೆ ಹೆಚ್ಚುತ್ತದೆ, ಅದು ಆಧುನಿಕತೆ ಮತ್ತು ಸ್ವಾತಂತ್ರ್ಯದ ಸಂಕೇತ ಅಂತ ನಂಬಿದವರೂ ಇದ್ದಾರೆ.
''ಹೆಚ್ಚು ಸಂಬಳ ಪಡೆಯುವ, ಸಾಮಾಜಿಕ ಬದುಕಿನಲ್ಲಿ ಸಕ್ರಿಯವಾಗಿರುವ ಮಹಿಳೆಯರಲ್ಲಿ ಸಿಗರೇಟು ಸೇವನೆ ಪ್ರವೃತ್ತಿ ಹೆಚ್ಚುತ್ತಿದೆ. ಅದರಲ್ಲೂ ಮೆಟ್ರೋ ನಗರಗಳಲ್ಲಿರುವ ಯುವತಿಯರು ತಮ್ಮ ಸಹೋದ್ಯೋಗಿಗಳ ಜತೆ ಯಾವುದೇ ಎಗ್ಗಿಲ್ಲದೆ ಸಿಗರೇಟು ಸೇದುತ್ತಾರೆ. ಸಾಮಾಜಿಕ ಮತ್ತು ಆರೋಗ್ಯದ ನೆಲೆಯಲ್ಲಿ ಇದೊಂದು ಆತಂಕಕಾರಿ ಪ್ರವೃತ್ತಿ,'' ಎಂದು ಅಸ್ಸೋಚಾಮ್ ಪ್ರಧಾನ ಕಾರ್ಯದರ್ಶಿ ಡಿ.ಎಸ್. ರಾವತ್ ಹೇಳಿದ್ದಾರೆ.
ಬೆಂಗಳೂರು, ಅಹಮದಾಬಾದ್, ಚೆನ್ನೈ, ದಿಲ್ಲಿ, ಹೈದರಾಬಾದ್, ಜೈಪುರ, ಕೋಲ್ಕೊತಾ, ಲಖನೌ, ಮುಂಬಯಿ ಮತ್ತು ಪುಣೆ ನಗರದಲ್ಲಿ 20ರಿಂದ 30 ವರ್ಷದ ನಡುವಿನ 2000 ಯುವತಿಯರನ್ನು ಸಮೀಕ್ಷೆಗೆ ಒಳಪಡಿಸಲಾಗಿದೆ.
2%
ಸಮೀಕ್ಷೆಗೆ ಒಳಪಟ್ಟವರಲ್ಲಿ ಶೇಕಡಾ 2ರಷ್ಟು ಮಹಿಳೆಯರು ದಿನಕ್ಕೆ ಒಂದಕ್ಕಿಂತ ಹೆಚ್ಚು ಪ್ಯಾಕೆಟ್ ಸಿಗರೇಟು ಸೇದುತ್ತಾರೆ. ಅವರು ತಮ್ಮ ಈ ಹವ್ಯಾಸಕ್ಕೆ ಕೆಲಸಕ್ಕೆ ಸಂಬಂಧಿಸಿದ ಒತ್ತಡವೇ ಕಾರಣ ಎನ್ನುತ್ತಾರೆ.
12%
ಮಹಿಳೆಯರು ತಾವು ಲೈಟ್ ಸ್ಮೋಕರ್ಸ್ ಎಂದು ಹೇಳಿಕೊಂಡಿದ್ದು, ದಿನಕ್ಕೆ ಒಂದು ಸಿಗರೇಟು ಸೇದುವುದಾಗಿ ತಿಳಿಸಿದ್ದಾರೆ.
40%
ಶೇಕಡಾ 40 ಮಹಿಳೆಯರು ತಾವೇನೂ ತುಂಬಾ ಸಿಗರೇಟು ಸೇದುವುದಿಲ್ಲ, ದಿನಕ್ಕೆ ಒಂದು ಅಥವಾ ಎರಡು ಮಾತ್ರ ಅಂತಾರೆ. ಅವರಲ್ಲಿ ಹೆಚ್ಚಿನವರು ಆಲ್ಕೋಹಾಲ್ ಸೇವನೆ ವೇಳೆ ಧೂಮ ಚಟ ಹೊಂದಿದ್ದಾಗಿ ವಿವರಿಸುತ್ತಾರೆ.