ಸೋಲಾರ್‌ ಹಗರಣ: ಸಿಬಿಐ ತನಿಖೆಗೆ ಕೋರ್ಟ್‌ ನಕಾರ

ಕೊಚ್ಚಿ: ಸೋಲಾರ್‌ ಹಗರಣದಲ್ಲಿ ಮುಖ್ಯಮಂತ್ರಿ ಓಮನ್‌ ಚಾಂಡಿ ಅವರ ಪಾತ್ರದ ಕುರಿತು ಸಿಬಿಐ ತನಿಖೆಯಾಗಬೇಕು ಎಂದು ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಕೇರಳ ಹೈಕೋರ್ಟ್‌ ವಜಾ ಮಾಡಿದೆ.

ಹಗರಣದಲ್ಲಿ ಆರೋಪಿಯೂ ಆಗಿರುವ ಸರಿತಾ ಎಸ್‌ ನಾಯರ್‌ ಅವರು ಸಲ್ಲಿಸಿದ್ದ ಅರ್ಜಿ ಕುರಿತು ವಿಚಾರಣೆ ಮಾಡಿದ ಾ್ಯಯಮೂರ್ತಿ ಬಿ ಕೆಮಲ್‌ ಪಾಶಾ ಅವರು, ಸರಿತಾ ಅವರ ಅರ್ಜಿ ರಾಜಕೀಯ ಪ್ರೇರಿತವಾಗಿದೆ. ಕೋರ್ಟ್‌ ರೂಮನ್ನು ರಾಜಕೀಯ ಅಖಾಡ ಮಾಡಿಕೊಳ್ಳಲು ಅವಕಾಶ ನೀಡುವುದಿಲ್ಲ ಎಂದು ಛೀಮಾರಿ ಹಾಕಿದರು. ಪ್ರಕರಣವನ್ನು ಸಿಬಿಐ ತನಿಖೆಗೆ ಒಪ್ಪಿಸಿ ಎಂದು ಕೇಳುವ ವಿಶ್ವಾಸಾರ್ಹತೆ ಸರಿತಾ ಅವರಿಗಿಲ್ಲ ಎಂದು ಅಭಿಪ್ರಾಯಪಟ್ಟರು. ಅಲ್ಲದೆ ತನಿಖೆಯಲ್ಲಿ ಲೋಪದೋಷಗಳಿದ್ದರೆ ವಿಚಾರಣಾ ನ್ಯಾಯಾಲಯದಲ್ಲಿ ಅರ್ಜಿ ಹಾಕಿಕೊಳ್ಳಿ ಎಂದು ತಾಕೀತು ಮಾಡಿದರು.

ರಾಜ್ಯ ಸರಕಾರ ನೇಮಿಸಿರುವ ವಿಶೇಷ ತನಿಖಾ ತಂಡ ಸೋಲಾರ್‌ ಹಗರಣದಲ್ಲಿ ಮುಖ್ಯಮಂತ್ರಿಗಳ ಪಾತ್ರವನ್ನು ಸರಿಯಾಗಿ ತನಿಖೆ ನಡೆಸುತ್ತಿಲ್ಲ ಎಂದು ಆರೋಪಿಸಿರುವ ಸರಿತಾ, ಪ್ರಕರಣವನ್ನು ಸಿಬಿಐಗೆ ವಹಿಸಿ ಎಂದು ಕೋರಿದ್ದರು. ಸರಿತಾ ಅವರು ಈ ಹಗರಣದಲ್ಲಿ 33ನೇ ಆರೋಪಿಯಾಗಿದ್ದಾರೆ.