ಯುಎಸ್ ಮಿಲಿಟರಿ ಉಪಗ್ರಹದಿಂದ ಮಾಹಿತಿ ಪಡೆಯುವ ಒಪ್ಪಂದಕ್ಕೆ ಸಹಿ ಹಾಕಲಿದೆ ಭಾರತ!

ಹೊಸದಿಲ್ಲಿ: ಹೊಸದಿಲ್ಲಿ: ಭಾರತ-ಅಮೆರಿಕ ನಡುವಿನ ಮೂರನೇ ವಾರ್ಷಿಕ ಅಮೆರಿಕ-ಭಾರತ 2+2 ಸಚಿವರ ಮಟ್ಟದ ಮಾತುಕತೆಯಲ್ಲಿ ಭಾಗವಹಿಸಲು, ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮೈಕ್ ಪಾಂಪಿಯೋ ಹಾಗೂ ರಕ್ಷಣಾ ಕಾರ್ಯದರ್ಶಿ ಮಾರ್ಕ್ ಎಸ್ಪರ್ ದೆಹಲಿಗೆ ಬಂದಿಳಿದಿದ್ದಾರೆ.

ನಾಳೆ(ಅ.27) ಭಾರತ-ಅಮೆರಿಕ ನಡುವೆ 2+2 ಮಾತುಕತೆ ಆರಂಭವಾಗಲಿದ್ದು, ಈ ವೇಳೆ ಹಲವು ಮಹತ್ವದ ರಕ್ಷಣಾ ಒಪ್ಪಂದಗಳು ಏರ್ಪಡುವ ಖಚಿತ ಭರವಸೆ ಸಿಕ್ಕಿದೆ .

ಇದಕ್ಕೆ ಪುಷ್ಠಿ ಎಂಬಂತೆ ಭಾರತ-ಅಮೆರಿಕ ನಡುವೆ, ಅಮೆರಿಕದ ಮಿಲಿಟರಿ ಉಪಗ್ರಹಗಳ ಮೂಲಕ ನಿಖರ ಮಾಹಿತಿ ಪಡೆಯುವ ಒಪ್ಪಂದ ಏರ್ಪಡಲಿದೆ ಎಂದು ಮೂಲಗಳು ತಿಳಿಸಿವೆ.

ಲಡಾಖ್ ಗಡಿ ಉದ್ವಿಗ್ನತೆ ನಡುವೆ 2+2 ಮಾತುಕತೆಗೆ ಭಾರತಕ್ಕೆ ಬಂದಿಳಿದ ಮೈಕ್ ಪಾಂಪಿಯೋ!

ಅಮೆರಿಕದ ಮಿಲಿಟರಿ ಉಪಗ್ರಹಗಳಿಂದ ನೈಜ ಸಮಯದ ಆಧಾರದ ಮೇಲೆ, ನಿಖರ ದತ್ತಾಂಶ ಮತ್ತು ಸ್ಥಳಾಕೃತಿ ಚಿತ್ರಗಳನ್ನು ಇದೀಗ ಭಾರತ ಪಡೆಯಲಿದೆ. ನಾಳಿನ 2+2 ಮಾತುಕತೆಯಲ್ಲಿ ಈ ಒಪ್ಪಂದಕ್ಕೆ ಸಹಿ ಬೀಳಲಿದೆ ಎನ್ನಲಾಗಿದೆ.

ಅಮೆರಿಕದ ಮಿಲಿಟರಿ ಉಪಗ್ರಹಗಗಳ ಸಹಾಯದಿಂದ ನೈಜ ಸಮಯದಲ್ಲಿ ಕರಾರುವಕ್ಕಾದ ಮಾಹಿತಿ ಸಿಗಲಿರುವುದರಿಂದ, ಭಾರತದ ರಕ್ಷಣಾ ಕ್ಷೇತ್ರದಲ್ಲಿ ಇದೊಂದು ಕ್ರಾಂತಿಕಾರಕ ಬದಲಾವಣೆಗೆ ನಾಂದಿ ಹಾಡಲಿದೆ ಎಂದೇ ವ್ಯಾಖ್ಯಾನಿಸಲಾಗುತ್ತಿದೆ.



ಮಿಲಿಟರಿ ಲಾಜಿಸ್ಟಿಕ್ಸ್ ವಿನಿಮಯ ಮತ್ತು ಸುರಕ್ಷಿತ ಸಂವಹನಗಳನ್ನು ಸಕ್ರಿಯಗೊಳಿಸಲು, ಉಭಯ ದೇಶಗಳು ಈಗಾಗಲೇ ಒಪ್ಪಂದಕ್ಕೆ ಸಹಿ ಹಾಕಿದ್ದು, ಇದೀಗ ಮಿಲಿಟರಿ ಉಪಗ್ರಹದ ಮಾಹಿತಿ ವಿನಿಮಯ ಒಪ್ಪಂದವೂ ಪರಸ್ಪರರನ್ನು ಮತ್ತಷ್ಟು ಹತ್ತಿರಕ್ಕೆ ಕರೆತರುವ ನಿರೀಕ್ಷೆ ಇದೆ.

ಭಾರತಕ್ಕೆ ಭೇಟಿ ನೀಡಿರುವ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಮಾರ್ಕ್ ಎಸ್ಪರ್‌ಗೆ ಸೇನಾ ವಂದನೆ!

ನಾಳಿನ(ಮಂಗಳವಾರ) ಸಭೆಯಲ್ಲಿ ಲಡಾಖ್ ಗಡಿಯಲ್ಲಿ ಚೀನಾದ ಆಕ್ರಮಣದ ಕುರಿತೂ ಚರ್ಚೆ ನಡೆಸಲಿದ್ದು, ಗಡಿ ಸಂರಕ್ಷಣೆ ವಿಷಯದಲ್ಲಿ ಭಾರತದ ಬೆಂಬಲಕ್ಕೆ ಅಮೆರಿಕ ಮತ್ತಷ್ಟು ಗಟ್ಟಿಯಾಗಿ ನಿಲ್ಲಲಿರುವುದು ಚೀನಾದ ನಿದ್ದೆಗೆಡೆಸಿದೆ.