ದಕ್ಷಿಣ ಚೀನಾ ಸಮುದ್ರ ಕವಾಯತು: ಭಾರತದ ಎರಡು ಯುದ್ಧ ನೌಕೆಗಳು ಭಾಗಿ

ಹೊಸದಿಲ್ಲಿ: ದಕ್ಷಿಣ ಚೀನಾ ಸಮುದ್ರದಲ್ಲಿ ಬಲಪ್ರದರ್ಶನದ ಭಾಗವಾಗಿ ಭಾರತ, ಅಮೆರಿಕ, ಜಪಾನ್ ಮತ್ತು ಫಿಲಿಪ್ಪೀನ್ಸ್‌ ಯುದ್ಧನೌಕೆಗಳು ಆರು ದಿನಗಳ ಕಾಲ ಕವಾಯತು ನಡೆಸಿವೆ.

ಮೇ 3ರಿಂದ 9ರ ವರೆಗೆ ಸಮನ್ವಯಿತ ಸಮೂಹ ಕವಾಯತು ನಡೆಸಲಾಗಿದ್ದು, ಭಾರತದ ನಿರ್ದೇಶಿತ ಕ್ಷಿಪಣಿ ನಾಶಕ ನೌಕೆ ಐಎನ್‌ಎಸ್‌ ಕೋಲ್ಕತ ಮತ್ತು ಫ್ಲೀಟ್ ಟ್ಯಾಂಕರ್ ಐಎನ್‌ಎಸ್‌ ಶಕ್ತಿ, ಅಮೆರಿಕದ ಯುಎಸ್‌ಎಸ್‌ ವಿಲಿಯಮ್ಸ್‌ ಪಿ. ಲಾರೆನ್ಸ್‌, ಜಪಾನಿನ ಹೆಲಿಕಾಪ್ಟರ್ ಕ್ಯಾರಿಯರ್ ಜೆಎಂಎಸ್‌ಡಿಎಫ್ ಇಝುಮೊ ಮತ್ತು ಡಿಸ್ಟ್ರಾಯರ್ ಜೆಎಂಎಸ್‌ಡಿಎಫ್‌ ಮುರಸಮೆ ಮತ್ತು ಫಿಲಿಪ್ಪೀನ್ಸ್‌ನ ಯುದ್ಧನಾವೆ ಬಿಆರ್‌ಪಿ ಆಂಡ್ರ್ಯೂಸ್ ಬೋನಿಫೆಸಿ ಪಾಲ್ಗೊಂಡಿದ್ದವು.

'ಈ ಸಮೂಹ ಕವಾಯತು ಪಾಲುದಾರ ನೌಕಾಪಡೆಗಳ ನಡುವೆ ಮತ್ತಷ್ಟು ಸಮನ್ವಯ ಹಾಗೂ ಪರಸ್ಪರ ತಿಳುವಳಿಕೆಗಳನ್ನು ಹೆಚ್ಚಿಸುವ ಉದ್ದೇಶ ಹೊಂದಿತ್ತು. ಸಾಗರ ಮಾರ್ಗದ ಸುರಕ್ಷತೆ ಹಾಗೂ ಸಮಾನ ಮನಸ್ಕ ದೇಶಗಳ ನಡುವಣ ಪರಸ್ಪರ ಅವಲಂಬನೆಗಳ ವಿಚಾರದಲ್ಲಿ ಭಾರತದ ಬದ್ಧತೆಯನ್ನು ಇದು ಪ್ರದರ್ಶಿಸಿದೆ' ಎಂದು ಭಾರತೀಯ ನೌಕಾಪಡೆ ಕ್ಯಾಪ್ಟನ್ ಡಿ.ಕೆ ಶರ್ಮಾ ತಿಳಿಸಿದರು.


ದಕ್ಷಿಣ ಚೀನಾ ಸಮುದ್ರ ಭಾಗದಲ್ಲಿ ಚೀನಾದ ಆಕ್ರಮಣಶೀಲ ಹಾಗೂ ವಿಸ್ತರಣಾವಾದಿ ನಡವಳಿಕೆ ಹಿನ್ನೆಲೆಯಲ್ಲಿ, ಅಂತಾರಾಷ್ಟ್ರೀಯ ಸಾಗರ ಮಾರ್ಗಗಳಲ್ಲಿ ಅಂತಾರಾಷ್ಟ್ರೀಯ ಕಾನೂನಿನ ಪ್ರಕಾರ ನೌಕೆಗಳ ಸಂಚಾರ ಹಾಗೂ ವಿಮಾನಗಳ ಹಾರಾಟದ ಸ್ವಾತಂತ್ರ್ಯದ ಅಗತ್ಯವನ್ನು ಎಲ್ಲ ರಾಷ್ಟ್ರಗಳೂ ಗೌರವಿಸಬೇಕು ಎಂದು ಮಿತ್ರರಾಷ್ಟ್ರಗಳು ಪ್ರತಿಪಾದಿಸಿವೆ.

ವಿವಿಧ ದೇಶಗಳ ಯುದ್ಧ ನೌಕೆಗಳು ವ್ಯೂಹರಚನೆ, ಕ್ರಾಸ್ ಡೆಕ್ ಫ್ಲೈಯಿಂಗ್ ಮತ್ತು ಸಾಗರ ನಾವಿಕರ ವಿನಿಮಯದಂತಹ ನಾನಾ ಕಸರತ್ತುಗಳನ್ನು ನಡೆಸಿದವು ಎಂದು ಕ್ಯಾಪ್ಟನ್ ಶರ್ಮಾ ತಿಳಿಸಿದರು.