ಎಸ್ಪಿ-ಬಿಎಸ್ಪಿ ಮೈತ್ರಿ ಏರ್ಪಟ್ಟರೆ ಬಿಜೆಪಿಗೆ ಕೊಂಚ ಹಿನ್ನಡೆ ಸಾಧ್ಯತೆ

ಹೊಸದಿಲ್ಲಿ: ಮುಂಬರುವ ಲೋಕಸಭೆ ಚುನಾವಣೆಯಲ್ಲಿ ಉತ್ತರ ಪ್ರದೇಶದಲ್ಲಿ ಎಸ್ಪಿ, ಬಿಎಸ್ಪಿ ನಡುವೆ ಮೈತ್ರಿಯಾದರೆ ಬಿಜೆಪಿಗೆ ಸರಳ ಬಹುಮತಕ್ಕೆ ಬೆರಳೆಣಿಕೆಯ ಸ್ಥಾನಗಳ ಕೊರತೆ ಉಂಟಾಗಲಿದೆ ಎಂದು ಸಮೀಕ್ಷೆಯೊಂದು ತಿಳಿಸಿದೆ.

'ಸದ್ಯದಲ್ಲೇ ಚುನಾವಣೆ ನಡೆದರೆ ಯಾವ ಪಕ್ಷ ಅಧಿಕಾರ ಪಡೆಯಲಿದೆ' ಎಂಬ ಕುರಿತು ಎಬಿಪಿ ನ್ಯೂಸ್‌- ಸಿ ವೋಟರ್‌ ನಡೆಸಿತ್ತು. ಎರಡು ಪಕ್ಷಗಳ ಮೈತ್ರಿ ಏರ್ಪಟ್ಟರೆ ಎನ್‌ಡಿಎ 247 (ಬಹುಮತಕ್ಕೆ 19 ಸ್ಥಾನ ಕಡಿಮೆ) ಸ್ಥಾನ ಪಡೆಯಲಿದೆ; ಕೊನೆಕ್ಷಣದಲ್ಲಿ ಮೈತ್ರಿ ವಿಫಲವಾದರೆ 291 ಸ್ಥಾನಗಳನ್ನು ಪಡೆದು ನಿರಾಯಾಸವಾಗಿ ಅಧಿಕಾರದ ಗದ್ದುಗೆ ಏರಲಿದೆ ಎಂದು ಸಮೀಕ್ಷೆ ತಿಳಿಸಿದೆ. 2014ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ನಿಚ್ಚಳ ಗೆಲುವಿಗೆ ಉತ್ತರ ಪ್ರದೇಶದ ಕೊಡುಗೆಯೂ ಗಣನೀಯವಾಗಿತ್ತು. ರಾಜ್ಯದ 80 ಲೋಕಸಭಾ ಕ್ಷೇತ್ರಗಳ ಪೈಕಿ ಬಿಜೆಪಿ 71ರಲ್ಲಿ ಗೆಲುವು ಸಾಧಿಸಿತ್ತು.

ಒಡಿಶಾದ 21 ಲೋಕಸಭಾ ಕ್ಷೇತ್ರಗಳ ಪೈಕಿ ಬಿಜೆಪಿ 15ರಲ್ಲಿ ಗೆಲುವು ಸಾಧಿಸಲಿದೆ. ಮಹಾರಾಷ್ಟ್ರ ಮತ್ತು ತಮಿಳುನಾಡಿನಲ್ಲಿ ಯುಪಿಎ ಗಣನೀಯ ಸಾಧನೆ ಮಾಡಲಿದೆ ಎಂದೂ ಸಮೀಕ್ಷೆ ತಿಳಿಸಿದೆ.