ಜಾರಿ ನಿರ್ದೇಶನಾಲಯ ಎದುರು ಹಾಜರಾಗಿ: ರಾಬರ್ಟ್ ವಾದ್ರಾಗೆ ಕೋರ್ಟ್ ಸೂಚನೆ

ಹೊಸದಿಲ್ಲಿ: ವಿದೇಶದಲ್ಲಿ ಆಸ್ತಿ ಹೊಂದಿರುವ ಪ್ರಕರಣಕ್ಕೆ ಸಂಬಂಧಿಸಿ ಜಾರಿ ನಿರ್ದೇಶನಾಲಯದ ಎದುರು ಬುಧವಾರದೊಳಗಾಗಿ ಹಾಜರಾಗಿ ಎಂದು ವಿಶೇಷ ಕೋರ್ಟ್ ಸೋನಿಯಾ ಗಾಂಧಿ ಅಳಿಯ ರಾಬರ್ಟ್ ವಾದ್ರಾಗೆ ಸೂಚನೆ ನೀಡಿದೆ.

ರಾಬರ್ಟ್ ವಾದ್ರಾ ಲಂಡನ್‌ನಲ್ಲಿ ಮಿಲಿಯನ್ ಪೌಂಡ್ ಮೌಕ್ಯದ ಎಂಟು ಆಸ್ತಿಗಳ ಒಡೆತನ ಹೊಂದಿದ್ದಾರೆ. ತನ್ನ ವಿರುದ್ಧದ ತನಿಖೆಯನ್ನು ರಾಜಕೀಯ ದ್ವೇಷ ಎಂದಿರುವ ರಾಬರ್ಟ್ ವಾದ್ರಾ, ಪ್ರಕರಣದಲ್ಲಿ ಬಂಧನಕ್ಕೆ ತಡೆ ಕೋರಿ ಫೆ. 16ರವರೆಗೆ ನಿರೀಕ್ಷಣಾ ಜಾಮೀನು ಪಡೆದುಕೊಂಡಿದ್ದಾರೆ.

ಜತೆಗೆ 1 ಲಕ್ಷ ರೂ. ಶ್ಯೂರಿಟಿ ಮೊತ್ತವನ್ನು ಕೋರ್ಟ್‌ಗೆ ಪಾವತಿಸಿರುವ ವಾದ್ರಾ, ಲಂಡನ್‌ನಲ್ಲಿರುವ ತಾಯಿಯ ಯೋಗಕ್ಷೇಮ ನೋಡಿಕೊಳ್ಳಬೇಕಿದೆ, ಹೀಗಾಗಿ ಅಲ್ಲಿರುತ್ತೇನೆ ಎಂದು ನೆಪ ಹೇಳಿದ್ದಾರೆ.

ಲಂಡನ್‌ನಲ್ಲಿ 1.9 ಮಿಲಿಯನ್ ಪೌಂಡ್ ಮೌಲ್ಯದ ಫ್ಲ್ಯಾಟ್ ಜತೆಗೆ ಎಂಟು ವಿವಿಧ ಸೊತ್ತುಗಳ ಒಡೆತನವನ್ನು ಕಾಂಗ್ರೆಸ್‌ನ ಕಾರ್ಯದರ್ಶಿ ಪ್ರಿಯಾಂಕ ಗಾಂಧಿ ಪತಿ ರಾಬರ್ಟ್ ವಾದ್ರಾ ಹೊಂದಿದ್ದಾರೆ.

ಬೇನಾಮಿ ಹೆಸರಿನ ಆಸ್ತಿ, ಅಕ್ರಮ ಹಣಕಾಸು ವರ್ಗಾವಣೆ ಮತ್ತು ಬೇನಾಮಿ ಹೆಸರಿನಲ್ಲಿ ಆಸ್ತಿ ಖರೀದಿ ಸಹಿತ ರಾಬರ್ಟ್ ವಾದ್ರಾ ವಿರುದ್ಧ ಸಿಬಿಐ ಮತ್ತು ಇಡಿ ತನಿಖೆ ಆರಂಭಿಸಿದ್ದು, ವಾದ್ರಾ ಮಾತ್ರ ತನ್ನ ವಿರುದ್ಧ ರಾಜಕೀಯ ಸಂಚು ಎಂದಿದ್ದಾರೆ.