ಮುಂಬಯಿ-ಪುಣೆ ಎಕ್ಸ್‌ಪ್ರೆಸ್‌ವೇ ವೇಗಮಿತಿ 100 ಕಿ.ಮೀ.ಗೆ ವಿಸ್ತರಣೆ ಸಾಧ್ಯತೆ

[This story originally published in Mumbai Mirror on Aug 27, 2018]

ಮುಂಬಯಿ: ದೇಶದ ಪ್ರಮುಖ ಹೆದ್ದಾರಿಗಳಲ್ಲಿ ಒಂದಾದ ಮುಂಬಯಿ-ಪುಣೆ ಎಕ್ಸ್‌ಪ್ರೆಸ್‌ವೇನಲ್ಲಿ ಪ್ರಸ್ತುತ ಇರುವ 80 ಕಿ.ಮೀ. ವೇಗಮಿತಿಯನ್ನು 100 ಕಿ.ಮೀ. ಪ್ರತಿ ಗಂಟೆಗೆ ಏರಿಕೆ ಮಾಡಲು ಹೆದ್ದಾರಿ ಪ್ರಾಧಿಕಾರ ಸಿದ್ದತೆ ನಡೆಸಿದೆ.

95 ಕಿ.ಮೀ. ಇ-ವೇ ಹೊಂದಿರುವ ಮುಂಬಯಿ-ಪುಣೆ ಎಕ್ಸ್‌ಪ್ರೆಸ್‌ವೇ ದೇಶದ ಅತ್ಯಂತ ಅಪಾಯಕಾರಿ ಹೆದ್ದಾರಿಗಳಲ್ಲಿ ಒಂದಾಗಿದೆ. 20003ರಲ್ಲಿ ಈ ಹೆದ್ದಾರಿ ತೆರೆದಿದ್ದು, ಈವರೆಗೆ 5000 ಅಪಘಾತಗಳು ಸಂಭವಿಸಿದೆ.

ಪ್ರಸ್ತುತ ಮಹಾರಾಷ್ಟ್ರ ರಾಜ್ಯ ರಸ್ತೆ ಅಭಿವೃದ್ಧಿ ಸಂಸ್ಥೆ ಹೆದ್ದಾರಿಯ ವೇಗಮಿತಿಯನ್ನು ಪರಿಷ್ಕರಿಸಲು ನಿರ್ಧರಿಸಿದ್ದು, ಅದಕ್ಕಾಗಿ ಸಂಬಂಧಿತ ವಿವಿಧ ಇಲಾಖೆಗಳ ತಜ್ಞರ ಸಮಿತಿ ರಚಿಸಿ, ವರದಿ ಆಧಾರದ ಮೇಲೆ ವೇಗ ವಿಸ್ತರಣೆಗೆ ಕ್ರಮ ಕೈಗೊಳ್ಳಲಿದೆ.

ಗೃಹ ಇಲಾಖೆ, ಸಾರಿಗೆ, ಅಟೋಮೊಬೈಲ್ ಮತ್ತು ಆರೋಗ್ಯ ಇಲಾಖೆಯ ತಜ್ಞರು ಸಮಿತಿಯಲ್ಲಿ ಇರಲಿದ್ದು, ಹೆದ್ದಾರಿಯಲ್ಲಿನ ಸಮಸ್ಯೆಗಳು ಮತ್ತು ಕೈಗೊಳ್ಳಬೇಕಾದ ಅಗತ್ಯ ಕ್ರಮಗಳ ಕುರಿತು ಅಧ್ಯಯನ ನಡೆಸಲಿದೆ.

ಕಳೆದ ಏಪ್ರಿಲ್‌ನಲ್ಲಿ ಕೇಂದ್ರ ಸರಕಾರ ಎಲ್ಲ ಹೆದ್ದಾರಿ ಮತ್ತು ಎಕ್ಸ್‌ಪ್ರೆಸ್‌ವೇ ಪ್ರಾಧಿಕಾರಗಳಿಗೆ ಸೂಚನೆ ನೀಡಿ, ದೇಶದ ಎಲ್ಲ ಹೆದ್ದಾರಿಗಳಲ್ಲಿ ಸುಗಮ ಸಂಚಾರ ಮತ್ತು ಜನರ ಸಮಯ ಉಳಿತಾಯದ ನಿಟ್ಟಿನಲ್ಲಿ ವೇಗಮಿತಿಯನ್ನು ಪರಿಷ್ಕರಿಸುವಂತೆ ಕೇಳಿಕೊಂಡಿತ್ತು.