ಸ್ಟ್ರಾಂಗ್‌ ಈಸ್‌ ಸೆಕ್ಸಿ: ಸಾನಿಯಾ ಮಿರ್ಜಾ

ಹೊಸದಿಲ್ಲಿ: ಬಲವಾಗಿರುವುದೇ ಸೆಕ್ಸಿ, ಸಪೂರ ಆಕರ್ಷಕವಲ್ಲ. ಆರೋಗ್ಯವಂತರಾಗಿ, ಬಲವಾಗಿರುವುದು ಹೆಚ್ಚು ಆಕರ್ಷಣೀಯ- ಸುಂದರ ಮೈಮಾಟದ ಬಗ್ಗೆ ಹೈದರಾಬಾದಿ ಗ್ಲಾಮರಸ್‌ ಟೆನ್ನಿಸ್‌ ಆಟಗಾರ್ತಿ ಸಾನಿಯಾ ಮಿರ್ಜಾ ನೀಡಿರುವ ವ್ಯಾಖ್ಯಾನ ಇದು.

'ಟೆನ್ನಿಸ್‌ ನನ್ನ ಮೊದಲ ಆದ್ಯತೆ, ಟೆನ್ನಿಸ್‌ ಹೊರತಾದ ಬದುಕಿಲ್ಲ. ಆಡದಿದ್ದರೆ ಯಾರೂ ನನ್ನ ಫೋಟೊ ಕೇಳಲ್ಲ. ಟೆನ್ನಿಸ್‌ಗಾಗಿ ಫಿಟ್ನೆಸ್‌ ಕಾಯ್ದುಕೊಳ್ಳಲೇ ಬೇಕು. ಅದಕ್ಕಾಗಿ ಏನು ಬೇಕೋ ಅದನ್ನು ನಾನು ಮಾಡುತ್ತೇನೆ,' ಎಂದಿದ್ದಾರೆ ಸಾನಿಯಾ .

ಸಾನಿಯಾ ಜೀವನ ಚರಿತ್ರೆ ಸದ್ಯದಲ್ಲೇ ಹೊರಬರಲಿದ್ದು, ತೂಕ ನಿರ್ವಹಣೆ ಹೇಗೆ, ಅವರ ಸಾಮರ್ಥ್ಯ, ದೌರ್ಬಲ್ಯಗಳು, ಗ್ರ್ಯಾನ್‌ ಸ್ಲಾಮ್‌ ಬಗ್ಗೆ ಟೈಮ್ಸ್ ಆಫ್‌ ಇಂಡಿಯಾ ಜತೆ ಮಾತನಾಡಿದ್ದಾರೆ.

'ಎಲ್ಲರ ಫಿಟ್ನಸ್‌ ಮಂತ್ರ ಒಂದೇ ಆಗಿರುವುದಿಲ್ಲ. ಯಾರು ಸರಿ, ಯಾರು ತಪ್ಪು ಎಂದು ನಾನು ಹೇಳಲಾರೆ. ನನಗೇನೋ ಒಳ್ಳೆಯದೋ ಅದನ್ನು ಪಾಲಿಸುತ್ತೇನೆ. ಫಿಟ್ನೆಸ್‌ ಕಾಯ್ದುಕೊಳ್ಳದಿದ್ದರೆ ನಂ1 ಸ್ಥಾನದಲ್ಲಿ ಇರಲಾರೆ,' ಎಂದು ಹೇಳಿದ್ದಾರೆ.

ಸಿನಿಮಾ ಮಾಡಬಹುದು:

'ಜೀವನ ಚರಿತ್ರೆ ಬಗ್ಗೆ ಈಗಲೇ ಎಲ್ಲ ವಿವರ ಹಂಚಿಕೊಳ್ಳಲಾರೆ. ಕೆಲ ತಿಂಗಳಲ್ಲಿ ಪುಸ್ತಕ ಬರಬಹುದು. ಕೆಲವರ ಜತೆ ಮಾತುಕತೆ ನಡೆಸಿದ್ದೇನೆ. ಆರು ತಿಂಗಳಲ್ಲೇ ಪುಸ್ತಕ ಹೊರಬರುತ್ತದೆ ಎಂದು ಹೇಳಲಾಗದು. ವರ್ಷಗಳೂ ಆಗಬಹುದು. ಅದೇ ಸರಿಯಾದ ಸಮಯ ಎನಿಸುತ್ತೆ. ಸಿನಿಮಾ ಮಾಡಲು ನನ್ನ ಕಥೆ ಚೆನ್ನಾಗಿದೆ,' ಎಂದು ಹೇಳಿದ್ದಾರೆ.