ದುಡ್ಡು ಮುಟ್ಟಿದ್ರೆ ಬರುತ್ತೆ ದೊಡ್ಡ ರೋಗ, ತಕ್ಷಣ ಕೈ ತೊಳೆಯಿರಿ!

ಹೊಸದಿಲ್ಲಿ: ನಗದು ನೋಟುಗಳನ್ನು ಮುಟ್ಟಿದರೆ ಸೋಂಕು ರೋಗಗಳು ತಗುಲುತ್ತವೆ. ಕ್ಷಯ, ಅಲ್ಸರ್‌, ಅತಿಸಾರಗಳಂತಹ ಗಂಭೀರ ರೋಗಗಳು ಬರುತ್ತವೆ ಎಂದು ಅಧ್ಯಯನವೊಂದು ತಿಳಿಸಿದೆ.

ಈ ನಿಟ್ಟಿನಲ್ಲಿ ವಿತ್ತ ಸಚಿವ ಅರುಣ್‌ ಜೇಟ್ಲಿ ಅವರಿಗೆ ಪತ್ರ ಬರೆದಿರುವ ಅಖಿಲ ಭಾರತ ವ್ಯಾಪಾರಿಗಳ ಒಕ್ಕೂಟ (ಸಿಎಐಟಿ), ನೋಟುಗಳ ಚಲಾವಣೆಯಿಂದ ರೋಗಗಳು ಹರಡುವ ಸಾಧ್ಯತೆ ಬಗ್ಗೆ ತನಿಖೆ ನಡೆಸುವಂತೆ ಒತ್ತಾಯಿಸಿದೆ.

ಹಲವಾರು ಸಂಶೋಧನೆಗಳನ್ನು ಬೊಟ್ಟು ಮಾಡಿರುವ ಒಕ್ಕೂಟ, ಇದೊಂದು ಸಾರ್ವಜನಿಕರ ಆರೋಗ್ಯದ ಕುರಿತಾದ ಗಂಭೀರ ಸಮಸ್ಯೆ. ನೋಟುಗಳ ಚಲಾವಣೆ ಸಂದರ್ಭ ಸೂಕ್ಷ್ಮಾಣುಗಳು ಹರಿದಾಡುತ್ತಿದ್ದು, ರೋಗಗಳಿಗೆ ಕಾರಣವಾಗುತ್ತಿವೆ ಎಂದು ದೂರಿದ್ದಾರೆ. ಅಗತ್ಯ ಮುನ್ನಚ್ಚರಿಕೆ ಕ್ರಮಗಳ ಬಗ್ಗೆ ವಿತ್ತ ಸಚಿವರು ಗಮನ ಹರಿಸಬೇಕು ಎಂದಿದ್ದಾರೆ.

ಸಂಶೋಧನೆಗಳು ಏನು ಹೇಳುತ್ತವೆ?
ಸೈಂಟಿಫಿಕ್‌ ಮತ್ತು ಇಂಡಸ್ಟ್ರಿಯಲ್‌ ರೀಸರ್ಚ್‌ ಒಕ್ಕೂಟದ ಪ್ರಮುಖ ಸಂಶೋಧನಾ ಕೇಂದ್ರ ಇನ್ಸ್‌ಟಿಟ್ಯೂಟ್‌ ಆಫ್‌ ಜಿನೊಮಿಕ್ಸ್‌ & ಇಂಟಿಗ್ರೆಟಿವ್‌ ಬಯಾಲಜಿ (ಐಜಿಐಬಿ) ನಡೆಸಿದ ಅಧ್ಯಯನದಲ್ಲಿ ಕರೆನ್ಸಿ ನೋಟುಗಳಿಂದ ರೋಗಗಳು ಹರಡಿದ 78 ಪ್ರಕರಣಗಳಲ್ಲಿ ಸೂಕ್ತ ಡಿಎನ್‌ಎಗಳನ್ನು ಕಲೆ ಹಾಕಿದೆ. ಪತ್ತೆಯಾದ ಹೆಚ್ಚಿನ ಸೂಕ್ಷ್ಮಾಣುಗಳು ಶಿಲೀಂಧ್ರಗಳಾಗಿದ್ದು, ಸೋಂಕು ರೋಗಗಳನ್ನು ಹರಡುವ ಬ್ಯಾಕ್ಟೀರಿಯಾಗಳ ಅಸ್ತಿತ್ವವನ್ನು ಗುರುತಿಸಿದೆ.

2016ರಲ್ಲಿ ಜರ್ನಲ್‌ ಅಫ್‌ ಕರೆಂಟ್‌ ಮೈಕ್ರೊಬಯಾಲಜಿ ಮತ್ತು ಅಪ್ಲೈಡ್‌ ಸೈನ್ಸ್‌ ಪತ್ರಿಕೆಯಲ್ಲಿ ಪ್ರಕಟಗೊಂಡ ವರದಿಯನ್ನು ಒಕ್ಕೂಟ ಬೊಟ್ಟು ಮಾಡಿ ತೋರಿಸಿದೆ. ತಮಿಳುನಾಡಿನ ತಿರುನವೇಲಿ ವೈದ್ಯಕೀಯ ಕಾಲೇಜಿನ ಮೈಕ್ರೋಬಯಾಲಜಿ ತಂಡ ಪರೀಕ್ಷಿಸಿದ 120 ನೋಟುಗಳ ಪೈಕಿ ಶೇ.86.4ರಲ್ಲಿ ಸೂಕ್ಷ್ಮಾಣುಗಳನ್ನು ಪತ್ತೆಯಾದ ಬಗ್ಗೆ ವರದಿ ಮಾಡಿತ್ತು.

ಯಾವ್ಯಾವ ರೋಗಗಳು ಬರುತ್ತವೆ?
ಕ್ಷಯ, ಅಲ್ಸರ್‌, ಅತಿಸಾರ, ಸಾಮಾನ್ಯ ಜ್ವರ, ಹೊಟ್ಟೆನೋವು, ಚರ್ಮರೋಗ, ಮೂತ್ರನಾಳದ ಸೋಂಕು, ಶ್ವಾಸಕೋಶದ ಸೋಂಕು, ಗಂಟಲು ಸೋಂಕು, ಮಿದುಳಿನ ಉರಿಯೂತ, ರಕ್ತ ನಂಜು.

ನೋಟುಗಳ ಮೇಲೆ ಸೂಕ್ಷ್ಮಾಣುಗಳು ಸೇರಿಕೊಳ್ಳುವುದು ಹೇಗೆ?
- ಸೀನುವಾಗ, ಕೆಮ್ಮುವಾಗ ನೋಟಿನ ಮೇಲೆ ಸೂಕ್ಷ್ಮಾಣುಗಳು ಅಂಟಿಕೊಳ್ಳುವ ಮೂಲಕ
- ಮಲ-ಮೂತ್ರ ನೋಟಿಗೆ ತಗಲುವ ಮೂಲಕ
- ಬಾಯಿಯ ಜೊಲ್ಲಿನ ರಸ ಹಚ್ಚಿ ನೋಟು ಎಣಿಕೆ ಮಾಡುವುದರಿಂದ
- ಗಾಯಗಳಿಗೆ ನೋಟು ತಾಗುವುದರಿಂದ
- ನೋಟುಗಳನ್ನು ಇರಿಸಿದ ಸ್ಥಳದಲ್ಲಿ ಸೂಕ್ಷ್ಮಾಣುಗಳು ಹತ್ತಿಕ್ಕೊಳ್ಳುವುದು
- ತರಕಾರಿ ಮಾರುಕಟ್ಟೆ, ಮಾಂಸದ ಅಂಗಡಿ, ಹಾಲಿನ ಬೂತ್‌, ಪಾನ್‌ ಅಂಗಡಿ, ಪೆಟ್ರೋಲ್‌ ಬಂಕ್‌, ಚಪ್ಪಲಿ ಅಂಗಡಿ, ಭಿಕ್ಷುಕರಿಂದ ಪಡೆದ ನೋಟುಗಳಲ್ಲಿ ಬ್ಯಾಕ್ಟೀರಿಯಾಗಳು ನೋಟಿಗೆ ತಗುಲುವುದು ಶೇ.100 ಖಚಿತ.