ಹೊಸದಿಲ್ಲಿ: ಕೇಂದ್ರದ ಮಾಜಿ ಸಚಿವ ಶಶಿ ತರೂರ್‌ ಪತ್ನಿ ಸುನಂದಾ ಪುಷ್ಕರ್‌ ಅವರ ಸಾವಿನ ನಿಖರ ಕಾರಣ ಪತ್ತೆ ಹಚ್ಚುವಲ್ಲಿ ಹೊಸ ವೈದ್ಯಕೀಯ ಮಂಡಳಿ ವಿಫಲವಾಗಿದೆ. ಫೆಡರಲ್‌ ತನಿಖಾ ಸಂಸ್ಥೆಯ ಪ್ರಯೋಗಾಲಯ ಮತ್ತು ಅಖಿಲ ಭಾರತ ವೈದ್ಯಕೀಯ ವಿಜ್ಞಾನಗಳ ಮಹಾಸಂಸ್ಥೆ 'ಎಐಐಎಂಎಸ್‌' ಜತೆಗೂಡಿ ನಡೆಸಿದ ಸುನಂದಾ ಸಾವಿನ ತನಿಖೆಯ ವರದಿಯನ್ನು ಪರಿಶೀಲಿಸಿ ಅಂತಿಮ ನಿರ್ಣಯ ಕೈಗೊಳ್ಳಲು ರಚಿಸಲಾಗಿದ್ದ ಹೊಸ ವೈದ್ಯಕೀಯ ಮಂಡಳಿಗೂ ಸುನಂದಾ ಸಾವಿಗೆ ನಿಖರ ಕಾರಣ ಪತ್ತೆ ಹಚ್ಚಲು ವಿಫಲವಾಗಿದೆ.
ಇನ್ನು ಸುನಂದಾ ಸಾವಿನ ಕಾರಣ ತಿಳಿಯಲು ಇರುವ ಏಕೈಕ ಮಾರ್ಗವೆಂದರೆ ಅವರ ಬ್ಲಾಕ್‌ಬೆರ್ರಿ ಮೊಬೈಲ್‌ನಲ್ಲಿ ನಡೆಸಿರುವ ಸಂಭಾಷಣೆಯ ವಿವರ ಮಾತ್ರ. ಈಗ ವಿಶೇಷ ತನಿಖಾ ತಂಡ ಅದರ ವಿವರಕ್ಕಾಗಿ ಕಾಯುತ್ತಿದೆ. ಸುನಂದಾ ಸಾವಿನ ನಂತರ ಬ್ಲಾಕ್‌ಬೆರ್ರಿ ಮೊಬೈಲ್‌ನಲ್ಲಿದ್ದ ಎಲ್ಲಾ ಸಂದೇಶಗಳನ್ನು ಅಳಿಸಿ ಹಾಕಲಾಗಿದೆ. ಈಗ ಅದನ್ನು ಮರಳಿ ಪಡೆಯುವ ಪ್ರಯತ್ನ ನಡೆಯುತ್ತಿದೆ. ಪುಷ್ಕರ್‌ ಬಳಸುತ್ತಿದ್ದ ಲ್ಯಾಪ್‌ಟಾಪ್‌ ಅನ್ನು ಅಹ್ಮದಾಬಾದ್‌ನ ಪ್ರಯೋಗಾಲಯವೊಂದು ಪರಿಶೀಲಿಸುತ್ತಿದ್ದು, ಇದು ನೀಡುವ ವರದಿಗಾಗಿ ವಿಶೇಷ ತನಿಖಾ ತಂಡ ಕಾಯುತ್ತಿದೆ.