ಅಯೋಧ್ಯೆಯಲ್ಲಿ ಭೂಮಿ ಪಡೆವ ಗೊಂದಲ, ಕಾನೂನು ತಜ್ಞರ ಜತೆ ವಕ್ಫ್ ಮಂಡಳಿ ಚರ್ಚೆ

ಲಖನೌ: ಸುಪ್ರೀಂ ಕೋರ್ಟ್‌ ತೀರ್ಪಿನಂತೆ ಅಯೋಧ್ಯೆಯಲ್ಲಿ ಮಸೀದಿ ನಿರ್ಮಾಣಕ್ಕೆ ಕೇಂದ್ರ ಸರಕಾರ ಪರ್ಯಾಯವಾಗಿ ಬೇರೆ ಕಡೆ ನೀಡಲಿರುವ ಐದು ಎಕರೆ ಭೂಮಿಯನ್ನು ಪಡೆದುಕೊಳ್ಳುವ ವಿಚಾರದಲ್ಲಿ ಸುನ್ನಿ ವಕ್ಫ್ ಮಂಡಳಿಯು ಕಾನೂನು ತಜ್ಞರ ಅಭಿಪ್ರಾಯ ಪಡೆದುಕೊಳ್ಳುತ್ತಿದೆ.

ಅಲ್ಲದೇ ಈ ವಿಷಯದಲ್ಲಿಅಖಿಲ ಭಾರತ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿ (ಎಐಎಂಪಿಎಲ್‌ಬಿ) ನೀಡಲಿರುವ ಅಭಿಪ್ರಾಯಕ್ಕೆ ಹೆಚ್ಚಿನ ಮನ್ನಣೆ ನೀಡುವುದಾಗಿ ಮಂಡಳಿ ಹೇಳಿದೆ.

''ಅಯೋಧ್ಯೆಯಲ್ಲಿ ಪರ್ಯಾಯ ಜಾಗದಲ್ಲಿ ಮಸೀದಿ ನಿರ್ಮಾಣಕ್ಕೆ ಸರಕಾರ ನೀಡಲಿರುವ ಐದು ಎಕರೆ ಭೂಮಿಯನ್ನು ಸ್ವೀಕರಿಸುವ ವಿಚಾರದಲ್ಲಿ ವಕ್ಫ್ ಬೋರ್ಡ್‌ ನಲ್ಲಿಯೇ ಗೊಂದಲವಿದೆ. ಒಂದೊಮ್ಮೆ ಭೂಮಿ ನಿರಾಕರಿಸಿದಲ್ಲಿಇದು ಸುಪ್ರೀಂ ತೀರ್ಪು ಉಲ್ಲಂಘಿಸಿದಂತಾಗಿ ನ್ಯಾಯಾಂಗ ನಿಂದನೆಯಾಗುತ್ತದೆಯೇ ಎಂಬ ವಿಚಾರದಲ್ಲಿ ಕಾನೂನು ತಜ್ಞರ ಅಭಿಪ್ರಾಯ ಪಡೆಯಲಾಗುತ್ತಿದೆ. ನವೆಂಬರ್‌ 26ರಂದು ನಡೆಯಲಿರುವ ಸಭೆಯಲ್ಲಿ ಈ ಬಗ್ಗೆ ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು,'' ಎಂದು ಮಂಡಳಿ ಅಧ್ಯಕ್ಷ ಜುಫರ್‌ ಫಾರೂಕಿ ಹೇಳಿದ್ದಾರೆ.

ಅಯೋಧ್ಯೆ ಭೂ ವಿವಾದ ಪ್ರಕರಣದಲ್ಲಿ ಕಕ್ಷಿದಾರರಾಗಿದ್ದ ಜಮಾತೆ ಉಲೇಮಾ-ಇ-ಹಿಂದ್‌(ಜೆಯುಎಚ್‌), ಮಸೀದಿ ನಿರ್ಮಾಣಕ್ಕೆ ಸರಕಾರ ನೀಡಲಿರುವ 5 ಎಕರೆ ಭೂಮಿ ಸ್ವೀಕರಿಸುವುದು ಬೇಡ ಎಂದು ಹೇಳಿದೆ.