ವಿದ್ಯಾರ್ಥಿಗೆ ಐಐಟಿ ಪ್ರವೇಶ ಕೊಡಿಸಿದ ಸುಪ್ರೀಂ ಕೋರ್ಟ್‌

ಹೊಸದಿಲ್ಲಿ: ಐಐಟಿ ಮುಂಬಯಿಯಲ್ಲಿನ ಪ್ರವೇಶ ಪ್ರಕ್ರಿಯೆ ವೇಳೆ ತಪ್ಪಾದ ಲಿಂಕ್‌ ಒತ್ತಿ ಸೀಟು ಕಳೆದುಕೊಂಡಿದ್ದ 18 ವರ್ಷದ ವಿದ್ಯಾರ್ಥಿಗೆ ಮಧ್ಯಂತರ ಪ್ರವೇಶ ನೀಡುವಂತೆ ಸುಪ್ರೀಂ ಕೋರ್ಟ್‌ ಆದೇಶಿಸಿದೆ.

ಆಗ್ರಾದ ಸಿದ್ಧಾರ್ಥ ಬಾತ್ರಾ ಆನ್‌ಲೈನ್‌ ಪ್ರವೇಶ ಪ್ರಕ್ರಿಯೆ ವೇಳೆ ವಿದ್ಯಾರ್ಥಿ ಅವಸರದಲ್ಲಿ ಪ್ರವೇಶ ನಿರಾಕರಿಸುವ ಲಿಂಕ್‌ ಒತ್ತಿದ್ದ. ಹೀಗಾಗಿ ಆತನ ಸೀಟು ರದ್ದಾಗಿತ್ತು. ಆ ನಂತರ ಸಂಸ್ಥೆಯನ್ನು ಭೇಟಿ ಮಾಡಿ ಮನವಿ ಮಾಡಿದರೂ ಪ್ರಯೋಜನವಾಗದ ಕಾರಣ ಮುಂಬಯಿ ಹೈಕೋರ್ಟ್‌ ಮೆಟ್ಟಿಲೇರಿದ್ದ.

''ಐಐಟಿ ಪ್ರವೇಶ ಪ್ರಕ್ರಿಯೆ ಮುಗಿದಿರುವ ಕಾರಣ ಈ ಹಂತದಲ್ಲಿ ಮಧ್ಯಪ್ರವೇಶ ಮಾಡಲು ಸಾಧ್ಯವಿಲ್ಲ,'' ಎಂದು ಹೈಕೋರ್ಟ್‌ ಹೇಳಿತ್ತು. ಛಲ ಬಿಡದ ವಿದ್ಯಾರ್ಥಿ ಸುಪ್ರೀಂ ಕೋರ್ಟ್‌ ಮೊರೆ ಹೋಗಿದ್ದ. ಆತನ ಅಹವಾಲು ಆಲಿಸಿದ ನ್ಯಾ.ಎಸ್‌.ಕೆ. ಕೌಲ್‌ ನೇತೃತ್ವದ ತ್ರಿಸದಸ್ಯ ಪೀಠವು, ವಿದ್ಯಾರ್ಥಿಗೆ ಮಧ್ಯಂತರ ಪ್ರವೇಶ ನೀಡುವಂತೆ ಆದೇಶಿಸಿದೆ.