ಸಲಿಂಗಕಾಮ: ತೀರ್ಪು ಮರುಪರಿಶೀಲಿಸಲು ಸುಪ್ರೀಂ ಸಿದ್ಧ

ಹೊಸದಿಲ್ಲಿ: ಸಲಿಂಗರತಿಯನ್ನು ಅಪರಾಧವೆಂದು ಪರಿಗಣಿಸಿ 2013ರಲ್ಲಿ ನೀಡಿದ್ದ ತನ್ನ ತೀರ್ಪನ್ನು ಮರು ಪರಿಶೀಲನೆ ಮಾಡಲು ಸುಪ್ರೀಂ ಕೋರ್ಟ್‌ ಸೋಮವಾರ ಸಮ್ಮತಿಸಿದೆ.

ಇದೇ ವೇಳೆ, ಸಲಿಂಗಕಾಮವನ್ನು ಅಪರಾಧವೆಂದು ಪರಿಗಣಿಸುವ ಭಾರತೀಯ ದಂಡ ಸಂಹಿತೆ(ಐಪಿಸಿ) ಸಕ್ಷ ನ್‌ 377ರ ಕುರಿತಾಗಿ ಎದ್ದಿರುವ ವಿವಾದಗಳ ಬಗ್ಗೆ ಉನ್ನತ ಪೀಠದಲ್ಲಿ ಚರ್ಚೆ ನಡೆಯಬೇಕು ಎಂದು ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ, ನ್ಯಾಯಮೂರ್ತಿಗಳಾದ ಎಎಂ ಖನ್ವಿಲ್ಕರ್‌ ಹಾಗೂ ಡಿ ವೈ ಚಂದ್ರಚೂಡ್‌ ಅವರನ್ನೊಳಗೊಂಡ ಪೀಠ ಹೇಳಿದೆ.

ಈ ಪ್ರಕರಣವನ್ನು ಹೆಚ್ಚು ಸದಸ್ಯರನ್ನು ಒಳಗೊಂಡ ಉನ್ನತ ಪೀಠದ ವಿಚಾರಣೆಗೆ ಶಿಫಾರಸು ಮಾಡಿದೆ.

ಸಲಿಂಗಕಾಮವನ್ನು ಅಪರಾಧೀಕರಿಸುವ ಐಪಿಸಿ ಸಕ್ಷನ್‌ 377ರ ನಿಯಮಗಳ ಪುನರ್‌ ಪರಿಶೀಲಿಸಬೇಕು ಎಂದು ಕೋರಿ ನವತೇಜ್‌ ಸಿಂಗ್‌ ಜೋಹರ್‌ ಅವರು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ಸೋಮವಾರ ನಡೆಯಿತು.

''ಐಪಿಸಿ ಸಕ್ಷ ನ್‌ 377ರಡಿ ಪರಸ್ಪರ ಸಮ್ಮತಿಯ ಸಲಿಂಗಕಾಮಕ್ಕೂ ಜೈಲಿ ಶಿಕ್ಷೆ ವಿಧಿಸುವುದು ಅಸಂವಿಧಾನಿಕ. ಅಸಹಜ ಲೈಂಗಿಕ ಕ್ರಿಯೆ ಆರೋಪದ ಮೇಲೆ ಇಬ್ಬರು ಯುವಕ ಅಥವಾ ಯುವತಿಯರನ್ನು ನೀವು ಜೈಲಿಗೆ ಕಳುಹಿಸಲು ಸಾಧ್ಯವಿಲ್ಲ,'' ಎಂದು ಜೋಹರ್‌ ಪರ ವಕೀಲ ಅರವಿಂದ್‌ ದಾತರ್‌ ಅವರು ವಾದಿಸಿದರು.

2009ರಲ್ಲಿ ದೆಹಲಿ ಹೈಕೋರ್ಟ್‌ ಸಲಿಂಗಕಾಮವನ್ನು ಕಾನೂನುಬದ್ಧಗೊಳಿಸಿ ನೀಡಿದ್ದ ತೀರ್ಪನ್ನು 2013ರ ಡಿ.11ರಂದು ಅನೂರ್ಜಿಗೊಳಿಸಿದ್ದ ಸುಪ್ರೀಂ ಪೀಠ, ಸಲಿಂಗಕಾಮ ಅಪರಾಧ ಎಂದು ಷರಾ ಬರೆದಿತ್ತು. ಅಲ್ಲದೆ ಸಲಿಂಗಿ ಅಪರಾಧಗಳಿಗೆ ಜೀವಾವಧಿ ಶಿಕ್ಷೆವರೆಗೂ ದಂಡನೆ ವಿಧಿಸಬಹುದೆಂದು ತೀರ್ಪು ನೀಡಿತ್ತು.