ಗುಜರಾತ್ ಉದ್ಯಮಿ 6000 ಕೋಟಿ ಕೊಟ್ಟ ಸುದ್ದಿ ಫೇಕ್

ಅಹಮದಾಬಾದ್: ಪ್ರಧಾನಿಗೆ 4.3 ಕೋಟಿ ರೂ. ಬೆಲೆಯ ಸ್ವರ್ಣ ಖಚಿತ ಸೂಟ್ ನೀಡಿ ಸುದ್ದಿಯಾಗಿದ್ದ ಸೂರತ್ ಉದ್ಯಮಿ, 6000 ಕೋಟಿ ರೂ. ಹಣವನ್ನು ನಗದು ರೂಪದಲ್ಲಿ ಕಟ್ಟಿದ್ದಾರೆ ಎಂಬುದು ಸುಳ್ಳು ಸುದ್ದಿ ಎಂಬುದೀಗ ಸಾಬೀತಾಗಿದೆ.

ಸದ್ದು ಮಾಡಿದ ಸುದ್ದಿ: 6000 ಕೋಟಿ ಸುರಿದ ಸೂರತ್ ವಜ್ರ ವ್ಯಾಪಾರಿ

ಕಾಳಧನದ ವಿರುದ್ಧ ಪ್ರಧಾನಿ ನರೇಂದ್ರ ಮೋದಿ ಸಮರ ಸಾರಿ 500 ಹಾಗೂ 1000 ರೂ. ನೋಟು ನಿಷೇಧಿಸಿರುವ ಹಿನ್ನೆಲೆಯಲ್ಲಿ ಈ ಸೂರತ್‌ನ ವಜ್ರ ವ್ಯಾಪಾರಿಯು 6000 ಕೋಟಿ ರೂ. ಸಹಿತ ಶರಣಾಗಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸೋಮವಾರ ಭಾರಿ ಸುದ್ದಿ ಕೇಳಿಬಂದಿತ್ತು. ವಾಟ್ಸಾಪ್, ಫೇಸ್‌ಬುಕ್‌ಗಳಲ್ಲಿ ಮೋದಿ ವಿರೋಧಿಗಳು ಇದನ್ನು ಶೇರ್ ಮಾಡುತ್ತಿದ್ದರು. ಈ ಹಿನ್ನೆಲೆಯಲ್ಲಿ ಸ್ಪಷ್ಟನೆ ನೀಡಿರುವ ಉದ್ಯಮಿ ಲಾಲ್‌ಜಿ ಪಟೇಲ್, ತಾವು ನಗದು ರೂಪದಲ್ಲಿ ಹಣ ನೀಡಿಲ್ಲ ಎಂದು ಹೇಳಿದ್ದಾರೆ.

ಆದಾಯ ತೆರಿಗೆ ಅಧಿಕಾರಿಗಳು ಕೂಡ ಈ ಸುದ್ದಿಯನ್ನು, ಕೇವಲ ಗಾಳಿ ಸುದ್ದಿ ಎಂದು ತಳ್ಳಿ ಹಾಕಿದ್ದಾರೆ.

ಈ ವಜ್ರ ವ್ಯಾಪಾರಿ ತಮ್ಮ ಕಲ್ಯಾಣ ಕಾರ್ಯಕ್ರಮಗಳ ಮೂಲಕ ಪ್ರತಿ ವರ್ಷ ಸುದ್ದಿಗೆ ಗ್ರಾಸವಾಗುತ್ತಿದ್ದರು. ಪ್ರತಿವರ್ಷ ಅವರು ತಮ್ಮ ನೌಕರರಿಗೆ ದುಬಾರಿ ಗಿಫ್ಟ್‌ಗಳನ್ನೂ ನೀಡಿದ್ದಾರೆ. ಮೊನ್ನೆ ದೀಪಾವಳಿ ಸಂದರ್ಭದಲ್ಲೂ ನೌಕರರಿಗೆ ಕಾರು, ಫ್ಲಾಟುಗಳನ್ನು ಕೊಡುಗೆಯಾಗಿ ನೀಡಿದ್ದರು. ಈ ವರ್ಷ ಅವರು ಹೆಣ್ಣು ಮಕ್ಕಳ ಶಿಕ್ಷಣಕ್ಕಾಗಿ ಬರೋಬ್ಬರಿ 200 ಕೋಟಿ ರೂ. ದಾನ ಮಾಡಿದ್ದರು.