ನಾವು ಕಟ್ಟಿದ್ದು ಐಐಟಿ, ನೀವು ಕಟ್ಟಿದ್ದು ಎಲ್‌ಇಟಿ!: ವಿಶ್ವಸಂಸ್ಥೆಯಲ್ಲಿ ಪಾಕ್‌ಗೆ ಕ್ಲಾಸ್‌ ತೆಗೆದುಕೊಂಡಿದ್ದ ಸುಷ್ಮಾ

2018ರಲ್ಲಿ ನಡೆದ ವಿಶ್ವಸಂಸ್ಥೆಯ ಮಹಾಧಿವೇಶನದಲ್ಲಿ ನೆರೆಯ ಪಾಕಿಸ್ತಾನಕ್ಕೆ ಸುಷ್ಮಾ ಸ್ವರಾಜ್‌ ಕ್ಲಾಸ್‌ ತೆಗೆದುಕೊಂಡಿದ್ದರು. ಅಂದು ಪಾಕ್‌ ಉದ್ದೇಶಿಸಿ ಮಾತನಾಡಿದ ಅವರು ''ಒಂದೇ ದಿನ ಸ್ವತಂತ್ರ ರಾಷ್ಟ್ರಗಳಾಗಿ ಹೊರಹೊಮ್ಮಿದವರು ನಾವು.

ಈಗ ನಾವೆಲ್ಲಿದ್ದೇವೆ, ನೀವೆಲ್ಲಿದ್ದೀರಿ ಅಂತ ಒಮ್ಮೆ ಆತ್ಮಾವಲೋಕನ ಮಾಡಿಕೊಳ್ಳಿ ಸಾಕು. ನಿಮ್ಮ ಸ್ಥಿತಿ ನಿಮಗೇ ಅರ್ಥವಾಗುತ್ತದೆ,'' ಎಂದು ತಿವಿದಿದ್ದರು. ''ನಾವು ಶಿಕ್ಷಣತಜ್ಞರನ್ನು, ಡಾಕ್ಟರ್‌ಗಳನ್ನು, ಎಂಜಿನಿಯರ್‌ಗಳನ್ನು ಸೃಷ್ಟಿಸಿದೆವು, ನೀವು ಮಾಡಿದ್ದೇನು, ಭಯೋತ್ಪಾದಕರನ್ನು ಸೃಷ್ಟಿಸಿದ್ದಲ್ಲವೇ?. ಭಾರತ ಇವತ್ತು ಜಗತ್ತಿನ ಸೂಪರ್‌ ಪವರ್‌. ಆದರೆ, ನೀವು ಭಯೋತ್ಪಾದನೆ ಬಿಟ್ಟರೆ ಬೇರೇನು ಮಾಡಿದ್ದೀರಿ?, ನಾವು ಬಡತನದ ವಿರುದ್ಧ , ಆರ್ಥಿಕ ಸ್ವಾವಲಂಬನೆಗೆ ಹೋರಾಡಿದರೆ ಪಾಕಿಸ್ತಾನಕ್ಕೆ ನಮ್ಮ ವಿರುದ್ಧ ಸಂಚು ಮಾಡುವುದು ಬಿಟ್ಟರೆ ಬೇರೆ ಕೆಲಸವನ್ನೇ ಮಾಡಲಿಲ್ಲ. ನಾವು ಐಐಟಿ ಕಟ್ಟಿದ್ದರೆ, ನೀವು ಕಟ್ಟಿದ್ದು ಎಲ್‌ಇಟಿ,'' ಎಂಬ ಸುಷ್ಮಾ ಸ್ವರಾಜ್‌ ಅವರ ಮೊನಚು ಮಾತುಗಳಿಗೆ ಪಾಕ್‌ ಬಳಿ ಉತ್ತರವೇ ಇರಲಿಲ್ಲ.