ಸುಷ್ಮಾ ಸ್ವರಾಜ್ ಭಾರತದ ಅತ್ಯಾಪ್ತ ರಾಜಕಾರಣಿ

ಹೊಸದಿಲ್ಲಿ: ಆ ನಗು, ಪ್ರೀತ್ಯಾದರ ತೋರುವ ಸುಷ್ಮಾ ಸ್ವರಾಜ್‌ ಮಾತೃ ಹೃದಯಿ. ಎಲ್ಲರಿಗೂ ಆಪ್ತರೆನ್ನಿಸುವ ವ್ಯಕ್ತಿತ್ವ. ಅವರು ವಿದೇಶಾಂಗ ಸಚಿವರಾದ ಮೇಲಂತೂ, ಮೈಕ್ರೋ ಬ್ಲಾಗಿಂಗ್ ಟ್ವೀಟರ್ ಮೂಲಕ ಕಷ್ಟದಲ್ಲಿರುವವರ ನೋವಿಗೆ ಸ್ಪಂದಿಸೋ ರೀತಿ ಎಲ್ಲರಿಗೂ ಮಾದರಿ. ಈ ಕಾರಣದಿಂದಲೇ 'ವಿಶ್ವದ ಅತಿ ದೊಡ್ಡ ಪ್ರಜಾಪ್ರಭುತ್ವ' ಭಾರತದ ಅತ್ಯಾಪ್ತ ರಾಜಕಾರಣಿ ಎಂಬ ಕೀರ್ತಿಗೆ ಸುಷ್ಮಾ ಭಾಜನರಾಗಿದ್ದಾರೆ.

ಅಮೆರಿಕದ 'ವಾಲ್ ಸ್ಟ್ರೀಟ್ ಜರ್ನಲ್' ಸುಷ್ಮಾರಿಗೆ ಇಂಥದ್ದೊಂದು ಬಿರುದು ನೀಡಿದ್ದು, ವಿದೇಶದಲ್ಲಿ ಸಿಕ್ಕಿಹಾಕಿಕೊಂಡಿರುವ ಭಾರತೀಯರ ನೆರವಿಗೆ ಧಾವಿಸುವ ಅವರ ಕಾರ್ಯವೈಖರಿಯನ್ನು ಬಣ್ಣಿಸಲಾಗಿದೆ.

ಸ್ಟ್ಯಾನ್‌ಫೋರ್ಡ್ ವಿವಿಯ ಹೂವರ್ ಸಂಸ್ಥೆಯ ಸಂಶೋಧಕರಾದ ಟುಂಕು ವರದರಾಜನ್ ಎಂಬುವವರು ಬರೆದ ಲೇಖನವೊಂದನ್ನು ಪತ್ರಿಕೆ ಪ್ರಕಟಿಸಿದ್ದು, 'ವಿದೇಶ ಮತ್ತು ಭದ್ರತಾ ನೀತಿ ಮೇಲೆ ವೈಯಕ್ತಿಕ ನಿಯಂತ್ರಣ ಸಾಧಿಸಲು ಪ್ರಧಾನಿ ನರೇಂದ್ರ ಮೋದಿ ಮುಂದಾದ ನಂತರ ತಮಗೆ ತಾವೇ ಸವಾಲು ಹಾಕಿಕೊಂಡ 65 ವರ್ಷದ ಸುಷ್ಮಾ, ವಿದೇಶದಲ್ಲಿ ಸಿಲುಕಿದ ಭಾರತೀಯರ ರಕ್ಷಣೆಗೆ ಮುಂದಾದರು, ' ಎಂದೂ ಉಲ್ಲೇಖಿಸಲಾಗಿದೆ.

'86 ಲಕ್ಷಕ್ಕಿಂತಲೂ ಹೆಚ್ಚು ಟ್ವೀಟರ್ ಫಾಲೋಯರ್ಸ್ ಹೊಂದಿರುವ ಸುಷ್ಮಾ ಅತಿ ಹೆಚ್ಚು ಟ್ವೀಟ್ ಪಾಲೋಯರ್ಸ್ ಹೊಂದಿರುವ 10 ರಾಜಕಾರಣಿಗಳಲ್ಲೊಬ್ಬರು. ಅವರ ಬಹುತೇಕ ಟ್ವೀಟ್‌ಗಳು ಸಂಕಷ್ಟದಲ್ಲಿರುವ ಭಾರತೀಯರ ನೆರವಿಗೆ ಸೂಚಿಸಿದ್ದಾಗಿರುತ್ತವೆ,' ಎಂದ ಲೇಖಕರು ಹೇಳಿದ್ದಾರೆ.

'ಭಾರತ-ಪಾಕಿಸ್ತಾನದ ಸಂಬಂಧ ಹದಗೆಟ್ಟಿದ್ದರೂ, ನೆರವಿಗಾಗಿ ಕೋರಿ ಅನೇಕ ಪಾಕಿಸ್ತಾನಿಯರು ಸುಷ್ಮಾಗೆ ಟ್ವೀಟ್ ಮಾಡುತ್ತಾರೆ. ಅದರಲ್ಲಿಯೂ ಪಾಕಿಸ್ತಾನದಲ್ಲಿ ವಿಶೇಷ ತಂತ್ರಜ್ಞಾನದ ವ್ಯವಸ್ಥೆಯುಳ್ಳ ಆಸ್ಪತ್ರೆಗಳ ಕೊರತೆಯಿದ್ದು, ಚಿಕಿತ್ಸೆ ದುಬಾರಿಯಾಗಿರುವುದರಿಂದ ನೆರವು ಕೋರಿ ಸುಷ್ಮಾಗೆ ಟ್ವೀಟ್ ಮಾಡಲಾಗುತ್ತದೆ. ಅದಕ್ಕವರು ಪ್ರತಿಕ್ರಿಯೆ ನೀಡಿ, ಅಗತ್ಯ ಕ್ರಮ ಕೈಗೊಳ್ಳುತ್ತಾರೆ,' ಎಂದು ಭಾರತೀಯ ಸಚಿವೆಯನ್ನು ಅಮೆರಿಕದ ಪತ್ರಿಕೆಯ ಲೇಖನ ಶ್ಲಾಘಿಸಿದೆ.

Sushma best loved politician

An editorial piece in The Wall Street Journal called Indian Minister of External Affairs Sushma Swaraj "India’s Best-Loved Politician" in the world’s biggest democracy.