ಸ್ವಾತಿ ಕೊಲೆ: ಮೊಬೈಲ್ ಸ್ವಿಚ್ ಆನ್ ಮಾಡಿದ್ದ ಆರೋಪಿ

ಚೆನ್ನೈ: ಪ್ರತಿಯೊಬ್ಬ ಅಪರಾಧಿಯೂ ಏನಾದರೊಂದು ಯಡವಟ್ಟು ಮಾಡಿಯೇ ಮಾಡುತ್ತಾನೆಂಬುವುದು ಇನ್ಫಿ ಟೆಕ್ಕಿ ಎಸ್.ಸ್ವಾತಿ ಕೊಲೆ ಆರೋಪಿಗೂ ಅನ್ವಯಿಸುತ್ತದೆ. ಕೊಲೆ ಮಾಡಿದ ನಂತರ ಸ್ವಾತಿ ಮೊಬೈಲ್ ಕೊಂಡೋಯ್ದಿದ್ದ ಪಿ.ರಾಮ್‌ಕುಮಾರ್ ಕೃತ್ಯವೆಸಗಿದ ಕೆಲವು ಗಂಟೆಗಳ ನಂತರ ಮೊಬೈಲ್ ಸ್ವಿಚ್ ಆನ್ ಮಾಡಿ, ಆಫ್ ಮಾಡಿದ್ದಾನೆ. ಇದರಿಂದಲೇ ಪೊಲೀಸರಿಗೆ ಆರೋಪಿಯ ಇರುವಿಕೆಯನ್ನು ಪತ್ತೆ ಹಚ್ಚಲು ಸಾಧ್ಯವಾಯಿತು.

ನುಂಗುಂಬಕಂ ರೈಲ್ವೆ ಸ್ಟೇಷನ್‌ನಲ್ಲಿ ಜೂನ್ 24ರಂದು ಸ್ವಾತಿ ಹತ್ಯೆಗೈದ ನಂತರ ಚೂಲೈಮೆಡುವಿನಲ್ಲಿ ಅಡಗಿದ್ದ ರವಿಕುಮಾರ್‌ನನ್ನು ಪೊಲೀಸರು ಮೊಬೈಲ್ ಮೂಲಕವೇ ಪತ್ತೆ ಹಚ್ಚಿದ್ದಾರೆ. ಆತ ಕೆಲವೇ ಕೆಲವು ಸೆಕೆಂಡ್‌ಗಳ ಪೋನ್ ಸ್ವಿಚ್ ಆನ್ ಮಾಡಿದ್ದ.

ಮೊದಲು ಸರಕಾರಿ ರೈಲ್ವೆ ಪೊಲೀಸರ ಆರೋಪಿಗಾಗಿ ಶೋಧ ನಡೆಸಿದರು. ನಂತರ ನಗರ ಪೊಲೀಸರು ಸಿಸಿಟಿವಿಯಲ್ಲಿ ಸೆರೆಯಾದ ದೃಶ್ಯಾವಳಿಯನ್ನಿಟ್ಟುಕೊಂಡು ಸೌರಾಷ್ಟ್ರ ನಗರ ಪ್ರದೇಶದಲ್ಲಿ ಆರೋಪಿಗಾಗಿ ಶೋಧಿಸಿದರು. ವಾಚ್‌ಮನ್ ಒಬ್ಬ ರವಿಕುಮಾರ್‌ನನ್ನು ಪತ್ತೆ ಹಚ್ಚಿದ್ದರಿಂದ ಪೊಲೀಸರಿಗೆ ಅನುಕೂಲವಾಯಿತು.