ಟೀಚರ್‌ ದಂಡಿಸಿದರೆ ಆತ್ಮಹತ್ಯೆಗೆ ಕುಮ್ಮಕ್ಕು ಅಲ್ಲ: ಹೈಕೋರ್ಟ್‌

ಜಬಲ್ಪುರ/ಭೋಫಾಲ್‌: ಶಿಸ್ತು ಉಲ್ಲಂಘನೆಗಾಗಿ ಶಿಕ್ಷಕರು ವಿದ್ಯಾರ್ಥಿಗಳನ್ನು ದಂಡಿಸಿದರೆ ಅದು ಆತ್ಮಹತ್ಯೆ ಮಾಡಲು ಕುಮ್ಮಕ್ಕು ನೀಡಿದಂತಾಗುವುದಿಲ್ಲ ಎಂದು ಮಧ್ಯಪ್ರದೇಶ ಹೈಕೋರ್ಟ್‌ ಹೇಳಿದೆ.

ಅನುಪುರ್‌ ಜಿಲ್ಲೆಯಲ್ಲಿ ಕಳೆದ ನವೆಂಬರ್‌ನಲ್ಲಿ ಹತ್ತನೇ ತರಗತಿಯ ವಿದ್ಯಾರ್ಥಿನಿ ಆತ್ಮಹತ್ಯೆ ಮಾಡಿಕೊಂಡಿದ್ದ ಪ್ರಕರಣದಲ್ಲಿ ಆತ್ಮಹತ್ಯೆಗೆ ಶಾಲೆಯ ಪ್ರಿನ್ಸಿಪಾಲ್‌ ಹೊಡೆದಿರುವುದೇ ಕಾರಣ ಎಂದು ವಿದ್ಯಾರ್ಥಿನಿಯ ಸಂಬಂಧಿ ಪ್ರಕರಣ ದಾಖಲಿಸಿದ್ದರು. ಪರಿಶೀಲಿಸಿದ ನ್ಯಾಯಾಲಯ ಆ ಪ್ರಕರಣವನ್ನು ವಜಾಗೊಳಿಸಿದೆ.

ಮಕ್ಕಳು ಶಾಲೆಯಲ್ಲಿರುವಾಗ ಶಿಕ್ಷಕರೇ ಪೋಷಕರ ಸ್ಥಾನದಲ್ಲಿರುತ್ತಾರೆ. ಪೋಷಕರು ಬಯಸುವಂತೆಯೇ ಶಿಕ್ಷಕರು ಕೂಡ ಮಕ್ಕಳು ಶಿಸ್ತುಬದ್ಧವಗಿ, ಉತ್ತಮ ನಡೆಯನ್ನು ಪಾಲಿಸಬೇಕು ಎಂದು ನಿರೀಕ್ಷಿಸುತ್ತಾರೆ. ಅವರನ್ನು ಸರಿದಾರಿಗೆ ತರುವ ಪ್ರಯತ್ನ ನಡೆಸುತ್ತಾರೆ ಎಂದು ನ್ಯಾಯಮೂರ್ತಿ ಅತುಲ್‌ ಶ್ರೀಧರನ್‌ ಆದೇಶದಲ್ಲಿ ತಿಳಿಸಿದ್ದಾರೆ.

ತರಗತಿ ಮುಗಿಯುವ ಮೊದಲೇ ಇಬ್ಬರು ಸ್ನೇಹಿತರ ಜತೆ ವಿದ್ಯಾರ್ಥಿನಿಯನ್ನು ನೋಡಿದ್ದ ಪ್ರಿನ್ಸಿಪಾಲ್‌ ಆರ್‌.ಕೆ. ಮಿಶ್ರಾ ಅವರು ಹೊಡೆದಿದ್ದರು. ಇದರಿಂದಾಗಿ ಆಕೆ ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ಪ್ರಕರಣ ದಾಖಲಾಗಿತ್ತು.