'ಕಿಸ್' ಬೇಡ ಎಂದಿದ್ದಕ್ಕೆ ಶಾಲಾ ಬಾಲಕಿಯನ್ನು ಕೊಂದೇ ಬಿಟ್ಟ!

ಜಬಲ್ಪುರ: 12ನೇ ತರಗತಿಯಲ್ಲಿ ಓದುತ್ತಿದ್ದ ಬಾಲಕಿಗೆ ಮುತ್ತು ಕೊಡಲು ಪ್ರಯತ್ನಿಸಿದ ಹದಿಹರೆಯದ ಯುವಕನೋರ್ವ , ಆಕೆ ವಿರೋಧಿಸಿದ್ದಕ್ಕೆ ಕೋಪಗೊಂಡು ಕೊಂದೇ ಹಾಕಿದ ಬೆಚ್ಚಿ ಬೀಳಿಸುವ ಘಟನೆ ಮಧ್ಯ ಪ್ರದೇಶದಲ್ಲಿ ನಡೆದಿದೆ.

ಸೆಪ್ಟೆಂಬರ್ 5 ರಂದು ಈ ಹೇಯ ಘಟನೆ ನಡೆದಿದ್ದು, ಶನಿವಾರ ಆರೋಪಿಯನ್ನು ಬಂಧಿಸಲಾಗಿದೆ.

ಬಿಜಾಪುರಿ ಗ್ರಾಮದ ಅರಣ್ಯದಲ್ಲಿ ವಿದ್ಯಾರ್ಥಿನಿಯ ಮೃತ ದೇಹ ಪತ್ತೆಯಾಗಿದ್ದು ಆಕೆಯನ್ನು ಪಿಂಕಿ ಧುರ್ವೆ (18) ಎಂದು ಗುರುತಿಸಲಾಗಿದೆ. ಕುಟರಗೊಂಡಿ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ವಾಸಿಸುತ್ತಿದ್ದ ಬಾಲಕಿ ಗುರುವಾರ ಮುಂಜಾನೆ ಮನೆಯಿಂದ ಶಾಲೆಗೆ ಹೊರಟವಳು ಮರಳಿರಲಿಲ್ಲ.

ಆಕೆಯ ಪತ್ತೆಗೆ ಬಲೆ ಬೀಸಿದ ಪೊಲೀಸರಿಗೆ ಸಂಬಂಧಿಕರಿಂದ ಮತ್ತು ಸ್ನೇಹಿತರಿಂದ ರಮಣ್ ಸಿಂಗ್ ಸಯ್ಯಮ್ (19) ಎಂಬಾತ ಆಕೆಯೊಂದಿಗೆ ಆಪ್ತ ಒಡನಾಟ ಇಟ್ಟಕೊಂಡಿದ್ದ ಎಂದು ತಿಳಿದುಬಂದಿದೆ. ಆತನನ್ನು ವಶಕ್ಕೆ ಪಡೆದ ಪೊಲೀಸರು ವಿಚಾರಣೆಗೊಳಪಡಿಸಿದಾಗ ಪ್ರಕರಣ ಬಯಲಿಗೆ ಬಂದಿದೆ.

ನಾವಿಬ್ಬರು ಆತ್ಮೀಯ ಸ್ನೇಹಿತರಾಗಿದ್ದು, ಶಾಲೆ ಮುಗಿದ ಬಳಿಕ ಹತ್ತಿರದ ಕಾಡಿಗೆ ಹೋಗಿ ಕಲ್ಲೊಂದರ ಮೇಲೆ ಕುಳಿತಿದ್ದೆವು. ನಾನಾಕೆಗೆ ಮುತ್ತು ಕೊಡಲು ಯತ್ನಿಸಿದೆ. ಆದರೆ ಪಿಂಕಿ ನನ್ನನ್ನು ದೂರ ತಳ್ಳಿದಳು. ಸಿಟ್ಟಲ್ಲಿ ನಾನು ಕೂಡ ಆಕೆಯನ್ನು ತಳ್ಳಿದ್ದು ಕಲ್ಲ ಮೇಲೆ ಬಿದ್ದ ಆಕೆ ಅಲ್ಲಿಯೇ ಸಾವನ್ನಪ್ಪಿದ್ದಾಳೆ. ಆಕಸ್ಮಿಕವಾಗಿ ಆದ ಅನಾಹುತದಿಂದ ಹೆದರಿದ ನಾನು ಎಲೆಗಳಿಂದ ಆಕೆಯನ್ನು ಮುಚ್ಚಿ ಅಲ್ಲಿಂದ ಪರಾರಿಯಾದೆ, ಎಂದಾತ ಹೇಳಿದ್ದಾನೆ.

ಆರೋಪಿಯನ್ನು ಬಂಧಿಸಲಾಗಿದ್ದು, ಐಪಿಸಿ ಸೆಕ್ಷನ್ 302( ಹತ್ಯೆ) ಅಡಿಯಲ್ಲಿ ದೂರು ದಾಖಲಿಸಲಾಗಿದೆ.