‘ ತೆಲಂಗಾಣ ವೀರಪ್ಪನ್‌ ’ ಪೊಲೀಸರ ಬಲೆಗೆ

ಹೈದರಾಬಾದ್‌ : ಆಂಧ್ರಪ್ರದೇಶ, ತೆಲಂಗಾಣ, ಛತ್ತೀಸ್‌ಗಢ ಮತ್ತು ಮಹಾರಾಷ್ಟ್ರದ ಕಾಡುಗಳಲ್ಲಿ ಮರಗಳ ಕಳ್ಳಸಾಗಣೆ ಜಾಲ ನಿರ್ಮಿಸಿ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ದುಸ್ವಪ್ನವಾಗಿದ್ದ 'ತೆಲಂಗಾಣ ವೀರಪ್ಪನ್‌' ಅಲಿಯಾಸ್‌ ಯೆಡ್ಲಾ ಶ್ರೀನು ಪೊಲೀಸರ ಬಲೆಗೆ ಬಿದ್ದಿದ್ದಾನೆ.

ಈತನ ಪೂರ್ಣ ಹೆಸರು ಪೋಥಾರಂ ಶ್ರೀನಿವಾಸ್‌. ತೆಲಂಗಾಣದ ಪೆದ್ದಪ್ಪಲ್ಲಿ ಜಿಲ್ಲೆಯ ಮಹಾಮುತ್ತಾರಂ ಗ್ರಾಮ ಈತನ ಮೂಲ. 1999ರಲ್ಲಿ ರಸಗೊಬ್ಬರ ವ್ಯಾಪಾರ ಆರಂಭಿಸಿ ಭಾರಿ ನಷ್ಟವನ್ನು ಶ್ರೀನಿವಾಸ್‌ ಅನುಭವಿಸಿದ್ದ. ಬಳಿಕ ಸಣ್ಣಮಟ್ಟದಲ್ಲಿ ಟಿಂಬರ್‌ ವ್ಯಾಪಾರ ಆರಂಭಿಸಿದ ಈತ, ಕಾಡಿನಲ್ಲಿನ ಮರಗಳ ಕಳ್ಳ ಸಾಗಣೆಯಲ್ಲಿ ನುರಿತನಾದ.

2009ರ ವೇಳೆಗೆ ಕಳ್ಳ ಸಾಗಣೆಯ ಬೃಹತ್‌ ಜಾಲವನ್ನು ಈತ ಸ್ಥಾಪಿಸಿದ್ದ. ಪೊಲೀಸರ ಕಣ್ಣುತಪ್ಪಿಸಲು ಗ್ರಾಮಸ್ಥರಿಗೆ ಆಮಿಷವೊಡ್ಡಿ ಅವರ ಎತ್ತಿನಗಾಡಿಯಲ್ಲಿ ಕದ್ದ ಮರಗಳನ್ನು ಸಾಗಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಾಡಿನಲ್ಲಿ ತನ್ನ ಜಾಲದ ಮೂಲಕ ಮರ ಕಡಿಯುವುದನ್ನು ಪೊಲೀಸರಿಗೆ ತಿಳಿಸಿದರೆ ಜೀವ ತೆಗೆಯುವುದಾಗಿ ಗ್ರಾಮಸ್ಥರನ್ನು ಬೆದರಿಸಿ, ತನ್ನ ಜಾಲಕ್ಕೆ ಸೇರಿಸಿಕೊಳ್ಳುತ್ತಿದ್ದ. ಶ್ರೀನಿವಾಸ್‌ ವಿರುದ್ಧ 20ಕ್ಕೂ ಹೆಚ್ಚಿನ ಪ್ರಕರಣಗಳಿವೆ ಎಂದು ಪೊಲೀಸರು ಹೇಳಿದ್ದಾರೆ.