ವಿಧಾನಸಭೆಯೊಳಗೆ ಪ್ರವೇಶ ಯತ್ನ: ಸ್ಟಾಲಿನ್‌ ವಿಫಲ

ಚೆನ್ನೈ : ತಮಿಳುನಾಡು ವಿಧಾನಸಭೆಯಿಂದ ಬುಧವಾರ ಅಮಾನತುಗೊಂಡಿರುವ ಡಿಎಂಕೆ ಶಾಸಕ ಎಂ.ಕೆ.ಸ್ಟಾಲಿನ್‌ ಅವರು ಗುರುವಾರ ವಿಧಾನಸಭೆ ಪ್ರವೇಶಿಸುವ ಪ್ರಯತ್ನ ನಡೆಸಿ ವಿಫಲರಾದರು.

ವಿಧಾನಸಭೆಯ ಹೊರಗೆ ಹೆಚ್ಚಿನ ಸಂಖ್ಯೆಯಲ್ಲಿ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು. ಬಾಗಿಲನ್ನು ಲಾಕ್‌ ಮಾಡಲಾಗಿತ್ತು. ಹೀಗಾಗಿ ಸ್ಟಾಲಿನ್‌ ಒಳಗೆ ಹೋಗಲು ಮಾಡಿದ ಪ್ರಯತ್ನ ವಿಫಲವಾಯಿತು. ಸಿಬ್ಬಂದಿ ಜತೆ ವಾಗ್ವಾದ ನಡೆಸಿದ ಡಿಎಂಕೆ ಶಾಸಕರು ವಿಧಾನಸಭೆಯ ಹೊರಗೆ ಕುಳಿತು ಧರಣಿ ನಡೆಸಿದರು.

ವಿಧಾನಸಭೆಯಲ್ಲಿ ಡಿಎಂಕೆ ಸದಸ್ಯರು ಬುಧವಾಗ ಕೋಲಾಹಲ ಗದ್ದಲ ನಡೆಸಿದ್ದರಿಂದ ಸ್ಪೀಕರ್‌ ಸ್ಟಾಲಿನ್‌ ಸಹಿತ ಡಿಎಂಕೆಯ 80 ಶಾಸಕರನ್ನು ಅಲ್ಲಿಂದ ತೆರವುಗೊಳಿಸುವಂತೆ ಮಾರ್ಷಲ್‌ಗಳಿಗೆ ಆದೇಶಿಸಿದ ಬಳಿಕ ವಾರದ ಮಟ್ಟಿಗೆ ಅಮಾನತುಗೊಳಿಸಿದ್ದರು.