ಗೌರಿ ಹತ್ಯೆಗೆ ಆರೆಸ್ಸೆಸ್‌ ಸಂಬಂಧ ಕಲ್ಪಿಸಿದ ಆರೋಪ: ರಾಹುಲ್‌, ಯೆಚೂರಿಗೆ ಕೋರ್ಟ್‌ ಸಮನ್ಸ್‌

ಠಾಣೆ: ಪತ್ರಕರ್ತೆ ಗೌರಿ ಲಂಕೇಶ್‌ ಹತ್ಯೆ ಪ್ರಕರಣಕ್ಕೆ ಆರೆಸ್ಸೆಸ್‌ ಜತೆ ಸಂಬಂಧ ಕಲ್ಪಿಸಿದ್ದನ್ನು ಆಕ್ಷೇಪಿಸಿ ಸಲ್ಲಿಸಲಾದ ಮಾನನಷ್ಟ ಮೊಕದ್ದಮೆ ಪ್ರಕರಣ ಸಂಬಂಧ ಠಾಣೆ ಕೋರ್ಟ್‌ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಮತ್ತು ಸಿಪಿಐ ನಾಯಕ ಸೀತಾರಾಮ್‌ ಯೆಚೂರಿ ಅವರಿಗೆ ಸಮನ್ಸ್‌ ನೀಡಿದೆ.

ಆರೆಸ್ಸೆಸ್‌ನ ವಿವೇಕ್‌ ಚಂಪನೇರ್ಕರ್‌ ಅವರು ವಕೀಲ ಆದಿತ್ಯ ಮಿಶ್ರಾ ಅವರ ಮೂಲಕ ಸಲ್ಲಿಸಿದ ದಾವೆ ಇದಾಗಿದ್ದು, ಏಪ್ರಿಲ್‌ 30ರಂದು ಹಾಜರಿರುವಂತೆ ಸೂಚಿಸಲಾಗಿದೆ.

''ಬಿಜೆಪಿ ಮತ್ತು ಆರೆಸ್ಸೆಸ್‌ ಸಿದ್ಧಾಂತಗಳ ವಿರುದ್ಧ ಮಾತನಾಡುವ ಯಾರೇ ಆಗಲಿ ಅವರ ಮೇಲೆ ಒತ್ತಡ ಹೇರಲಾಗುತ್ತದೆ, ದಾಳಿ ಮಾಡಲಾಗುತ್ತದೆ, ಮಾತ್ರವಲ್ಲ, ಕೆಲವೊಮ್ಮೆ ಕೊಲ್ಲಲಾಗುತ್ತದೆ,'' ಎಂದು ರಾಹುಲ್‌ ಗಾಂಧಿ ಹೇಳಿದ್ದರೆ, ಯೆಚೂರಿ ಕೂಡಾ ಇಂತಹುದೇ ಮಾತು ಆಡಿದ್ದರು.