ಪೊಲೀಸರ 'ಹಫ್ತಾ' ಬಯಲಿಗೆಳೆದ ಪಾನ್‌ವಾಲಾನ ಡೈರಿ!

ಮುಂಬಯಿ: ಪಾನ್‌ ಅಂಗಡಿ ಮಾಲೀಕ ಪೊಲೀಸರಿಗೆ ನೀಡುತ್ತಿದ್ದ 'ಮಾಮೂಲಿ'ಯ ಮಾಹಿತಿಯಿರುವ ಡೈರಿಯೊಂದರ ಹಾಳೆ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಸದ್ದು ಮಾಡಿದ್ದು, ಇದೀಗ ಹಫ್ತಾ ಡೈರಿ ಕುರಿತು ತನಿಖೆಗೆ ಆದೇಶಿಸಲಾಗಿದೆ.

ನಾಗಪದದಲ್ಲಿ ರಸ್ತೆ ಬದಿಯಿರುವ ಪಾನ್‌ ಅಂಗಡಿಯವರು ನಾಗಪದ ಪೊಲೀಸ್‌ ಠಾಣೆಯ ಕಾನ್‌ಸ್ಟೇಬಲ್‌ಗಳಿಗೆ ಪ್ರತಿ ವಾರ ನೀಡುವ ಹಫ್ತಾ ಕುರಿತು ಡೈಲಿಯಲ್ಲಿ ನಮೂದಿಸಿಕೊಂಡಿದ್ದಾರೆ. ಪ್ರತೀ ವಾರ ಬರುವ ಹಫ್ತಾ ವಸೂಲು ಮಾಡುವ ಕಾನ್‌ಸ್ಟೇಬಲ್‌ ಅವರ ನಂಬರ್‌ ಕೂಡಾ ದಾಖಲಾಗಿದೆ. ಹೀಗೆ ಪೊಲೀಸರಿಗೆ ಹಫ್ತಾ ನೀಡಿ ರಸ್ತೆ ಬದಿ ವ್ಯಾಪಾರ ಮಾಡುವ ಪಾನ್‌ ಅಂಗಡಿಯವರು ಭಯವಿಲ್ಲದೆ ಗಾಂಜಾ, ಚರಸ್, ಭಾಂಗ್‌ ಮಾರಾಟ ಮಾಡುತ್ತಾರೆ ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಹಫ್ತಾ ಡೈರಿ ನಾಗಪದ ಪೊಲೀಸ್‌ ಠಾಣೆಯ ಕಾನ್‌ಸ್ಟೇಬಲ್‌ ಒಬ್ಬರಿಗೆ ಸಂಬಂಧಿಸಿದೆ. ತಡರಾತ್ರಿವರೆಗೂ ಪಾನ್ ಮಾರಾಟಗಾರರಿಗೆ ಕಾವಲು ನೀಡಲು ಈ ಕಾನ್‌ಸ್ಟೇಬಲ್‌ ಹಫ್ತಾ ಪಡೆಯುತ್ತಿದ್ದರು ಎಂದು ಪೊಲೀಸರು ತಿಳಿಸಿದರು.

ಮಾಹಿತಿಗಳ ಪ್ರಕಾರ ಪೊಲೀಸರು ಮತ್ತೊಂದು ಡೈರಿಯನ್ನೂ ವಶಕ್ಕೆ ಪಡೆದುಕೊಂಡಿದ್ದು, ಈ ಡೈರಿಯಲ್ಲಿ ಪಾನ್‌ಶಾಪ್‌ ಮಾಲೀಕನಿಗೆ ಲೈಸೆನ್ಸ್‌ ಇಲ್ಲದೇ ಅಂಗಡಿ ನಡೆಸಲು ಅನುವು ಮಾಡಿರುವುದರ ಕುರಿತು ದಾಖಲೆಯಿದೆ. ಅಲ್ಲದೇ ಪ್ರತೀ ವಾರ ಈ ವ್ಯಕ್ತಿ 300-500 ರೂ ಪೊಲೀಸರಿಗೆ ನೀಡುತ್ತಿರುವ ಕುರಿತು ಮಾಹಿತಿಯಿದೆ ಎನ್ನಲಾಗಿದೆ.

ನಾನು ಈ ಡೈರಿಯ ಪ್ರತಿಯನ್ನು ಇನ್ನೂ ಗಮನಿಸಿಲ್ಲ, ಕೆಲ ದಿನಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಕೆಲ ಪುಟಗಳನ್ನಷ್ಟೇ ಗಮನಿಸಿದ್ದೇನೆ. ಈ ವರೆಗೆ ಯಾರೊಬ್ಬರೂ ಈ ಡೈರಿ ಅಥವಾ ಹಫ್ತಾ ಕುರಿತು ಪೊಲೀಸರಿಗೆ ದೂರು ನೀಡಿಲ್ಲ ಎಂದು ಪೊಲೀಸ್ ಆಯುಕ್ತ, ಅಖಿಲೇಶ್ ಕುಮಾರ್ ಸಿಂಗ್ ಹೇಳಿದ್ದಾರೆ.