ಪ್ರಧಾನಿ ಉಡುಗೊರೆಗಳ ಇ-ಹರಾಜಿಗೆ ತೆರೆ

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಉಡುಗೊರೆಯಾಗಿ ಬಂದ ವಸ್ತುಗಳ ಪ್ರದರ್ಶನ ಮತ್ತು ಇ-ಹರಾಜು ಪ್ರಕ್ರಿಯೆಗೆ ಶುಕ್ರವಾರ ತೆರೆ ಬಿದ್ದಿದೆ. ಸುಮಾರು ಒಂದೂವರೆ ತಿಂಗಳಿಂದ ನಡೆದ ಈ ಪ್ರಕ್ರಿಯೆಯಲ್ಲಿ ಮೋದಿ ಮತ್ತು ಮಹಾತ್ಮ ಗಾಂಧಿ ಅವರ ವರ್ಣಚಿತ್ರಗಳು ಗರಿಷ್ಠ 25 ಲಕ್ಷ ರೂ.ಗೆ ಹರಾಜಾಗಿವೆ.

ಬಾಲಿವುಡ್‌ ನಟರಾದ ಅನಿಲ್‌ ಕಪೂರ್‌, ಅರ್ಜುನ್‌ ಕಪೂರ್‌, ಗಾಯಕ ಕೈಲಾಶ್‌ ಕೇರ್‌ ಸೇರಿದಂತೆ ಪ್ರಮುಖ ಸೆಲೆಬ್ರಿಟಿಗಳು, ರಾಜಕಾರಣಿಗಳು ಉಡುಗೊರೆಗಳನ್ನು ಹರಾಜಿನ ಮೂಲಕ ಖರೀದಿಸಿದ್ದಾರೆ. ಹರಾಜು ಪ್ರಕ್ರಿಯೆ ಮೂಲಕ ಸಂಗ್ರಹಿಸಲಾದ ಹಣವನ್ನು ನಮಾಮಿ ಗಂಗಾ ಯೋಜನೆಗೆ ವಿನಿಯೋಗಿಸಲಾಗುವುದು ಎಂದು ಸರಕಾರ ಪ್ರಕಟಣೆಯಲ್ಲಿ ತಿಳಿಸಿದೆ.

ಪ್ರಧಾನಿ ಮೋದಿ ಅವರಿಗೆ ಉಡುಗೊರೆಯಾಗಿ ಬಂದ 2,772 ವಸ್ತುಗಳನ್ನು ಸೆ.14ರಿಂದ ಆನ್‌ಲೈನ್‌ ಮೂಲಕ ಹರಾಜಿಗಿಡಲಾಗಿತ್ತು. ಕೇಂದ್ರ ಸಂಸ್ಕೃತಿ ಖಾತೆ ಸಚಿವಾಲಯದ ವತಿಯಿಂದ ಈ ಹರಾಜನ್ನು ನಡೆಸಲಾಗಿತ್ತು. ಅ.3ಕ್ಕೆ ಪ್ರಕ್ರಿಯೆ ಮುಗಿಸಲು ಮೊದಲು ತೀರ್ಮಾ­ನಿಸಲಾಗಿತ್ತಾದರೂ, ನಂತರ ಮೂರು ವಾರ ವಿಸ್ತರಿಸಲಾಗಿತ್ತು.