ನಿರ್ದೇಶಿತ-ಕ್ಷಿಪಣಿ ನಾಶಕ ಐಎನ್‌ಎಸ್‌ ಇಂಫಾಲ್‌ ಸೇರ್ಪಡೆ : ನೌಕಾಪಡೆಯ ಬತ್ತಳಿಕೆಗೆ ಆನೆ ಬಲ

ಮುಂಬಯಿ: ಸ್ವದೇಶಿ ನಿರ್ಮಿತ ಕ್ಷಿಪಣಿ ನಾಶಕ ಸಮರ ನೌಕೆ 'ಐಎನ್‌ಎಸ್‌ ಇಂಫಾಲ್‌' ಶನಿವಾರ ಭಾರತೀಯ ನೌಕಾಪಡೆಗೆ ಸೇರ್ಪಡೆಯಾಗಿದ್ದು, ಈ ಮೂಲಕ ನೌಕಾಪಡೆಯ ಬತ್ತಳಿಕೆಗೆ ಆನೆ ಬಲ ಬಂದಂತಾಗಿದೆ.

2011ರಲ್ಲಿ ಪ್ರೊಜಾಕ್ಟ್ 15ಬಿ ಅಡಿ ಒಟ್ಟು ನಾಲ್ಕು ಸಮರ ನೌಕೆಗಳ ನಿರ್ಮಾಣಕ್ಕೆ ಒಪ್ಪಂದವಾಗಿದ್ದು, ಈ ಯೋಜನೆಯಡಿ ನಿರ್ಮಾಣವಾದ ಮೂರನೇ ಕ್ಷಿಪಣಿ ನಾಶಕ ಯುದ್ಧನೌಕೆ ಇದಾಗಿದೆ.

ಮುಂಬಯಿನ ನೌಕಾ ನೆಲೆಯಲ್ಲಿ ಭಾರತೀಯ ನೌಕಾಪಡೆಯ ಮುಖ್ಯಸ್ಥ ಸುನೀಲ್‌ ಲಂಬಾ ಹಾಗೂ ಅವರ ಪತ್ನಿ ನೌಕಾಪಡೆ ಪತ್ನಿಯರ ಕಲ್ಯಾಣಾಭಿವೃದ್ಧಿ ಮಂಡಳಿ ಅಧ್ಯಕ್ಷೆ ರೀನಾ ಲಂಬಾ ಅವರು 'ಐಎನ್‌ಎಸ್‌ ಇಂಫಾಲ್‌' ಸಮರ ನೌಕೆಗೆ ಮಧ್ಯಾಹ್ನ 12.20ಕ್ಕೆ ವಿದ್ಯುಕ್ತವಾಗಿ ಚಾಲನೆ ನೀಡಿದರು.

'ಮೇಕ್‌ ಇನ್‌ ಇಂಡಿಯಾ' ಯೋಜನೆಯಡಿ ಭಾರತೀಯ ನೌಕಾಪಡೆ, ಡಿಆರ್‌ಡಿಒ, ಒಎಫ್‌ಬಿ, ಬಿಇಎಲ್‌, ಇತರೆ ಸಾರ್ವಜನಿಕ ಮತ್ತು ಖಾಸಗಿ ಉದ್ಯಮ ಸಂಸ್ಥೆಗಳ ಸಹಕಾರದಲ್ಲಿ 'ಐಎನ್‌ಎಸ್‌ ಇಂಫಾಲ್‌' ಸಮರ ನೌಕೆಯನ್ನು ಸ್ಥಳೀಯವಾಗಿ ಮಜಗಾನ್‌ ಡಾಕ್‌ ಲಿಮಿಟೆಡ್‌(ಎಂಡಿಎಲ್‌) ಸಂಸ್ಥೆ ನಿರ್ಮಿಸಿದೆ.

'ಐಎನ್‌ಎಸ್‌ ಇಂಫಾಲ್‌' ವಿಶೇಷತೆ:

*ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಸ್ಥಳೀಯವಾಗಿ ನಿರ್ಮಾಣ.

* ವಿಶ್ವದ ಅತ್ಯುತ್ತಮ ಯುದ್ಧನೌಕೆಗಳ ಸಾಲಿಗೆ ಸೇರ್ಪಡೆ.

* ಭಾರತದಲ್ಲಿ ನಿರ್ಮಾಣವಾದ ಮೂರನೇ ಕ್ಷಿಪಣಿ ನಾಶಕ ಯುದ್ಧನೌಕೆ.

* 7,300 ಟನ್‌ ಸಾಮರ್ಥ್ಯ‌

* ನೌಕೆಯ ಉದ್ದ 163 ಮೀಟರ್‌ ಮತ್ತು ಬೀಮ್‌ ಉದ್ದ 17.4 ಮೀಟರ್‌

* ವೇಗ ಹೆಚ್ಚಳದ ನಿಟ್ಟಿನಲ್ಲಿ ನಾಲ್ಕು ಗ್ಯಾಸ್‌ ಟರ್ಬಿನ್‌ ಹೊಂದಿದ್ದು, ಗಂಟೆಗೆ 30 ನಾಟ್ಸ್‌ ವೇಗದಲ್ಲಿ ನೌಕೆ ಚಲಿಸಬಲ್ಲುದು.

* ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು, ಸೆನ್ಸಾರ್‌ಗಳು, ರೆಡಾರ್‌ಗಳನ್ನು ಹೊಂದಿದೆ.

* ಭೂಮಿಯಿಂದ ಭೂಮಿಗೆ, ಭೂಮಿಯಿಂದ ಆಗಸಕ್ಕೆ ಚಿಮ್ಮುವ ಕ್ಷಿಪಣಿಗಳು ನೌಕೆಯ ಬತ್ತಳಿಕೆಯಲ್ಲಿರಲಿವೆ.