ಈ ಮಾಧುರಿ, ಕರೀಶ್ಮಾ ಬಗ್ಗೆ ಗೊತ್ತೇ ?

ಹೊಸದಿಲ್ಲಿ: ನಟಿ ಮಾಧುರಿ, ಕಂಗಾನ ಥರ ರ‍್ಯಾಂಪ್‌ ವಾಕ್‌ ಮಾಡಬೇಕೆಂಬ ಆಸೆ, ಆದರೆ ತನ್ನ ವಿಭಿನ್ನ ದೇಹದ ಸೃಷ್ಠಿಯೇ ಆಕೆಯ ಆಸೆಗೆ ಬೆಂಕಿ ಹಾಕಿತ್ತ. ಆಕೆ ಮಂಗಳಮುಖಿ ಶ್ವೇತಾ.

ಶ್ವೇತಾರಂಥ ಹಲವಾರು ಮಂದಿ ಸೇರಿ ದೇಶದ ರಾಜಧಾನಿಯಲ್ಲಿ ಶುಕ್ರವಾರ ಫ್ಯಾಷನ್‌ ಶೋ ನಡೆಸಿದ್ದಾರೆ. ಮಂಗಳಮುಖಿಯರ ಪ್ರತಿಭೆ ಪ್ರದರ್ಶಿಸುವ ಉದ್ದೇಶದಿಂದ ಸೊಸೈಟಿ ಫಾರ್‌ ಪೀಪಲ್ಸ್‌ ಅವೇರ್ನೆಸ್‌ ಕೇರ್‌ ಮತ್ತು ಎಂಪವರ್ಮೆಂಟ್‌ (ಸ್ಪೇಸ್‌) ಎಂಬ ಸರ್ಕಾರೇತರ ಸಂಸ್ಥೆ ಕಾರ್ಯಕ್ರಮವನ್ನು ಆಯೋಜಿಸಿತ್ತು. ಇದರಲ್ಲಿ ರ‍್ಯಾಂಪ್‌ ವಾಕ್‌ ಮಾತ್ರವಲ್ಲದೇ ನೃತ್ಯ ಮಾಡಲೂ ಅವಕಾಶ ನೀಡಲಾಗಿತ್ತು. ಧಮ್‌ ಮರೋ ಧಮ್‌, ಚೋರಿ ಚೋರಿ ಚುಪ್ಕೆ ಚುಪ್ಕೆ ಸೇರಿ ಹಲವಾರು ಹಾಡುಗಳಿಗೆ ಹೆಜ್ಜೆ ಹಾಕಿದ್ದರು. ಈ ಕಾರ್ಯಕ್ರಮ ವೀಕ್ಷಿಸಲೆಂದೇ 600ಕ್ಕೂ ಅಧಿಕ ಮಂದಿ ಪಾಲ್ಗೊಂಡಿದ್ದರು.

'ಸ್ಟೇಜ್‌ ಮೇಲೆ ನೃತ್ಯ ಮಾಡಬೇಕು ಎಂಬುದು ನನ್ನ ಕನಸಾಗಿತ್ತು, ಅಲ್ಲದೇ ನನಗೆ ನಟನಾ ರಂಗಕ್ಕೆ ಸೇರಬೇಕು ಎಂಬ ಆಸೆಯೂ ಇತ್ತು. ಆದರೆ ಮಂಗಳಮುಖಿ ಎಂಬ ಪಟ್ಟಕಟ್ಟಿಕೊಂಡು ಏನನ್ನೂ ಮಾಡಲಾಗಲಿಲ್ಲ. ಆದರೆ ಈ ಕಾರ್ಯಕ್ರಮ ನನ್ನಂತಹ ಹಲವಾರು ಮಂದಿಗೆ ಖುಷಿ ತಂದುಕೊಟ್ಟಿದೆ' ಎನ್ನುತ್ತಾರೆ ಶ್ವೇತಾ.

ರ‍್ಯಾಂಪ್‌ ವಾಕ್‌ನಲ್ಲಿ ಕರೀಶ್ಮಾ ಕಪೂರ್‌ ಮಾದರಿಯಲ್ಲಿ ಬಟ್ಟೆ ಧರಿಸಿ ಎಲ್ಲರ ಗಮನ ಸೆಳೆದಿದ್ದ ಆಲಿಶಾ ಕೂಡಾ ಕಾರ್ಯಕ್ರಮದ ಕುರಿತು ಹಾಗೂ ಆಯೋಜಕರ ಕುರಿತು ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ' ನಮ್ಮ ಕುರಿತು ಜನರಲ್ಲಿರುವ ತಪ್ಪು ಗ್ರಹಿಕೆಗಳನ್ನು ಹೋಗಲಾಡಿಸಲು ಇಂತಹ ಕಾರ್ಯಕ್ರಮಗಳು ಅವಶ್ಯಕವಾಗಿದೆ. ಎಲ್ಲರಂತೆಯೇ ನಮ್ಮಲ್ಲೂ ಪ್ರತಿಭೆ ಇದೆ. ಆದರೆ ಅದಕ್ಕೆ ಸರಿಯಾದ ಅವಕಾಶ ದೊರಕೆಬೇಕು' ಎಂದಿದ್ದಾರೆ.