ಅಕ್ಕನ ಆಸ್ತಿ ಮೇಲೆ ತಮ್ಮನಿಗೆ ಹಕ್ಕಿಲ್ಲ: ಸು.ಕೋರ್ಟ್‌
ಪಿಟಿಐ ಹೊಸದಿಲ್ಲಿ ಮಹಿಳೆಗೆ ಗಂಡನಿಂದ ಬಂದಿರುವ ಆಸ್ತಿ ಮೇಲೆ ಆಕೆಯ ಸಹೋದರ ಹಕ್ಕು ಸಾಧಿಸುವಂತಿಲ್ಲ ಎಂದು ಸುಪ್ರೀಂಕೋರ್ಟ್‌ ಸ್ಪಷ್ಟಪಡಿಸಿದೆ...
ಹೊಸದಿಲ್ಲಿ: ಮಹಿಳೆಗೆ ಗಂಡನಿಂದ ಬಂದಿರುವ ಆಸ್ತಿ ಮೇಲೆ ಆಕೆಯ ಸಹೋದರ ಹಕ್ಕು ಸಾಧಿಸುವಂತಿಲ್ಲ ಎಂದು ಸುಪ್ರೀಂಕೋರ್ಟ್‌ ಸ್ಪಷ್ಟಪಡಿಸಿದೆ. ತಮ್ಮನನ್ನು ಮಹಿಳೆಯ ಹಕ್ಕುದಾರ, ವಾರಸುದಾರ ಎಂದಾಗಲೀ, ಆಕೆಯ ಕುಟುಂಬ ಎಂದಾಗಲೀ ಪರಿಗಣಿಸಲಾಗುವುದಿಲ್ಲ. ಹಾಗಾಗಿ ಆಸ್ತಿ ಹಕ್ಕೂ ಇಲ್ಲ ಎಂದು ಕೋರ್ಟ್‌ ಹೇಳಿದೆ.
ಒಂದೊಮ್ಮೆ ಮಹಿಳೆ ಉಯಿಲು ಪತ್ರ ಬರೆದಿಡದೆ ಮೃತಪಟ್ಟರೆ ಆಕೆಯ ಆಸ್ತಿ ಯಾರಿಗೆ ಹೋಗಬೇಕು ಎನ್ನುವ ಬಗ್ಗೆ ಹಿಂದೂ ಉತ್ತರಾಧಿಕಾರ ಕಾಯಿದೆಯಲ್ಲಿರುವ ಅಂಶವನ್ನು ಉಲ್ಲೇಖಿಸಿರುವ ಸುಪ್ರೀಂ ಕೋರ್ಟ್‌, ಗಂಡ ಮತ್ತು ಮಾವನ ಕಡೆಯಿಂದ ಅನುವಂಶೀಯವಾಗಿ ಬಂದಿರುವ ಆಸ್ತಿಯ ಆಕೆಯ ಸಾವಿನ ಬಳಿಕ ಒಂದೋ ಮಕ್ಕಳಿಗೆ, ಮಕ್ಕಳಿಲ್ಲದೆ ಹೋದರೆ ಮರಳಿ ಗಂಡನ ಕುಟುಂಬಕ್ಕೆ ಹೋಗಬೇಕು ಎಂದು ಸೆಕ್ಷನ್‌ 15ರಲ್ಲಿ ಹೇಳಲಾಗಿದೆ ಎಂದಿದೆ. ನ್ಯಾಯಮೂರ್ತಿಗಳಾದ ದೀಪಕ್‌ ಮಿಶ್ರಾ ಮತ್ತು ಆರ್‌. ಭಾನುಮತಿ ಅವರನ್ನೊಳಗೊಂಡ ಪೀಠ ಈ ಮಹತ್ವದ ತೀರ್ಪು ನೀಡಿದೆ. ಉತ್ತರಾಖಂಡದಲ್ಲಿ ಹಿಡುವಳಿ ಜಾಗಕ್ಕೆ ಸಂಬಂಧಿಸಿದ ವಿಷಯದಲ್ಲಿ ಈ ತೀರ್ಪು ಬಂದಿದೆ.
ಲಲಿತಾ ಎಂಬವರ ಪತಿ ಮೃತರಾಗಿದ್ದು, ಅವರು ಗಂಡ ಮತ್ತು ಮಾವನ ಕುಟುಂಬ ವಾಸಿಸುತ್ತಿದ್ದ ಕಟ್ಟಡದಲ್ಲಿ ವಾಸಿಸುತ್ತಿದ್ದರು. ಲಲಿತಾ ಅವರಿಗೆ ಮಕ್ಕಳಿರಲಿಲ್ಲ. ಅವರ ಜತೆ ತಮ್ಮನ ಕುಟುಂಬವೂ ವಾಸವಾಗಿ, ವ್ಯವಹಾರವನ್ನೂ ಜಂಟಿಯಾಗಿ ನಡೆಸುತ್ತಿದ್ದರು. ಇತ್ತೀಚೆಗೆ ಲಲಿತಾ ಮೃತಪಟ್ಟ ಬಳಿಕ ಸಹೋದರ ಈ ಜಾಗದ ಮುಂದಿನ ಹಕ್ಕು ತನ್ನದು ಎಂದು ಸಾಬೀತುಪಡಿಸಲು ಹೊರಟಾಗ ಹೈಕೋರ್ಟ್‌ ಅವರ ವಾದವನ್ನು ತಳ್ಳಿ ಹಾಕಿತು. ಇದೀಗ ಸು.ಕೋರ್ಟ್‌ ಕೂಡಾ ಉತ್ತರಾಖಂಡ ಹೈಕೋರ್ಟ್‌ ತೀರ್ಪನ್ನು ಎತ್ತಿಹಿಡಿದಿದೆ.
ಅಕ್ಕ ಮತ್ತು ತಮ್ಮ ಸೇರಿ ಜಂಟಿಯಗಿ ವ್ಯವಹಾರ ನೋಡಿಕೊಳ್ಳುತ್ತಿದ್ದರು ಎಂದ ಮಾತ್ರಕ್ಕೆ ಅಕ್ಕನ ಹಿಡುವಳಿಯ ಅಧಿಕಾರ ತಮ್ಮನಿಗೆ ಬರುವುದಿಲ್ಲ. ಒಂದೊಮ್ಮೆ ಹೋಗುವುದಿದ್ದರೆ ಅದು ಗಂಡ ಇಲ್ಲವೇ ಅವರ ಕುಟುಂಬಕ್ಕೆ ಎಂದು ಕೋರ್ಟ್‌ ಸ್ಪಷ್ಟಪಡಿಸಿತು.
ಲಲಿತಾ ಅವರ ಪತಿ ಮತ್ತು ಮಾವ ಇಬ್ಬರೂ ಇಲ್ಲದೆ ಇರುವುದರಿಂದ ಜಾಗವನ್ನು ಮೂಲಕ ಭೂಮಾಲೀಕರಿಗೆ ನೀಡುವಂತೆ ಕೋರ್ಟ್‌ ಸೂಚಿಸಿದೆ.