ಅ.31ಕ್ಕೆ ಸಂಭವಿಸಲಿದೆ 'ಬ್ಲೂ ಮೂನ್'‌: ಅಪರೂಪದ ಖಗೋಳ ವಿಸ್ಮಯವಿದು!

ಬೆಂಗಳೂರು: ಅಕ್ಟೋಬರ್‌ ತಿಂಗಳು ಬಂತೆಂದರೆ ಸಾಲು ಸಾಲು ಹಬ್ಬಗಳು. ಆದರೆ, ಈ ವರ್ಷ ಅಕ್ಟೋಬರ್‌ನಲ್ಲಿ ಮತ್ತೊಂದು ವಿಸ್ಮಯ ನಡೆಯಲಿದೆ. ಅ.1ರಂದೇ ನಾವೆಲ್ಲರೂ ಹುಣ್ಣಿಮೆಗೆ ಸಾಕ್ಷಿಯಾಗಿದ್ದೆವು. ಆದರೆ, ಇದೇ ತಿಂಗಳಲ್ಲಿ ಬ್ಲೂ ಮೂನ್‌ಗೆ ಸಾಕ್ಷಿಯಾಗಲಿದ್ದೇವೆ.

'ಒನ್ಸ್‌ ಇನ್‌ ಎ ಬ್ಲೂಮೂನ್‌' ಎಂಬ ಇಂಗ್ಲಿಷ್‌ ನಾಣ್ಣುಡಿಯನ್ನು ಕೇಳಿಯೇ ಇರುತ್ತೀರಿ. ತೀರಾ ಅಪರೂಪಕ್ಕೊಮ್ಮೆ ಸಂಭವಿಸುವ ಘಟನೆಗಳನ್ನು ಈ ರೀತಿ ಹೇಳಿತ್ತಾರೆ. ಇದೀಗ ಅ.31ರಂದು ನಾವೆಲ್ಲ ಬ್ಲೂಮೂನ್‌ಗೆ ಸಾಕ್ಷಿಯಾಗಲಿದ್ದೇವೆ.

ಏನಿದು ಬ್ಲೂಮೂನ್?
ಬ್ಲೂ ಮೂನ್‌ ಎಂದರೆ, ಚಂದ್ರ ನೀಲಿ ಬಣ್ಣದಲ್ಲಿ ಕಾಣುತ್ತಾನೆ ಎಂದರ್ಥವಲ್ಲ. ಒಂದೇ ತಿಂಗಳ ಎರಡು ಹುಣ್ಣಿಮೆಗಳು ಬರುವ ಪ್ರಾಕೃತಿಕ ವಿದ್ಯಮಾನವನ್ನೇ ಬ್ಲೂ ಮೂನ್‌ ಎಂದು ಕರೆಯುತ್ತಾರೆ. ಪ್ರತಿ 2 ಅಥವಾ 3 ವರ್ಷಗಳಿಗೊಮ್ಮೆ ಒಂದೇ ತಿಂಗಳಲ್ಲಿ 2 ಬಾರಿ ಹುಣ್ಣಿಮೆ ಸಂಭವಿಸುತ್ತದೆ. ಹೀಗೆ ಒಂದೇ ತಿಂಗಳಲ್ಲಿ 2 ಬಾರಿ ಹುಣ್ಣಿಮೆ ಸಂಭವಿಸುವ ವಿದ್ಯಮಾನವನ್ನು ಬ್ಲೂ ಮೂನ್‌ (ನೀಲಿ ಚಂದ್ರ) ಎಂದು ಕರೆಯುವುದು ವಾಡಿಕೆ. ಒಂದೇ ತಿಂಗಳಲ್ಲಿ ಎರಡು ಬಾರಿ ಸಂಭವಿಸುತ್ತಿದೆ ಎಂಬ ವಿಶೇಷತೆ ಬಿಟ್ಟರೆ, ಈ ಹುಣ್ಣಿಮೆ ಕೂಡ ಎಲ್ಲ ಹುಣ್ಣಿಮೆಗಳಂತೆ ಸಾಮಾನ್ಯ ಪ್ರಾಕೃತಿಕ ವಿದ್ಯಮಾನವಾಗಿದೆ.

150 ವರ್ಷಗಳ ಬಳಿಕ ನಡೆಯಲಿದೆ 'ನೀಲಿ ಚಂದ್ರ ಗ್ರಹಣ'

ಖಗೋಳ ಶಾಸ್ತ್ರದ ಪ್ರಕಾರ 29.531 ದಿನ ಅಥವಾ 29 ದಿನ, 12 ಗಂಟೆ 44 ನಿಮಿಷ, 38 ಸೆಕೆಂಡುಗಳಿಗೆ ಒಂದು ಚಾಂದ್ರಮಾನ ತಿಂಗಳು ಎಂದು ಪರಿಗಣಿಸಲಾಗಿದೆ. ಹೀಗಾಗಿ 2ರಿಂದ ಮೂರು ವರ್ಷಗಳಿಗೆ ಒಮ್ಮೆ 31 ದಿನ ಇರುವ ತಿಂಗಳಲ್ಲಿ ಎರಡು ಬಾರಿ ಹುಣ್ಣಿಮೆ ಸಂಭವಿಸುತ್ತದೆ.

1 ಅಥವಾ 2ನೇ ತಾರೀಖಿನಂದು ಹುಣ್ಣಿಮೆ ಸಂಭವಿಸಿದರೆ ಆ ತಿಂಗಳಲ್ಲಿ ಎರಡು ಹುಣ್ಣಿಮೆಗಳು ಸಂಭವಿಸುತ್ತವೆ.
2018ರಲ್ಲಿ ಬ್ಲೂಮೂನ್‌ ಸಂಭವಿಸಿತ್ತು. ಮುಂದಿನ ಬ್ಲೂಮೂನ್‌ 2023ರ ಆಗಸ್ಟ್ 31 ಸಂಭವಿಸಲಿದೆ.