ರ‍್ಯಾಗಿಂಗ್ ಪಿಡುಗು: 20 ಡೆಂಟಲ್‌ ಕಾಲೇಜು ನೋಂದಣಿ ರದ್ದು?

ಹೊಸದಿಲ್ಲಿ: ರ‍್ಯಾಗಿಂಗ್ ಪಿಡುಗು ವಿವಾದ ಸುತ್ತಿಕೊಂಡಿರುವ ರಾಯಚೂರು ಮತ್ತು ಕೋಲಾರದ ಎರಡು ಕಾಲೇಜುಗಳು ಸೇರಿದಂತೆ ದೇಶದ 20 ದಂತ ವೈದ್ಯಕೀಯ ಶಿಕ್ಷಣ ಕಾಲೇಜುಗಳ ನೋಂದಣಿಯನ್ನು ರದ್ದುಗೊಳಿಸುವಂತೆ ಡೆಂಟಲ್‌ ಕೌನ್ಸಿಲ್ ಆಫ್‌ ಇಂಡಿಯಾ ಕೇಂದ್ರ ಆರೋಗ್ಯ ಸಚಿವಾಲಯಕ್ಕೆ ಶಿಫಾರಸು ಮಾಡಿದೆ.

ಸಚಿವಾಲಯವು ಮಂಡಳಿಯ ಶಿಪಾರಸಿನಂತೆ ಕ್ರಮ ಕೈಗೊಳ್ಳಲು ಮುಂದಾದರೆ 20 ಕಾಲೇಜುಗಳ ನೋಂದಣಿ ರದ್ದಾಗಲಿವೆ.

ರಾಯಚೂರಿನ ಎಎಂಇ ಡೆಂಟಲ್‌ ಕಾಲೇಜು ಮತ್ತು ಆಸ್ಪತ್ರೆ, ಕೋಲಾರದ ಕೆಜಿಎಫ್‌ ಕಾಲೇಜ್‌ ಆಫ್‌ ಡೆಂಟಲ್‌ ಸೈನ್ಸಸ್ ಮತ್ತು ಆಸ್ಪತ್ರೆ, ಆಂಧ್ರಪ್ರದೇಶದ ಶ್ರೀ ಬಾಲಾಜಿ ಡೆಂಟಲ್‌ ಕಾಲೇಜು, ಬಿಹಾರದ ಮೂರು, ಅಸ್ಸಾಂ, ಪಂಜಾಬ್‌, ದಿಲ್ಲಿ, ಶ್ರೀನಗರ, ಜಮ್ಮು,ರಾಜಸ್ಥಾನಗಳ ತಲಾ ಒಂದು, ಮಧ್ಯಪ್ರದೇಶ, ಉತ್ತರಪ್ರದೇಶಗಳ ಎರಡು, ಮಹಾರಾಷ್ಟ್ರದ ಮೂರು, ಗ್ರೇಟರ್‌ ನೋಯ್ಡಾದ ಒಂದು ಕಾಲೇಜುಗಳ ನೋಂದಣಿ ರದ್ದುಪಡಿಸಲು ಮಂಡಳಿ ಶಿಫಾರಸು ಮಾಡಿದೆ.

ಕಾಲೇಜುಗಳಲ್ಲಿ ರ‍್ಯಾಗಿಂಗ್ ಪಿಡುಗು ಕೊನೆಗೊಳಿಸಲು ಆಡಳಿತ ಮಂಡಳಿ ಅಗತ್ಯ ಕ್ರಮ ಕೈಗೊಳ್ಳುವಂತೆ ಮಾಡಲು ಇದೊಂದು ಉತ್ತಮ ದಾರಿಯಾಗುವ ನಿರೀಕ್ಷೆಯಿದೆ.