ಕಳ್ಳತನ ಮಾಡಿದ ಅಂಗಡಿಯಲ್ಲಿ ತನ್ನ ಆಧಾರ್‌ ಕಾರ್ಡ್‌ ಬಿಟ್ಟು ಬಂದ ಐನಾತಿ ಕಳ್ಳ!

ಡೆಹ್ರಾಡೂನ್‌: ಕಿರಾಣಿ ಅಂಗಡಿಯೊಂದರಲ್ಲಿ ಕಳವು ಮಾಡಲು ಹೋಗಿದ್ದ ಐನಾತಿ ಕಳ್ಳನೊಬ್ಬ, ತನ್ನ ಆಧಾರ್‌ ಕಾರ್ಡ್‌ ಅನ್ನು ಅಲ್ಲೇ ಬಿಟ್ಟು ಬಂದು ಪೊಲೀಸರಿಗೆ ಸಿಕ್ಕಿಬಿದ್ದ ಘಟನೆ ಉತ್ತರಾಖಂಡ್‌ನ ಡೆಹ್ರಾಡೂನ್‌ನಲ್ಲಿ ನಡೆದಿದೆ. ಕಳ್ಳನ ಆಧಾರ್‌ ಕಾರ್ಡ್‌ ಆಧಾರದ ಮೇಲೆ ಆತನನ್ನು ಪೊಲೀಸರು ಹುಡುಕಿ ಬಂಧಿಸಿದ್ದಾರೆ.

ಇತ್ತೀಚೆಗೆ ಅನಿಲ್‌ ಸೇಠಿ ಎಂಬುವವರ ಕಿರಾಣಿ ಅಂಗಡಿಯ ತಗಡಿನ ಮೇಲ್ಚಾವಣಿ ಮುರಿದು ಆರೋಪಿ ವಸ್ತುಗಳನ್ನೆಲ್ಲಾ ಕದ್ದೊಯ್ದಿದ್ದ. ಜತೆಗೆ ಗಲ್ಲಾಪೆಟ್ಟಿಗೆಯಲ್ಲಿದ್ದ ಅಲ್ಪಸ್ವಲ್ಪ ಚಿಲ್ಲರೆ ಹಣವನ್ನೂ ದೋಚಿದ್ದ. ಕಳ್ಳನ ಮುಖ ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು. ಆದರೆ ಆತನ ಗುರುತು ಪತ್ತೆಹಚ್ಚಲು ಪೊಲೀಸರಿಗೆ ಸಾಧ್ಯವಾಗಿರಲಿಲ್ಲ. ಆದರೆ, ಪೊಲೀಸರು ಅಂಗಡಿಯಲ್ಲಿ ಸುಳುವುಗಳಿಗಾಗಿ ಶೋಧಿಸಿದಾಗ ಅಲ್ಲಿ ಪರ್ಸ್‌ವೊಂದು ಬಿದ್ದಿರುವುದು ಕಂಡುಬಂದಿತ್ತು. ಅದರಲ್ಲಿ ಆಧಾರ್‌ ಕಾರ್ಡ್‌ ಕೂಡಾ ಇತ್ತು. ಅದು ಕಳ್ಳನದ್ದೇ ಇರಬಹುದೆಂಬ ಪೊಲೀಸರ ಶಂಕೆ ನಿಜವಾಗಿತ್ತು. ಆರೋಪಿ ನೀರಜ್‌ ಪ್ರಸ್ತುತ ಪೊಲೀಸರ ಅತಿಥಿಯಾಗಿದ್ದು, ತಪ್ಪೊಪ್ಪಿಕೊಂಡಿದ್ದಾನೆ. ಉದ್ಯೋಗ ಸಿಗದ ಕಾರಣ ಕಳ್ಳತನದ ಹಾದಿ ಹಿಡಿದಿದ್ದಾಗಿ ಹೇಳಿದ್ದಾನೆ.