ಬಿಜೆಪಿ ನಾಯಕಿ ಉಮಾ ಭಾರತಿ ಸೋದರಳಿಯನ ಕಾರು ಗುದ್ದಿ ಮೂವರ ಸಾವು

ಭೋಪಾಲ್: ಬಿಜೆಪಿ ಶಾಸಕ ರಾಹುಲ್ ಸಿಂಗ್ ಲೋಧಿ ಅವರು ಕಾರು ಡಿಕ್ಕಿ ಹೊಡೆದ ಪರಿಣಾಮ ಮೂವರು ಬೈಕ್ ಸವಾರರು ಮೃತಪಟ್ಟ ಘಟನೆ ಮಧ್ಯಪ್ರದೇಶದ ತಿಕಮ್‌ಗಢ-ಚತ್ತಾರಪುರ ಮಾರ್ಗದಲ್ಲಿ ನಡೆದಿದೆ.

ತಿಕಮ್‌ಗಢ ಜಿಲ್ಲೆಯ ಖರಗಾಪುರ ವಿಧಾನಸಭೆ ಕ್ಷೇತ್ರದ ಶಾಸಕರಾಗಿರುವ ರಾಹುಲ್ ಸಿಂಗ್ ಲೋಧಿ ಅವರು ಬಿಜೆಪಿ ನಾಯಕಿ ಉಮಾ ಭಾರತಿ ಅವರ ಸೋದರಳಿಯ ಎಂದು ತಿಳಿದು ಬಂದಿದೆ.

ಸೋಮವಾರ ಮಧ್ಯಾಹ್ನ ಮೂರು ಗಂಟೆ ಸುಮಾರಿಗೆ ಈ ಅಪಘಾತ ಸಂಭವಿಸಿದೆ. ತಿಕಮ್‌ಗಢ್ ನಿವಾಸಿಗಳಾದ ಬ್ರಿಜೇಂದ್ರ ಅಹಿರವಾರ್ (25), ರವಿ ಅಹಿರವಾರ್ (23) ಮತ್ತು ಮದನ್ ಅಪಘಾತದಲ್ಲಿ ಮೃತಪಟ್ಟವರು.

ತಿಕಮ್‌ಗಢ್- ಬಾಲದೇವಗಢ್ ಮಾರ್ಗವಾಗಿ ಸಾಗುತ್ತಿದ್ದ ಬೈಕ್‌ಗೆ ವಿರುದ್ಧ ದಿಕ್ಕಿನಿಂದ ಬಂದು ಶಾಸಕರ ಎಸ್‌ಯುವಿ ಕಾರು ಡಿಕ್ಕಿ ಹೊಡೆದ ಪರಿಣಾಮ ಈ ದುರ್ಘಟನೆ ಸಂಭವಿಸಿದೆ. ಅಪಘಾತ ನಡೆದ ಸಂದರ್ಭದಲ್ಲಿ ಶಾಸಕರು ಕಾರಿನಲ್ಲಿ ಇದ್ದರೆ ಎನ್ನುವ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.