ಕೊಯಮತ್ತೂರಿನಲ್ಲಿ ಮೂವರು ಐಸಿಸ್‌ ಬೆಂಬಲಿಗರ ಬಂಧನ

ಕೊಯಮತ್ತೂರು: ಜೂನ್‌ 13ರಂದು ನಗರದ ಏಳು ಕಡೆಗಳಲ್ಲಿ ದಾಳಿ ನಡೆಸಿದ್ದ ಎನ್‌ಐಎ ಇದೀಗ ಮೂವರು ಶಂಕಿತ ಐಸಿಸ್‌ ಬೆಂಬಲಿಗರನ್ನು ಕಾನೂನುಬಾಹಿತ ಚಟುವಟಿಕೆ ತಡೆ ಕಾಯಿದೆ(ಯುಎಪಿಎ) ಅಡಿ ಬಂಧಿಸಿದೆ.

ಮೊಹಮ್ಮದ್‌ ಹುಸೇನ್‌, ಷಹಜಹಾನ್‌ ಮತ್ತು ಶೇಖ್‌ ಶಫಿಯುಲ್ಲಾ ಬಂಧಿತರು. ಶ್ರೀಲಂಕಾ ಸ್ಫೋಟದ ಸೂತ್ರಧಾರ ಎಂದು ಹೇಳಲಾದ ಜಹ್ರಾನ್‌ ಹಷೀಮ್‌ನ ಫೇಸ್‌ಬುಕ್‌ ಗೆಳೆಯನಾಗಿರುವ ಮೊಹಮ್ಮದ್‌ ಅಜರುದ್ದೀನ್‌ ಜತೆ ಸಂಬಂಧ ಹೊಂದಿರುವ ಶಂಕೆಯಲ್ಲಿ ಈ ಮೂವರ ಮನೆಗಳ ಮೇಲೆ ಜೂನ್‌ 13ರಂದು ದಾಳಿ ನಡೆದಿತ್ತು. ಮತ್ತು ಇವರ ಮನೆಗಳಲ್ಲಿ ಸಿಕ್ಕಿದ ದಾಖಲೆಗಳ ಆಧಾರದಲ್ಲಿ ಬಂಧನ ನಡೆದಿದೆ.

ಇವರು ಐಸಿಸ್‌ನ ಕಟ್ಟಾ ಬೆಂಬಲಿಗರಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಉಗ್ರ ಸಂಘಟನೆಯ ಸಿದ್ಧಾಂತಗಳನ್ನು ಪ್ರಚಾರ ಮಾಡುತ್ತಿದ್ದರು. ಆರೋಪಿಗಳನ್ನು ಜಿಲ್ಲಾ ನ್ಯಾಯಾಧೀಶರ ಮುಂದೆ ಹಾಜರುಪಡಿಸಲಾಗಿದ್ದು. ಅವರು ಜೂನ್‌ 28ರವರೆಗೆ ನ್ಯಾಯಾಂಗಬಂಧನಕ್ಕೆ ಒಪ್ಪಿಸಿದ್ದಾರೆ.