ತಾಯಿ ಪಕ್ಕ ಮಲಗಿದ್ದ 3 ವರ್ಷದ ಮಗು ಅಪಹರಿಸಿ ಅತ್ಯಾಚಾರಗೈದು ಕೊಲೆ!

ಜೆಮ್‌ಷೆಡ್‌ಪುರ: ತಾಯಿ ಜತೆ ಮಲಗಿದ್ದ ಮೂರು ವರ್ಷದ ಹೆಣ್ಣು ಮಗುವನ್ನು ಅಪಹರಿಸಿ ಅತ್ಯಾಚಾರ ಮಾಡಿ ತಲೆ ಕಡಿದು ಕೊಂದ ಭೀಕರ ಘಟನೆಯೊಂದು ಜಾರ್ಖಂಡ್‌ನ ಟಾಟಾ ನಗರ ರೈಲು ನಿಲ್ದಾಣದಲ್ಲಿ ಜುಲೈ 26ರಂದು ಸಂಭವಿಸಿದೆ. ಘಟನೆಗೆ ಸಂಬಂಧಿಸಿದಂತೆ ಮೂವರನ್ನು ಬಂಧಿಸಲಾಗಿದೆ.

ಇಬ್ಬರು ದುಷ್ಕರ್ಮಿಗಳು ರೈಲ್ವೆ ಪ್ಲಾಟ್‌ಫಾರಂನಿಂದ ಮಗುವನ್ನು ಹಿಡಿದುಕೊಂಡು ಹೋಗುತ್ತಿರುವ ದೃಶ್ಯ ಸಿಸಿ ಟಿಯಲ್ಲಿ ದಾಖಲಾಗಿದ್ದು, ಆರೋಪಿಗಳ ಬಂಧನಕ್ಕೆ ನೆರವಾಗಿದೆ. ವಿಚ್ಛೇದಿತ ಮಹಿಳೆಯೊಬ್ಬಳು ಮೂರು ವರ್ಷದ ಮಗು ಮತ್ತು ಒಬ್ಬ ಸಂಗಾತಿಯೊಂದಿಗೆ ಪಶ್ಚಿಮ ಬಂಗಾಳದ ಪುರುಲಿಯಾದಿಂದ ಟಾಟಾ ನಗರ ರೈಲು ನಿಲ್ದಾಣಕ್ಕೆ ಮಂಗಳವಾರ ರಾತ್ರಿ ತಲುಪಿದ್ದರು. ರಾತ್ರಿ ಅಲ್ಲೇ ಮಲಗಿದ್ದರು. ಎದ್ದು ನೋಡಿದಾಗ ಮಗು ಇರಲಿಲ್ಲ.

ಕೂಡಲೇ ತಾಯಿ ಬೊಬ್ಬೆ ಹೊಡೆದ ಹಿನ್ನೆಲೆಯಲ್ಲಿ ಪೊಲೀಸರು ಹುಡುಕಾಟ ಆರಂಭಿಸಿದರು. ಸಾಕಷ್ಟು ಹುಡುಕಾಟದ ಬಳಿಕ ಜುಲೈ 30ರ ರಾತ್ರಿ ಟೆಲ್ಕೊ ಪೊಲೀಸ್‌ ಠಾಣೆಯ ವ್ಯಾಪ್ತಿಯ ಪೊದೆಗಳ ನಡುವೆ ಮಗುವಿನ ತಲೆ ಇಲ್ಲದ ದೇಹ ಪತ್ತೆಯಾಗಿದೆ.

ತಲೆಯನ್ನು ಹುಡುಕಲು ಶ್ವಾನದಳ ಪ್ರಯತ್ನಿಸುತ್ತಿದೆ. ಸಿಸಿಟಿವಿಯಲ್ಲಿ ದಾಖಲಾಗಿರುವ ದೃಶ್ಯಗಳನ್ನು ಗಮನಿಸಿ ರಿಂಕು ಸಹಾ ಎಂಬಾತ ಆರೋಪಿಗಳಲ್ಲಿ ಒಬ್ಬ ಎಂದು ಗುರುತಿಸಲಾಗಿದೆ. ಈತ ಮಹಿಳಾ ಕಾನ್‌ಸ್ಟೇಬಲ್‌ ಒಬ್ಬರ ಮಗನಾಗಿದ್ದಾನೆ. 2015ರಲ್ಲಿ ಮಗುವೊಂದನ್ನು ಅಪಹರಿಸಿ ಕೊಲೆಗೆ ಯತ್ನಿಸಿದ ಆರೋಪದಲ್ಲಿ ಜೈಲುಪಾಲಾಗಿದ್ದ ಆತ ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿದ್ದ.