2015ರ ಕೇಂದ್ರ ಸೇವಾ ಆಯೋಗದ ಫಲಿತಾಂಶ ಪ್ರಕಟ

ಹೊಸದಿಲ್ಲಿ: ದಿಲ್ಲಿ ಮೂಲದ ಟೀನಾ ಡಾಬಿ ಪ್ರತಿಷ್ಠಿತ ಕೇಂದ್ರ ಲೋಕಸೇವಾ ಆಯೋಗದ ಪರೀಕ್ಷೆಯಲ್ಲಿ ಹೆಚ್ಚು ಅಂಕ ಪಡೆದು ಮೊದಲ ಸ್ಥಾನ ಪಡೆದಿದ್ದು, ನಂತರದ ಸ್ಥಾನ ಜಮ್ಮು ಕಾಶ್ಮೀರದ ರೈಲ್ವೆ ಅಧಿಕಾರಿ ಅಥರ್ ಅಮೀರ್ ಯುಐ ಶಫಿ ಪಾಲಾಗಿದೆ.

ದಿಲ್ಲಿ ಮೂಲದ ಭಾರತೀಯ ಕಂದಾಯ ಸೇವಾ ಅಧಿಕಾರಿ, ಜಸ್ಮೀತ್ ಸಿಂಗ್ ಸಂಧು, ಅರ್ತಿಕಾ ಶುಕ್ಲಾ ಮತ್ತು ಶಶಾಂಕ್ ತಿಪಥಿ ಕ್ರಮವಾಗಿ ಮೂರು, ನಾಲ್ಕು ಹಾಗೂ ಐದನೇ ಸ್ಥಾನವನ್ನು ಪಡೆದಿದ್ದಾರೆ.

ದಿಲ್ಲಿಯ ಲೇಡಿ ಶ್ರೀರಾಮ್ ಕಾಲೇಜಿನ ಪದವೀಧರೆ 22 ವರ್ಷದ ದಿನಾ ತಮ್ಮ ಸಾಧನೆಗೆ ಅತೀವ ಸಂತಸ ವ್ಯಕ್ತಪಡಿಸಿದ್ದಾರೆ. 23 ವರ್ಷದ ಅಥರ್ ತಮ್ಮ ಎರಡನೇ ಯತ್ನದಲ್ಲಿ ಈ ಸಾಧನೆ ತೋರಿದ್ದು, ಪ್ರಸಕ್ತ ಭಾರತೀಯ ರೈಲ್ವೆಯ ಸಾರಿಗೆ ನಿರ್ವಹಣೆ ಸಂಸ್ಥೆಯಲ್ಲಿ ತರಬೇತು ಪಡೆಯುತ್ತಿದ್ದಾರೆ. ಕನಸು ನನಸಾಗಿದ್ದಕ್ಕೆ ಇವರು, 'ಜನರ ಜೀವನ ಸುಧಾರಣೆಗಾಗಿ ಸೇವೆ ಸಲ್ಲಿಸುತ್ತೇನೆ. ಅದರಲ್ಲಿಯೂ ಸೇವೆ ಸಲ್ಲಿಸುವ ಅವಕಾಶ ಜಮ್ಮು ಕಾಶ್ಮೀರದಲ್ಲಿಯೇ ಸಿಕ್ಕರೆ ಸಂತೋಷ,' ಎಂದು ಹೇಳಿಕೊಂಡಿದ್ದಾರೆ.

ಸಾಮಾನ್ಯ ವರ್ಗದಲ್ಲಿ 499, ಇತರೆ ಹಿಂದುಳಿದ ವರ್ಗಗಳ 314, ಪರಿಶಿಷ್ಟ ಜಾತಿಯ 176 ಹಾಗೂ ಪಂಗಡದ 89 ಮಂದಿ ಸೇರಿ ಒಟ್ಟು 1078 ಅಭ್ಯರ್ಥಿಗಳು ವಿವಿಧ ಕೇಂದ್ರ ಸರಕಾರಿ ಸೇವೆಗಳಿಗೆ ನಿಯೋಜಿಸಲು ಅರ್ಹರಾಗಿದ್ದಾರೆ, ಎಂದು ಯುಪಿಎಸ್‌ಸಿ ಹೇಳಿದೆ. ಇತರೆ 172 ಅಭ್ಯರ್ಥಿಗಳ ಫಲಿತಾಂಶವನ್ನು ಕಾಯ್ದಿರಿಸಲಾಗಿದೆ.

ಪೂರ್ಣ ಫಲಿತಾಂಶಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ