ಟಿಎಂಸಿ ಕಾರ್ಯಕರ್ತರಿಗೆ ಬಾಗಿಲು ಬಂದ್‌ ಮಾಡಲು ಬಿಜೆಪಿ ನಿರ್ಧಾರ

ಕೋಲ್ಕೊತಾ: ತೃಣಮೂಲ ಕಾಂಗ್ರೆಸ್‌ನಿಂದ ಸಾಮೂಹಿಕವಾಗಿ ವಲಸೆ ಬರುವವರಿಗೆ ಪಕ್ಷದ ಬಾಗಿಲು ಬಂದ್‌ ಮಾಡಲು ಬಿಜೆಪಿ ತೀರ್ಮಾನಿಸಿದೆ.

''ಈಗಾಗಲೇ ಪಕ್ಷದೊಳಗೆ ವಲಸಿಗರು ಹಾಗೂ ಮೂಲನಿವಾಸಿಗಳೆಂಬ 'ಸಂಘರ್ಷ' ಆರಂಭವಾಗಿದೆ. ಟಿಎಂಸಿಯ ಗುಳೆ ಪರ್ವ ಮುಂದುವರಿದರೆ ಈ ಅಸಮಾಧಾನ ಭುಗಿಲೇಳಬಹುದು,'' ಎಂಬ ಆತಂಕ ಬಿಜೆಪಿಯ ರಾಜ್ಯ ನಾಯಕರನ್ನು ಕಾಡಲಾರಂಭಿಸಿದೆ. ಹೀಗಾಗಿ ಆಯ್ದ ಮುಖಂಡರು ಮತ್ತು ಸ್ಥಳೀಯವಾಗಿ ಪ್ರಾಬಲ್ಯ ಹೊಂದಿರುವ ಧುರೀಣರನ್ನು ಮಾತ್ರವೇ ಸೇರ್ಪಡೆ ಮಾಡಿಕೊಳ್ಳಲು ಪಕ್ಷ ತೀರ್ಮಾನಿಸಿದೆ.

''ಪಶ್ಚಿಮ ಬಂಗಾಳ ಬಿಜೆಪಿಯು ತೃಣಮೂಲ ಕಾಂಗ್ರೆಸ್‌ನ ಬಿ ಟೀಮ್‌ ಆಗುವುದು ನಮಗೆ ಬೇಕಿಲ್ಲ. ಆದ್ದರಿಂದಲೇ ಇನ್ನುಮುಂದೆ ಟಿಎಂಸಿಯಿಂದ ಬರುವವರನ್ನು ಸ್ವಾಗತಿಸುವ ವಿಷಯದಲ್ಲಿ ಎಚ್ಚರ ವಹಿಸಲು ನಿರ್ಧರಿಸಿದ್ದೇವೆ. ಸೂಕ್ತ ಪರಿಶೀಲನೆ ಬಳಿಕವೇ ಪಕ್ಷಕ್ಕೆ ಸೇರಿಸಿಕೊಳ್ಳಲು ತೀರ್ಮಾನಿಸಿದ್ದೇವೆ'' ಎಂದು ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಕೈಲಾಶ್‌ ವಿಜಯವರ್ಗೀಯ ತಿಳಿಸಿದ್ದಾರೆ.