ತಮಿಳುನಾಡಿನಲ್ಲಿಯೇ ಹಿಂದಿ ಕಲಿಕೆಗೆ ಭಾರಿ ಆಸಕ್ತಿ!

ಚೆನ್ನೈ: ಕೇಂದ್ರ ಸರಕಾರದ ವಿವಾದಾತ್ಮಕ ತ್ರಿಭಾಷಾ ಸೂತ್ರವನ್ನು ವಿರೋಧಿಸಿ ಭಾರಿ ಪ್ರತಿಭಟನೆ ನಡೆಸಿದ್ದ ತಮಿಳುನಾಡಿನಲ್ಲಿಯೇ ಸದ್ದಿಲ್ಲದೇ ಜನರು ಸ್ವ ಆಸಕ್ತಿಯಿಂದ ಹಿಂದಿ ಕಲಿಯುತ್ತಿದ್ದಾರೆ! 'ದಕ್ಷಿಣ ಭಾರತ ಹಿಂದಿ ಪ್ರಚಾರ ಸಭಾ'ದ ಅಂಕಿ-ಅಂಶಗಳಿಂದ ಈ ಮಾಹಿತಿ ಹೊರಬಿದ್ದಿದೆ.

ದಕ್ಷಿಣ ಭಾರತದ ರಾಜ್ಯಗಳ ಪ್ರತಿಭಟನೆಗೆ ಮಣಿದು ತ್ರಿಭಾಷಾ ಕಲಿಕಾ ಸೂತ್ರದ ವಿವಾದಾತ್ಮಕ ಸಲಹೆಯನ್ನು ಕೇಂದ್ರ ಕೈಬಿಟ್ಟಿದ್ದು, ಹಿಂದಿ ಕಲಿಕೆ ಕಡ್ಡಾಯವಲ್ಲ, ಅದೊಂದು ಆಯ್ಕೆ ಮಾತ್ರ ಎಂದು ಸ್ಪಷ್ಟನೆಯನ್ನೇನೊ ನೀಡಿದೆ. ಆದರೆ ಹಿಂದಿ ಕಲಿಕೆಗೆ ದಕ್ಷಿಣ ಭಾರತದ ರಾಜ್ಯಗಳು ಆಸಕ್ತಿ ತೋರಿದ್ದು, ಅದರಲ್ಲಿ ತಮಿಳುನಾಡೇ ಮೊದಲ ಸ್ಥಾನದಲ್ಲಿದೆ. ದಕ್ಷಿಣ ಭಾರತ ಹಿಂದಿ ಪ್ರಚಾರ ಸಭಾ, 'ಪರಿಚಯ' ದಿಂದ 'ಪ್ರವೀಣ' ಎಂಬ ವಿಭಾಗದವರೆಗೆ ಅನೇಕ ಪರೀಕ್ಷೆಗಳನ್ನು ನಡೆಸುತ್ತಿದೆ. 2018ರಲ್ಲಿ ಇಂತಹ ಪರೀಕ್ಷೆಗಳಿಗೆ ತಮಿಳುನಾಡಿನಿಂದಲೇ 5.80ಲಕ್ಷ ಅಭ್ಯರ್ಥಿಗಳು ಹಾಜರಾಗಿದ್ದಾರೆ. ತೆಲಂಗಾಣದಿಂದ 2.4 ಲಕ್ಷ, ಕರ್ನಾಟಕದಿಂದ 60 ಸಾವಿರ ಹಾಗೂ ಕೇರಳದಿಂದ 21 ಸಾವಿರ ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ದಾರೆ. ಅದಕ್ಕಿಂತ ಹೆಚ್ಚಾಗಿ ತಮಿಳುನಾಡು ಇತ್ತೀಚಿನ ವರ್ಷಗಳಲ್ಲಿ ಶೇ.100ರಷ್ಟು ಫಲಿತಾಂಶ ದಾಖಲಿಸಿದೆ ಎಂದು ಅಂಕಿ-ಅಂಶಗಳು ತಿಳಿಸಿವೆ.