12ನೇ ಮಹಡಿ ಕಿಟಕಿಯಿಂದ ಬಿದ್ದು ಮಗು ಸಾವು

ಚೆನ್ನೈ: ವಲ್ಲಾಜ್‌ ರಸ್ತೆಯಲ್ಲಿರುವ ಅಪಾರ್ಟ್‌ಮೆಂಟ್‌ನ 12ನೇ ಮಹಡಿಯ ಬೆಡ್‌ರೂಂನಲ್ಲಿ ಏಕಾಂಗಿಯಾಗಿ ಮಲಗಿದ್ದ ಮಗು ಎಚ್ಚರಗೊಂಡ ಬಳಿಕ ಬೆಡ್‌ನಿಂದ ಎದ್ದು ಅಂಬೆಗಾಲಿಡುತ್ತ ಕಿಟಕಿಯತ್ತ ಹೋಗಿ ಕೆಳಗೆ ಬಿದ್ದು ಮೃತಪಟ್ಟಿದೆ.

ನಾರಾಯಣ ಅರಿಹಂತ್ ಒಶನ್ ಟವರ್‌ನಲ್ಲಿರುವ ಈ ಮನೆಯ ಕಿಟಕಿ ಮತ್ತು ಬೆಡ್‌ ಎತ್ತರ ಸಮವಾಗಿದ್ದು, ಕಿಟಕಿಗೆ ಯಾವುದೇ ಗ್ರಿಲ್ ಅಳವಡಿಸಲಾಗಿಲ್ಲ. ತಾಯಿ ಅಜಿರಾ ಬೆಳಗ್ಗೆ ಅಡುಗೆ ಮನೆಯಲ್ಲಿದ್ದಾಗ ಒಂದೂವರೆ ವರ್ಷದ ಮಗು ಮೊಹಮ್ಮದ್ ಫತೂಸ್ ಎಚ್ಚರಗೊಂಡಿದ್ದು, ಅಂಬೆಗಾಲಿಡುತ್ತ ಕಿಟಕಿಯತ್ತ ಹೋಗಿದೆ. ತಂದೆ ಯಾಕೂಬ್ ಭಾಯ್ ಮತ್ತೊಂದು ರೂಂನಲ್ಲಿದ್ದರು.

9.30ರ ವೇಳೆಗೆ ಅಜಿರಾ ಅವರು ಬೆಡ್‌ರೂಂಗೆ ಹೋದಾಗ ಮಗು ಕಾಣಲಿಲ್ಲ. ಹುಡಕಾಡಿದ ಬಳಿಕ ಅವರಿಗೆ ಕಿಟಕಿ ತೆರದಿಟ್ಟಿದ್ದು ಗ್ರಿಲ್‌ ಇಲ್ಲದಿರುವ ಬಗ್ಗೆ ಅರಿವಾಗಿದ್ದು, ಅಪಾಯದ ಮುನ್ಸೂಚನೆ ನೀಡಿದೆ. ಅದೇ ವೇಳೆಗೆ ಮಗು ಕೆಳಗೆ ಬೀಳುತ್ತಿರುವುದನ್ನು ನೋಡಿ ಭದ್ರತಾ ಸಿಬ್ಬಂದಿ ಓಡಿ ಬಂದಿದ್ದಾರೆ. ಮಗುವನ್ನು ತಕ್ಷಣ ಆಸ್ಪತ್ರೆಗೆ ಕರೆದೊಯ್ದರೂ ಫಲಕಾರಿಯಾಗಲಿಲ್ಲ.

ಯಾವಾಗಲೂ ಕಿಟಕಿ ಮುಚ್ಚಿರುತ್ತಿತ್ತು, ಏರ್ ಕಂಡಿಷನರ್ ಸ್ವಿಚ್ಡ್‌ ಆಫ್ ಆಗಿದ್ದ ಕಾರಣ ಮಂಗಳವಾರ ಕಿಟಕಿ ತೆರೆದಿಡಲಾಗಿತ್ತು ಎಂದು ದಂಪತಿ ತಿಳಿಸಿದ್ದು, ಪ್ರಕರಣ ದಾಖಲಿಸಿಲ್ಲ.