ಪಾನಿ ಪೂರಿ ಟೇಸ್ಟ್‌ ರಹಸ್ಯ: ಟಾಯ್ಲೆಟ್‌ ಕ್ಲೀನರ್‌

ಅಹಮದಾಬಾದ್‌: ಪಾನಿಪೂರಿಯನ್ನು ರುಚಿಕಟ್ಟಾಗಿಸಲು ಅದಕ್ಕೆ ಟಾಯ್ಲೆಟ್‌ ಕ್ಲೀನರ್‌ ಮಿಕ್ಸ್‌ ಮಾಡುತ್ತಿದ್ದ ಅಹಮದಾಬಾದ್‌ನ ವ್ಯಾಪಾರಿಗೆ ನ್ಯಾಯಾಲಯವು ಆರು ತಿಂಗಳ ಜೈಲುವಾಸ ವಿಧಿಸಿದೆ.

ಅಹಮದಾಬಾದ್‌ ಮುನ್ಸಿಪಲ್‌ ಕಾರ್ಪೊರೇಷನ್‌ಗೆ ಬಂದಿದ್ದ ದೂರು ಆಧರಿಸಿ ಪ್ರಯೋಗಾಲಯಕ್ಕೆ ಮಾದರಿ ಕಳಿಸಿ ಪರೀಕ್ಷೆಗೆ ಒಳಪಡಿಸಿದಾಗ ಪಾನಿಪೂರಿಯಲ್ಲಿ ಟಾಯ್ಲೆಟ್‌ ಕ್ಲೀನರ್‌ ಮಿಕ್ಸ್‌ ಮಾಡಿರುವುದು ದೃಢಪಟ್ಟಿದೆ.

ಲಾಲ್‌ ದರ್ವಾಜ ಬಳಿ ಪಾನಿಪೂರಿ ಮಾರುತ್ತಿದ್ದ ಚೇತನ್‌ ನಂಜಿ ಮಾರ್ವಾಡಿ ಎಂಬಾತ ನೀರಿಗೆ ಏನೋ ಮಿಕ್ಸ್‌ ಮಾಡುತ್ತಿರುವುದಾಗಿ ವ್ಯಕ್ತಿಯೊಬ್ಬರು ದೂರು ನೀಡಿದ್ದರು. ಪರೀಕ್ಷೆ ನಡೆಸಿದಾಗ ಅದರಲ್ಲಿ ಟಾಯ್ಲೆಟ್‌ ಕ್ಲೀನರ್‌ನಲ್ಲಿರುವ ಒಕ್ಸಾಲಿಕ್‌ ಆ್ಯಸಿಡ್‌ ಪತ್ತೆಯಾಗಿದೆ. 2009ರಿಂದ ಆರೋಪಿ ಈ ಕೃತ್ಯ ನಡೆಸುತ್ತಾ ಬಂದಿದ್ದಾನೆ.

ಈ ಕಲಬೆರಕೆ ಪ್ರಕರಣದ ವಿಚಾರಣೆ ನಡೆಸಿರುವ ವಿಶೇಷ ನ್ಯಾಯಾಲಯವು ಅಪರಾಧಿ ಚೇತನ್‌ ನಂಜಿ ಮಾರ್ವಾಡಿಗೆ ಆರು ತಿಂಗಳ ಜೈಲು ವಿಧಿಸಿದೆ. ಇಂಥ ಪ್ರಕರಣದಲ್ಲಿ ವಿಶೇಷ ನ್ಯಾಯಾಲಯವು ವಿಚಾರಣೆ ನಡೆಸಿ ಆರೋಪಿಗೆ ಶಿಕ್ಷೆ ವಿಧಿಸಿರುವುದು ಇದೇ ಮೊದಲು.