'ಭಾರತ್‌ ಮಾತಾ ಕೀ ಜೈ' ಫತ್ವಾ ವಿರುದ್ಧ ಇಮಾಮ್‌ಗಳ ಕಿಡಿ

ಲಖನೌ: 'ಭಾರತ್‌ ಮಾತಾ ಕೀ ಜೈ' ಘೋಷಣೆ ವಿಚಾರವಾಗಿ ರಾಜಕೀಯ ಕಿತ್ತಾಟ ನಡೆದಿರುವ ನಡುವೆಯೇ, ಈ ಸಂಬಂಧ ದರೂಲ್‌ ಉಲೂಮ್‌ ದೇವಬಂದ್‌ ಹೊರಡಿಸಿರುವ ಫತ್ವಾವನ್ನು ಇಮಾಮ್‌ಗಳು ಖಂಡಿಸಿದ್ದಾರೆ.
'ಮುಸ್ಲಿಂ ಧಾರ್ಮಿಕ ಸಂಸ್ಥೆ ಎಲ್ಲ ವಿಷಯಗಳ ಸಂಬಂಧ ಫತ್ವಾ ಹೊರಡಿಸುವ ಅಗತ್ಯ ಇಲ್ಲ. ದೇವತೆಯ ಸ್ತುತಿಗೆ ಸಮ ಎಂದು ಭಾವಿಸಿ ಮುಸ್ಲಿಮರು 'ಭಾರತ್‌ ಮಾತಾ ಕೀ ಜೈ'ಎಂಬ ಘೋಷಣೆ ಕೂಗುವುದನ್ನು ನಿಲ್ಲಿಸಬಾರದು,'ಎಂದು ಹೇಳಿದ್ದಾರೆ.

'ಹಿಂದೂಸ್ಥಾನ್‌ ಜಿಂದಾಬಾದ್‌' ಎಂಬ ಘೋಷಣೆ ಕೂಗಲು ಮುಸ್ಲಿಮರಿಗೆ ಅಭ್ಯಂತರ ಇಲ್ಲವಾದರೆ, 'ಭಾರತ್‌ ಮಾತಾ ಕೀ ಜೈ' ಎಂಬ ಘೋಷಣೆ ಕೂಗಲು ಯಾವುದೇ ಆಕ್ಷೇಪ ಇರಬಾರದು,'ಎಂದು ಲಖನೌ ಈದ್ಗಾದ ಇಮಾಮ್‌ ಮೌಲಾನಾ ಖಲೀದ್‌ ಹೇಳಿದ್ದಾರೆ.

'ನಾವು ನಮ್ಮ ತಾಯ್ನಾಡನ್ನು ಪ್ರೀತಿಸುತ್ತೇವೆ. ಅದನ್ನು ಘೋಷಿಸುವುದರಲ್ಲಿ ತಪ್ಪೇನು. ಪ್ರತಿ ವಿಷಯಗಳಿಗೂ ಫತ್ವಾ ಹೊರಡಿಸುವುದರಿಂದ ಅದರ ಮೌಲ್ಯ ಕುಗ್ಗುವುದು,'ಎಂದು ಮೌಲಾನಾ ಖಲೀದ್‌ ರಶೀದ್‌ ಹೇಳಿದ್ದಾರೆ.

ದೇಶ ದ್ರೋಹದ ಪ್ರಕರಣ ದಾಖಲಿಸಿ

ಮುಸ್ಲಿಮರು 'ಭಾರತ್‌ ಮಾತಾ ಕೀ ಜೈ' ಎಂಬ ಘೋಷಣೆ ಕೂಗಬಾರದು ಎಂದು ದರೂಲ್‌ ಉಲೂಮ್‌ ದೇವಬಂದ್‌ ಶುಕ್ರವಾರ ಫತ್ವಾ ಹೊರಡಿಸಿತ್ತು. ಈ ಬಗ್ಗೆ ರಾಷ್ಟ್ರಾದ್ಯಂತ ಚರ್ಚೆ ನಡೆದಿದೆ. ಮುಸ್ಲಿಂ ಧಾರ್ಮಿಕ ಸಂಸ್ಥೆಯನ್ನು 'ಉಗ್ರರ ಕಾರ್ಖಾನೆ' ಎಂದಿರುವ ವಿಶ್ವ ಹಿಂದೂ ಪರಿಷತ್‌, ಸಂಸ್ಥೆಯನ್ನು ನಿಷೇಧಿಸುವಂತೆ ಆಗ್ರಹಿಸಿದೆ. ಜತೆಗೆ, ಫತ್ವಾ ಹೊರಡಿಸಿದವರ ವಿರುದ್ಧ ದೇಶ ದ್ರೋಹದ ಪ್ರಕರಣ ದಾಖಲಿಸಲು ಒತ್ತಾಯಿಸಿದೆ.