ಧಗೆ ಧಗೆ; ಟ್ರಾಫಿಕ್ ಪೊಲೀಸರಿಗೆ AC ಹೆಲ್ಮೆಟ್

ಹೊಸದಿಲ್ಲಿ: ಸಂಚಾರಿ ಪೊಲೀಸರೆಂದರೆ ಸೈನಿಕರಂತೆ. ಚಳಿ, ಮಳೆ, ಗಾಳಿ, ಬಿಸಿಲೆನ್ನದೆ ಅವರು ತಮ್ಮ ಕರ್ತವ್ಯವನ್ನು ಮಾಡುತ್ತಲೇ ಇರುತ್ತಾರೆ. ಬೇಸಿಗೆಯಲ್ಲಿ ಉರಿ ಬಿಸಿಲ ದಗೆಗೆ ಹಣೆಯಿಂದ ಸೋರುತ್ತಿರುವ ಬೆವರು ಒರೆಸಿಕೊಳ್ಳುತ್ತ ಸುಸ್ತಾಗುವ ಅವರ ದಯನೀಯ ಸ್ಥಿತಿಯನ್ನು ನೋಡಲಾಗದೆ ಛತ್ತೀಸಘಡ ಸರಕಾರ ಅವರಿಗಾಗಿ ವಿನೂತನ ವ್ಯವಸ್ಥೆಯೊಂದನ್ನು ಮಾಡಲು ಹೊರಟಿದೆ. ಸರಕಾರವೀಗ ಅವರಿಗೆ ಹವಾನಿಯಂತ್ರಿತ ಶಿರಸ್ತ್ರಾಣವನ್ನು ನೀಡುವ ಯೋಜನೆ ಜಾರಿಗೆ ತರುತ್ತಿದೆ. ಬಿಸಿಲಲ್ಲಿ ಕೆಲಸ ಮಾಡುವ ಎಲ್ಲ ಸರಕಾರಿ ಸಿಬ್ಬಂದಿಗಳಿಗೆ ಈ ಯೋಜನೆ ಅನ್ವಯವಾಗಲಿದೆ.

ಪ್ರಯೋಗಾರ್ಥವಾಗಿ ಎರಡು ಹೆಲ್ಮೆಟ್‌ಗಳನ್ನು ನೀಡಿ ಪರೀಕ್ಷಿಸುವೆವು. ಎಲ್ಲ ಸರಿ ಎನ್ನಿಸಿದರೆ ಸಂಚಾರಿ ಪೊಲೀಸರಿಗೆಲ್ಲ ಈ ಹೆಲ್ಮೆಟ್‌ನ್ನು ನೀಡಲಾಗುವುದು ಎಂದು ಛತ್ತೀಸಗಢ ಪೊಲೀಸ್ ಮಹಾನಿರ್ದೇಶಕ ಡಿ. ಎಮ್ ಅವಸ್ಥಿ ಹೇಳಿದ್ದಾರೆ.

ಈ ಹೆಲ್ಮೆಟ್ ಧರಿಸುವುದರ ಪರಿಣಾಮವನ್ನು ಪರೀಕ್ಷಿಸಲು ಅವಸ್ಥಿ ಅವರು ಸ್ವತಃ ತಾವೇ ಅದನ್ನು ಧರಿಸಿ ಪರೀಕ್ಷಿಸಿದ್ದಾರೆ. ರಾಜ್ಯದಲ್ಲಿ 10ಸಾವಿರಕ್ಕೂ ಹೆಚ್ಚು ಪೊಲೀಸ್ ಅಧಿಕಾರಿಗಳು ವಿಪರೀತ ದಗೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅವರಿಗೆಲ್ಲ ಈ ಯೋಜನೆ ಪ್ರಯೋಜನವಾಗಲಿದೆ ಎಂದವರು ಆಶಯ ವ್ಯಕ್ತ ಪಡಿಸಿದ್ದಾರೆ.