ಟ್ರಂಪ್‌ ಎಫೆಕ್ಟ್‌: ಉದ್ಯೋಗಾಂಕ್ಷಿಗಳಿಗೆ ಅಮೆರಿಕಕ್ಕಿಂತ ಭಾರತದ ಮೇಲೆ ವ್ಯಾಮೋಹ

ಬೆಂಗಳೂರು: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಜಾರಿಗೆ ತಂದಿರುವ ವಲಸೆ ನೀತಿಯಿಂದಾಗಿ ಅಮೆರಿಕದಲ್ಲಿ ಕೆಲಸ ಅರಸಿ ಹೋಗುವ ಭಾರತೀಯರ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿದೆ. ಆದರೆ ಭಾರತದ ಮೇಲೆ ಈಗ ವ್ಯಾಮೋಹ ಹೆಚ್ಚಾಗುತ್ತಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅಧಿಕಾರಕ್ಕೆ ಬರುವ ಮುನ್ನವೇ ಅಂದರೆ ಕಳೆದ ವರ್ಷದ ಸೆಪ್ಟೆಂಬರ್‌ನಿಂದ ಅಕ್ಟೋಬರ್‌ 2017ರವರೆಗೆ ಅಮೆರಿಕ್ಕೆ ತೆರಳಲು ಬಯಸಿದ್ದ ಭಾರತೀಯರ ಸಂಖ್ಯೆ ಶೇ 38 ರಿಂದ 42ರಷ್ಟು ಇಳಿಕೆಯಾಗಿದೆ.

ಅಮೆರಿಕದಲ್ಲಿ ಕೆಲಸಕ್ಕಾಗಿ ವಲಸೆ ಹೋಗುವವರ ಸಂಖ್ಯೆ ಈ ಹಿಂದಿನಿಂದಲೂ ಏರಿಕೆಯಾಗುತ್ತಿತ್ತು. ಆದರೆ ಕಳೆದ ಒಂದು ವರ್ಷದಿಂದ ಇದರ ಸಂಖ್ಯೆ ಕಡಿಮೆಯಾಗಿದೆ. ಅಲ್ಲಿರುವವರ ಸ್ಥಿತಿ ಅಸ್ಥಿರವಾಗಿರುವ ಹಿನ್ನೆಲೆಯಲ್ಲಿ ಅಮೆರಿಕ ವ್ಯಾಮೋಹ ಕಡಿಮೆಯಾಗಿದೆ ಎಂದು ವರದಿಯೊಂದು ತಿಳಿಸಿದೆ.

ಅಚ್ಚರಿಯ ವಿಷಯ ಎಂದರೆ ಏಷ್ಯಾ ಪೆಸಿಫಿಕ್‌ ಪ್ರಾಂತ್ಯದಿಂದ ಭಾರತಕ್ಕೆ ಉದ್ಯೋಗ ಅರಸಿ ಬರುತ್ತಿರುವವರ ಸಂಖ್ಯೆ ಹೆಚ್ಚಾಗಿದೆ.

ಜಾಗತಿಕ ಮಟ್ಟದಲ್ಲಿ ಭಾರತ ಪವರ್‌ಫುಲ್‌ ಆಗುತ್ತಿರುವುದು ಸಾಬೀತಾಗುತ್ತಿದೆ. ಅದರಲ್ಲೂ ಭಾರತೀಯ ಆರ್ಥಿಕತೆ ಗ್ರಾಫ್‌ ಏರುಮುಖದಲ್ಲಿ ಸಾಗುತ್ತಿದೆ. ಇದರಿಂದ ಭಾರತದಲ್ಲಿ ಉದ್ಯೋಗ ಅರಸಿ ಬರುತ್ತಿರುವವರ ಸಂಖ್ಯೆ ಹೆಚ್ಚಾಗಿದೆ ಎಂದು ಹೇಳುತ್ತಾರೆ ಇಂಡೀಡ್‌ ಇಂಡಿಯಾ ವ್ಯವಸ್ಥಾಪಕ ನಿರ್ದೇಶಕ ಶಶಿಕುಮಾರ್‌.

ತೈಲ ಬೆಲೆಯಲ್ಲಿ ಅಸ್ಥಿರತೆ, ಆರ್ಥಿಕತೆ ಇಳಿಕೆ ಪರಿಣಾಮದಿಂದಾಗಿ ಕೊಲ್ಲಿ ರಾಷ್ಟ್ರಗಳಿಗೆ ಉದ್ಯೋಗ ಅರಸಿ ತೆರಳುವವರ ಸಂಖ್ಯೆ ಕೂಡ ಕಡಿಮೆಯಾಗಿದೆ.

ಇಷ್ಟೆಲ್ಲ ಇದ್ದರೂ ಈಗಲೂ ಶೇಕಡ 49ರಷ್ಟು ಭಾರತೀಯರು ಅಮೆರಿಕದಲ್ಲಿ ಕೆಲಸ ಮಾಡಲು ಇಚ್ಛಿಸಿದ್ದಾರೆ. ನಂತರದ ಸ್ಥಾನಗಳಲ್ಲಿ ಯುಎಇ, ಕೆನಡಾ, ಗ್ರೇಟ್‌ ಬ್ರಿಟನ್‌, ಸಿಂಗಾಪುರ, ಆಸ್ಟ್ರೇಲಿಯಾ, ಖತಾರ್‌, ದಕ್ಷಿಣ ಆಫ್ರಿಕಾ, ಬಹರೇನ್‌ ಇದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

Trump effect? 40% decline in Indians looking for work in US