​ನಗ್ರೋತಾ ಎನ್‌ಕೌಂಟರ್‌: ಪಾಕ್‌ ಗಡಿಯಲ್ಲಿ ಸುರಂಗ ಪತ್ತೆ | ಉಗ್ರರು ಇಲ್ಲಿಂದಲೇ ಒಳನುಸುಳಿರುವ ಶಂಕೆ

ಜಮ್ಮು: ಭಾರತೀಯ ಯೋಧರ ಗುಂಡಿಗೆ ಬಲಿಯಾದ ಪಾಕಿಸ್ತಾನ ಮೂಲದ ಜೈಷೆ ಮೊಹಮ್ಮದ್‌ ಉಗ್ರ ಸಂಘಟನೆಯ ನಾಲ್ವರು ಉಗ್ರರು ನುಸುಳಿ ಬಂದಿದ್ದ ಸಾಂಬಾ ಅಂತಾರಾಷ್ಟ್ರೀಯ ಗಡಿ ಸಮೀಪ ಶೋಧ ಕಾರ್ಯ ಇನ್ನಷ್ಟು ತ್ವರಿತಗೊಂಡಿದೆ. ಈ ಭಾಗದಲ್ಲಿ ಸುರಂಗ ಮಾರ್ಗ ಪತ್ತೆಯಾಗಿದ್ದು, ಇದನ್ನು ಬಳಸಿಯೇ ಉಗ್ರರು ನುಸುಳಿ ಬಂದಿರಬಹುದು ಎಂದು ಶಂಕಿಸಲಾಗಿದೆ.

ತೀವ್ರ ಕಟ್ಟೆಚ್ಚರದ ನಡುವೆಯೂ ಜೈಷೆ ಉಗ್ರರು ಗಡಿ ದಾಟಿ ಬಂದಿದ್ದರು. ಕಾಶ್ಮೀರಕ್ಕೆ ತೆರಳುವ ಲಾರಿ ಹತ್ತಿ ಹೋಗುತ್ತಿದ್ದಾಗ ಜಮ್ಮು-ಶ್ರೀನಗರ ರಾಷ್ಟ್ರೀಯ ಹೆದ್ದಾರಿ ಬಾನ್‌ ಟೋಲ್‌ ಫ್ಲಾಜಾ ಬಳಿ ತಡೆಯಲಾಗಿತ್ತು. ಆ ವೇಳೆ ನಡೆದ ಎನ್‌ಕೌಂಟರ್‌ನಲ್ಲಿ ನಾಲ್ವರು ಪಾತಕಿಗಳು ಹತರಾಗಿದ್ದರು. ನವೆಂಬರ್‌ 28ರಿಂದ ರಾಜ್ಯದಲ್ಲಿ ಆರಂಭವಾಗಲಿರುವ ಸ್ಥಳೀಯ ಸಂಸ್ಥೆ ಚುನಾವಣೆ ವೇಳೆ ವ್ಯಾಪಕ ವಿಧ್ವಂಸಕ ಕೃತ್ಯ ಎಸಗುವ ಸಂಚಿನೊಂದಿಗೆ ಈ ಉಗ್ರರು ಬಂದಿದ್ದರು ಎಂದು ಭದ್ರತಾ ಮೂಲಗಳು ಸ್ಪಷ್ಟಪಡಿಸಿವೆ.

ಈ ಉಗ್ರರು ನುಸುಳಿ ಬಂದ ಪ್ರದೇಶಗಳಲ್ಲಿ ಶುಕ್ರವಾರದಿಂದಲೂ ಸೇನೆ ಬಿರುಸಿನ ಕಾರ್ಯಾಚರಣೆ ನಡೆಸಿದೆ. ಭಾನುವಾರವೂ ಸುರಂಗ ಶೋಧ ಕಾರ್ಯಾಚರಣೆ ನಡೆಯಿತು ಎಂದು ಸೇನಾ ವಕ್ತಾರರು ತಿಳಿಸಿದ್ದಾರೆ.

ನಗ್ರೋತಾ ಸಂಚು‌: ಉಗ್ರರಿಗೆ ಪಾಕ್‌ ಸೇನೆ ನೆರವು..! ಮತ್ತೊಂದು 26/11 ಮಾದರಿ ದಾಳಿ ವಿಫಲ

ನದಿ ಮಾರ್ಗ
ಗಡಿಯಲ್ಲಿ ಇರುವ ನೋನಾಥ್‌ ನಾಲಾಗುಂಟ ಉಗ್ರರು ನಡೆದು ಬಂದಿರುವ ಸಾಧ್ಯತೆ ಇದೆ. ಈ ಪ್ರದೇಶದಲ್ಲಿ ಕಾಲ್ನಡಿಗೆಯ ಕಚ್ಚಾ ರಸ್ತೆಗಳು ಪತ್ತೆಯಾಗಿವೆ. ಸುಮಾರು ಮೂರು ಗಂಟೆ ಉಗ್ರರು ನಡೆದು ಸುರಂಗದ ಮೂಲಕ ಭಾರತದ ಗಡಿ ಪ್ರವೇಶಿಸಿ, ಬಳಿಕ ಲಾರಿಯಲ್ಲಿ ಪ್ರಯಾಣ ಬೆಳೆಸಿರಬಹುದು ಎಂದು ಸೇನಾಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಈ ಉಗ್ರರಿಗೆ ಪಾಕ್‌ ಸೇನಾ ನೆಲೆಗಳಲ್ಲಿಯೇ ಆಶ್ರಯ ನೀಡಿ, ತರಬೇತಿ ನೀಡಿದ್ದನ್ನೂ ಸೇನೆ ಪತ್ತೆ ಮಾಡಿದೆ.

ದೇಶಕ್ಕೆ ದೊಡ್ಡ ಹಾನಿ ಮಾಡುವ ಪ್ರಯತ್ನ ವಿಫಲ: ನಗ್ರೋತಾ ಸಂಚು ಖಂಡಿಸಿದ ಪ್ರಧಾನಿ!

ಆತ್ಮಾಹುತಿ ದಾಳಿಕೋರರುನಗ್ರೊತಾ ಎನ್‌ಕೌಂಟರ್‌ನಲ್ಲಿ ಮೃತಪಟ್ಟ ಉಗ್ರರು ಆತ್ಮಾಹುತಿ ದಾಳಿಕೋರರೇ ಇರಬಹುದು. ಮರಣೋತ್ತರ ಪರೀಕ್ಷೆ ವೇಳೆ ಪತ್ತೆಯಾದ ಕೆಲವು ಲಕ್ಷಣಗಳಿಂದ ಅವರು ಜಿಹಾದಿಗಳೇ ಇರಬಹುದೆಂಬ ನಿರ್ಧಾರಕ್ಕೆ ಬರಲಾಗಿದೆ ಎಂದೂ ಅವರು ಮಾಹಿತಿ ನೀಡಿದ್ದಾರೆ.