ಟ್ವಿಟರ್‌ನಲ್ಲಿ 5 ಕೋಟಿ ದಾಟಿದ ಪ್ರಧಾನಿ ಮೋದಿ ಫಾಲೋವರ್ಸ್‌

ಹೊಸದಿಲ್ಲಿ: ಸಾಮಾಜಿಕ ಜಾಲತಾಣಗಳನ್ನು ಸಮರ್ಥವಾಗಿ ಬಳಸಿಕೊಂಡು ಜನತೆಯನ್ನು ತಲುಪುವ ಕಲೆ ಕರಗತ ಮಾಡಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಟ್ವಿಟರ್‌ನಲ್ಲಿ ಫಾಲೋವರ್‌ಗಳ ಸಂಖ್ಯೆ 5 ಕೋಟಿ ದಾಟಿದೆ.

ಟ್ವಿಟರ್‌ನಲ್ಲಿ ಅತ್ಯಧಿಕ ಹಿಂಬಾಲಕರನ್ನು ಪಡೆದುಕೊಂಡಿರುವ ಪ್ರಧಾನಿ ಮೋದಿ, ಇದೀಗ ಜಗತ್ತಿನ ಅಗ್ರ ನಾಯಕರಲ್ಲಿ ಒಬ್ಬರಾಗಿ ಹೊರಹೊಮ್ಮಿದ್ದಾರೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ 6.4 ಕೋಟಿ ಫಾಲೋವರ್‌ಗಳನ್ನು ಹೊಂದಿದ್ದಾರೆ.

ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ 10.8 ಕೋಟಿ ಫಾಲೋವರ್‌ಗಳನ್ನು ಹೊಂದಿದ್ದು ನಂಬರ್ 1 ಸ್ಥಾನದಲ್ಲಿದ್ದಾರೆ.

ಭಾರತದ ಬೇರೆ ಯಾವನೇ ರಾಜಕಾರಣಿ ಪ್ರಧಾನಿ ಮೋದಿ ಅವರಿಗಿರುವಷ್ಟು ಹಿಂಬಾಲಕರನ್ನು ಹೊಂದಿಲ್ಲ. ಪ್ರಧಾನ ಮಂತ್ರಿಗಳ ಕಚೇರಿ 3 ಕೋಟಿ ಫಾಲೋವರ್‌ಗಳನ್ನು ಹೊಂದಿದೆ.


ವಾಕ್ಚಾತುರ್ಯಕ್ಕೆ ಹೆಸರಾಗಿರುವ ಪ್ರಧಾನಿ ಮೋದಿ, ಟ್ವಿಟರ್‌ನಲ್ಲಿ ಅತ್ಯಂತ ಕ್ರಿಯಾಶೀಲರಾಗಿದ್ದಾರೆ. ವಿವಿಧ ವೇದಿಕೆಗಳಲ್ಲಿ ತಮ್ಮ ಭಾಷಣ, ವಿವಿಧ ಸ್ಥಳಗಳಿಗೆ ನೀಡಿರುವ ಭೇಟಿ, ತಾವು ಭೇಟಿ ಮಾಡಿದ ವ್ಯಕ್ತಿಗಳು- ಹೀಗೆ ಪ್ರತಿಯೊಂದರ ಮಾಹಿತಿಯನ್ನೂ ಕ್ಷಿಪ್ರವಾಗಿ ಪ್ರಕಟಿಸುತ್ತಾರೆ.

2009ರಲ್ಲಿ ಮೋದಿ ಅವರು ಗುಜರಾತ್ ಮುಖ್ಯಮಂತ್ರಿಯಾಗಿದ್ದಾಗ ಟ್ವಿಟರ್‌ ಬಳಕೆ ಆರಂಭಿಸಿದ್ದರು. 2014ರಲ್ಲಿ ಪ್ರಧಾನಿ ಹುದ್ದೆಗೇರಿದ ಬಳಿಕ ಅವರ ಫಾಲೋವರ್‌ಗಳ ಸಂಖ್ಯೆ ತ್ವರಿತವಾಗಿ ಏರಿತು.

ಕಳೆದ ವರ್ಷ ಅಂತಾರಾಷ್ಟ್ರೀಯ ಸಮೀಕ್ಷೆಯೊಂದು ಮೋದಿ ಅವರನ್ನು ಜಗತ್ತಿನಲ್ಲೇ ಮೂವರು ಅಗ್ರ ನಾಯಕರ ಸಾಲಿನಲ್ಲಿ ಸೇರಿಸಿತ್ತು. ಗ್ಯಾಲಪ್ ಇಂಟರ್‌ನ್ಯಾಷನಲ್‌ ನಡೆಸಿದ ಸಮೀಕ್ಷೆ ಅದಾಗಿತ್ತು.