ಸಲಿಂಗಕಾಮ ಕಾನೂನುಬದ್ಧ: ಎರಡು ದಶಕಗಳ ಹೋರಾಟದ ಹಾದಿ

2001: ಇಬ್ಬರು ವಯಸ್ಕರ ನಡುವಿನ ಸಮ್ಮತ ಸಲಿಂಗಕಾಮವನ್ನು ಕಾನೂನುಬದ್ಧಗೊಳಿಸುವಂತೆ ಎನ್‌ಜಿಒ 'ನಾಜ್‌ ಫೌಂಡೇಶನ್‌'ನಿಂದ ದಿಲ್ಲಿ ಹೈಕೋರ್ಟ್‌ಗೆ ಅರ್ಜಿ.

2004: ಅರ್ಜಿ ವಜಾಗೊಳಿಸಿದ ಹೈಕೋರ್ಟ್‌. ಸಲಿಂಗಿ ಹಕ್ಕುಗಳ ಕಾರ‍್ಯಕರ್ತರಿಂದ ಮರುಪರಿಶೀಲನಾ ಅರ್ಜಿ. ಅದು ಮತ್ತೆ ತಿರಸ್ಕೃತ. ಇದನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಕೆ.

2006 ಏ.3: ಆದ್ಯತೆಯ ಮೇರೆಗೆ ಅರ್ಜಿಯನ್ನು ಪರಿಗಣಿಸುವಂತೆ ಹೈಕೋರ್ಟ್‌ಗೆ ಸೂಚಿಸಿದ ಸುಪ್ರೀಂ ನ್ಯಾಯಪೀಠ.

2006. ಅ.4: ಸಲಿಂಗಕಾಮವನ್ನು ಸಿಂಧುತ್ವಗೊಳಿಸುವುದಕ್ಕೆ ವಿರೋಧಿಸಿ ಬಿಜೆಪಿ ನಾಯಕ ಬಿ.ಪಿ.ಸಿಂಘಾಲ್‌ ಸಲ್ಲಿಸಿದ ಅರ್ಜಿಯನ್ನು ವಿಚಾರಣೆಗೆ ಪರಿಗಣಿಸಿದ ಹೈಕೋರ್ಟ್‌.

2008 ಸೆ.18: ಸಲಿಂಗಕಾಮ ಅಪರಾಧವೇ ಅಲ್ಲವೇ ಎಂಬ ವಿಚಾರದಲ್ಲಿ ಕೇಂದ್ರ ಗೃಹ ಮತ್ತು ಆರೋಗ್ಯ ಸಚಿವಾಲಯಗಳ ನಡುವೆ ಭಿನ್ನಮತ. ಪ್ರತಿಕ್ರಿಯೆ ನೀಡಲು ಹೆಚ್ಚುವರಿ ಸಮಯ ಕೋರಿ ಕೇಂದ್ರದಿಂದ ಹೈಕೋರ್ಟ್‌ಗೆ ಮನವಿ. ಆದರೆ ಇದು ತಿರಸ್ಕಾರ. ಅಂತಿಮ ವಾದ-ಪ್ರತಿವಾದ ಆರಂಭ.

ಸೆ.25: ನೈತಿಕತೆ ಆಧಾರದಲ್ಲಿ ಸಲಿಂಗಕಾಮ ಅಪರಾಧವೆಂದು ಘೋಷಿಸಿ ತಮ್ಮ ಮೂಲಭೂತ ಹಕ್ಕುಗಳನ್ನು ಸರಕಾರ ಕಸಿದುಕೊಳ್ಳಲು ಸಾಧ್ಯವಿಲ್ಲ ಎಂದು ಸಲಿಂಗಿಗಳ ಹಕ್ಕುಗಳ ಕಾರ‍್ಯಕರ್ತರಿಂದ ವಾದ.

ಸೆ. 26: ಸಲಿಂಗಕಾಮ ಅನೈತಿಕ. ಅದು ಅಪರಾಧ ಅಲ್ಲವೆಂದು ಘೋಷಿಸಿದರೆ ಸಮಾಜದ ಮೌಲ್ಯಗಳು ನೈತಿಕವಾಗಿ ಕುಗ್ಗುತ್ತದೆ ಎಂದ ಕೇಂದ್ರ.

ಅ.15: ಸಲಿಂಗಕಾಮದ ಮೇಲೆ ನಿರ್ಬಂಧ ಹೇರಲು ಧರ್ಮ ಗ್ರಂಥಗಳನ್ನು ಆಧಾರವಾಗಿಟ್ಟುಕೊಂಡ ಕೇಂದ್ರದ ವಿರುದ್ಧ ಹೈಕೋರ್ಟ್‌ ಗರಂ. ವೈಜ್ಞಾನಿಕ ವರದಿಗಳನ್ನು ಮಂಡಿಸುವಂತೆ ಸೂಚನೆ.

ನ.7: ಸಂಸತ್ತು ಈ ಬಗ್ಗೆ ನಿರ್ಧಾರ ಕೈಗೊಳ್ಳುತ್ತದೆ, ಮಧ್ಯಪ್ರವೇಶಿಸಬಾರದೆಂದು ಕೇಂದ್ರದಿಂದ ಲಿಖಿತ ಹೇಳಿಕೆ, ತೀರ್ಪು ಕಾಯ್ದಿರಿಸಿದ ಹೈಕೋರ್ಟ್‌.

2009 ಜು.2: ಸಲಿಂಗಿ ಕಾರ‍್ಯಕರ್ತರ ಅರ್ಜಿ ಪುರಸ್ಕರಿಸಿ, ಸಲಿಂಗಕಾಮ ಅಪರಾಧ ಅಲ್ಲ ಎಂದು ತೀರ್ಪು ನೀಡಿದ ಹೈಕೋರ್ಟ್‌.

2009 ಜು.9: ಹೈಕೋರ್ಟ್‌ ತೀರ್ಪು ಪ್ರಶ್ನಿಸಿ ಸುಪ್ರೀಂ ಮೊರೆ ಹೋದ ದಿಲ್ಲಿ ಜ್ಯೋತಿಷಿ. ಇದಕ್ಕೆ ಪೂರಕವಾಗಿ ಮತ್ತಷ್ಟು ಅರ್ಜಿಗಳು ದಾಖಲು.

2012, ಫೆ.5: ಅಂತಿಮ ಹಂತದ ದಿನಂ ಪ್ರತಿ ವಿಚಾರಣೆ ಆರಂಭಿಸಿದ ಸುಪ್ರೀಂ ಕೋರ್ಟ್‌. ತೀರ್ಪು ಕಾಯ್ದಿರಿಸಿದ ನ್ಯಾಯಪೀಠ.

2013, ಡಿ.11: ದಿಲ್ಲಿ ಹೈಕೋರ್ಟ್‌ ತೀರ್ಪು ವಜಾಗೊಳಿಸಿ, ಸಲಿಂಗಕಾಮ ಅಪರಾಧ ಎಂದು ಸುಪ್ರೀಂ ಘೋಷಣೆ.

2013, ಡಿ.20: ತೀರ್ಪು ಮರು ಪರಿಶೀಲಿಸುವಂತೆ ಕೋರಿ ಕೇಂದ್ರದಿಂದ ಸುಪ್ರೀಂಗೆ ಮನವಿ. 2014ರಲ್ಲಿ ಈ ಅರ್ಜಿ ವಜಾ.

2016, ಜೂ.30: ಕ್ಯೂರೇಟಿವ್‌ ಅರ್ಜಿಗಳ ವಿಚಾರಣೆಯನ್ನು ಪಂಚ ಸದಸ್ಯರ ನ್ಯಾಯಪೀಠಕ್ಕೆ ಒಪ್ಪಿಸಿದ ಸುಪ್ರೀಂ. ಇದೇ ವೇಳೆ ಕೆಲ ಸೆಲಬ್ರಿಟಿಗಳಿಂದ ಸೆಕ್ಷನ್‌ 377 ರದ್ದುಗೊಳಿಸುವಂತೆ ಅರ್ಜಿ ಸಲ್ಲಿಕೆ.

2017, ಆ.24: ಖಾಸಗಿತನವು ಮೂಲಭೂತ ಹಕ್ಕು. ಲೈಂಗಿಕ ಪ್ರವೃತ್ತಿಯು ವ್ಯಕ್ತಿಯೊಬ್ಬನ ಖಾಸಗಿತನದ ಅತ್ಯಂತ ಪ್ರಮುಖ ಭಾಗ ಎಂದು ಸುಪ್ರೀಂ ಪ್ರತಿಪಾದನೆ.

2018, ಜ.8: ತನ್ನ 2013ರ ತೀರ್ಪು ಮರುಪರಿಶೀಲಿಸುವ ಅಗತ್ಯವಿದೆ ಎಂದ ಸುಪ್ರೀಂ. ಐಪಿಸಿ ಸೆಕ್ಷ ನ್‌ 377 ಸಿಂಧುತ್ವ ಪ್ರಶ್ನಿಸಿ ಸಲ್ಲಿಕೆಯಾಗಿದ್ದ ಅರ್ಜಿಗಳು ವಿಸ್ತೃತ ಪೀಠಕ್ಕೆ ವರ್ಗಾವಣೆ. ಜುಲೈ 10ರಂದು ಪಂಚ ಸದಸ್ಯರ ಸಂವಿಧಾನ ಪೀಠದಿಂದ ವಿಚಾರಣೆ. ಜು.17ರಂದು ತೀರ್ಪು ಕಾಯ್ದಿರಿಸಿದ ಕೋರ್ಟ್‌.

2018 ಸೆ.6: ಸಲಿಂಗ ಕಾಮ ಅಪರಾಧವಲ್ಲ ಎಂದು ತೀರ್ಪು. ಐಪಿಸಿ ಸೆಕ್ಷ ನ್‌ 377 ರದ್ದುಗೊಳಿಸಿ ಆದೇಶ.