ಕ್ಯಾಬ್ ಚಾಲಕನಿಂದ ಲೈಂಗಿಕ ಕಿರುಕುಳ ಯತ್ನ: ಚಲಿಸುತ್ತಿರುವ ಕಾರಿನಿಂದ ಜಿಗಿದ ಯುವತಿಯರು!

ಅಮೃತ್‌ಸರ್: ಕ್ಯಾಬ್ ಚಾಲಕನೋರ್ವ ಲೈಂಗಿಕ ಕಿರುಕುಳ ನೀಡಲು ಆರಂಭಿಸಿದ್ದರಿಂದ ಗಾಬರಿಗೊಂಡ ಇಬ್ಬರು ಮಹಿಳೆಯರು, ಚಲಿಸುತ್ತಿರುವ ಕಾರಿನಿಂದ ಜಿಗಿದ ಘಟನೆ ಪಂಜಾಬ್‌ನಲ್ಲಿ ನಡೆದಿದೆ.

ಅಮೃತ್‌ಸರ್‌ನಲ್ಲಿ ಈ ಘಟನೆ ನಡೆದಿದ್ದು, ಕಾರಿನಲ್ಲಿ ಒಟ್ಟು ಮೂವರು ಮಹಿಳೆಯರು ಪ್ರಯಾಣ ಮಾಡುತ್ತಿದ್ದರು. ತುಸು ದೂರ ಹೋದ ಬಳಿಕ ಚಾಲಕ ಮೂವರು ಮಹಿಳೆಯರ ಪೈಕಿ ಒಬ್ಬಾಕೆಗೆ ಲೈಂಗಿಕ ಕಿರುಕುಳ ನೀಡಲು ಆರಂಭಿಸಿದ್ದಾನೆ. ಅಲ್ಲದೇ ಮಹಿಳೆ ಇದಕ್ಕೆ ವಿರೋಧ ವ್ಯಕ್ತಪಡಿಸಿದಾಗ ಆತ ಕಾರಿನ ವೇಗವನ್ನು ಹೆಚ್ಚಿಸಿದ್ದಾನೆ.

ಮುಂಬಯಿಯಲ್ಲಿ ಅಪ್ರಾಪ್ತೆ ಮೇಲೆ ಅತ್ಯಾಚಾರ: ಆರೋಪಿ ಕ್ಯಾಬ್‌ ಚಾಲಕ ಬಂಧನ

ಇದರಿಂದ ಗಾಬರಿಗೊಂಡ ಇಬ್ಬರು ಮಹಿಳೆಯರು ಚಲಿಸುತ್ತಿರುವ ಕಾರಿನ ಬಾಗಿಲು ತೆರೆದು ಕೆಳಗೆ ಜಿಗಿದಿದ್ದಾರೆ. ಇನ್ನು ಕಾರಿನಿಂದ ಇಬ್ಬರು ಮಹಿಳೆಯರು ಜಿಗಿಯುತ್ತಿರುವುದನ್ನ ಕಂಡ ಜನ, ಕೂಡಲೇ ಕಾರನ್ನು ಬೆನ್ನತ್ತಿ ತಡೆದಿದ್ದಾರೆ. ಅಲ್ಲದೇ ಕಾರಿನಲ್ಲಿದ್ದ ಮೂರನೇ ಮಹಿಳೆಯನ್ನು ರಕ್ಷಿಸಿದ್ದಾರೆ.

ಈ ಕುರಿತು ಮಾಹಿತಿ ನೀಡಿರುವ ಪೊಲೀಸ್ ಅಧಿಕಾರಿ ರಾಬಿನ್ ಹನ್ಸ್, ನಗರದ ರಂಜೀತ್ ಅವಿನ್ಯೂ ಬಳಿ ರಾತ್ರಿ ಊಟಕ್ಕೆಂದು ಈ ಮಹಿಳೆಯರು ಹೊಟೇಲ್‌ಗೆ ತೆರಳುತ್ತಿದ್ದ ವೇಳೆ ಕ್ಯಾಬ್ ಚಾಲಕ ದುರ್ವರ್ತನೆ ತೋರಿದ್ದಾನೆ ಎಂದು ತಿಳಿಸಿದ್ದಾರೆ.

ಸ್ಕೂಟರ್‌ನಲ್ಲಿ ಮನೆಗೆ ಹೋಗ್ತಿದ್ದ ಮಹಿಳೆಗೆ ಉಗಿದು, ಕುತ್ತಿಗೆ ಹಿಸುಕಿ ಪರಾರಿಯಾದ ಕ್ಯಾಬ್ ಡ್ರೈವರ್..!

ಘಟನೆ ಬಳಿಕ ಕ್ಯಾಬ್ ಚಾಲಕ ತಪ್ಪಿಸಕೊಂಡಿದ್ದನಾದರೂ, ಪೊಲೀಸರು ಆತನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಇನ್ನು ಚಲಿಸುತ್ತಿರುವ ಕಾರಿನಿಂದ ಜಿಗಿದ ಮಹಿಳೆಯರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿದೆ ಎಂದು ರಾಬಿನ್ ಹನ್ಸ್ ಸ್ಪಷ್ಟಪಡಿಸಿದ್ದಾರೆ.